Pe na E Iloa?

O le ā le telē o le faatanoa vai i le malumalu o Solomona?

O le tala i le 1 Tupu 7:26 na faasino atu i le vai lea e “lua afe o paita”a na faaaogā e faitaulaga, ma e tai tutusa ma le tala i le 2 Nofoaiga a Tupu 4:5 lea e taʻua ai le “tolu afe o paita” o le vai.b Ua manatu nisi ua tupu lenei eseesega ona o le sesē o le auala na kopi ai e tusiupu le tala o le tusi o Nofoaiga a Tupu.

Peitaʻi, o loo fesoasoani mai le Tusi Paia o le Lalolagi Fou iā i tatou ina ia malamalama e saʻo ia mau e lua. O loo faapea mai le 1 Tupu 7:26: “E masani ona faatumu i le lua afe o paita.” Mātau, o loo faapea mai le 2 Nofoaiga a Tupu 4:5: “E tolu afe paita o vai e mafai ona tumu ai.” O lea la, o loo faasino le 1 Tupu 7:26 i le telē o le vai e masani ona faatumu ai le faatanoa o le malumalu, ae o loo taʻua i le 2 Nofoaiga a Tupu 4:5 le telē o le vai e mafai ona faatumu ai le faatanoa o le malumalu. O lona uiga, e leʻi faatumuina le faatanoa i le tele e mafai ona ofi i ai. E foliga mai sa masani ona faatumu le faatanoa o le malumalu i le lua afe paita.

Aiseā na totogi ai e Iesu ma Peteru le lafoga o le malumalu i se tupe siliva e tasi?

I le vaitaimi o Iesu, sa manaʻomia e tane Iutaia e matutua atu i le 20 tausaga ona totogiina le lua tupe siliva mo le lafoga o le malumalu i tausaga taʻitasi. E tutusa lea ma le totogi o aso e lua. Ina ua tulaʻi mai se fesili i lenei lafoga, na faatonuina e Iesu ia Peteru: “Ia e alu ma lafo le mātau i le vai, ma o le iʻa muamua e te maua, ia e fafasi lona gutu, ona e maua ai lea o le tupe siliva. Ia ave lenā tupe ma avatu iā i latou mo oe atoa ma aʻu.”—Mataio 17:24-27.

E toʻatele e talitonu o le tupe siliva na taʻua i inei, o le setatara po o le tetatarakama. O lenei tupe e tutusa lona tau ma tupe siliva e fā, po o le lafoga o le malumalu mo tagata e toʻalua. Sa tele ina maua ma faaaogāina le tupe tetatarakama nai lo le tupe titarakama. O loo faapea mai le The New Bible Dictionary: “E foliga mai na fai ma faatasitasi tagata Iutaia ma ō taʻitoʻalua e totogi a latou lafoga o le malumalu.”

E lē gata i lea, o so o se tagata e manaʻo e fesuiaʻi se tupe e totogi ai le lafoga a le tagata e toʻatasi, sa ia totogiina le tau o le fesuiaʻiga o tupe. Atonu e oo atu lenei aofaʻiga i le 8 pasene. Peitaʻi, o i latou e totogiina lafoga mo le toʻalua i le taimi e tasi, latou te lē totogiina le tau o le fesuiaʻiga o tupe. E oo foʻi i lenei manatu, e ōgatusa ma le manatu na tusia e Mataio e tusa ma tū masani i le vaitaimi o Iesu.

[Faaopoopoga i lalo]

[Ata i le itulau 15]

Faalapoaina o le tetatarakama