Ia Mafuta Atu i le Atua
“O Aʻu o Ieova Lou Atua, o Loo Uuina Lou Lima Taumatau”
NA FAAPEA atu se tamā i lona atalii a o sauni e sopoʻia se auala pisi, “tago e uu loʻu lima.” A o uuina e le tamā i lona lima malosi tamatamaʻilima o lona atalii, na lagona ai e le tamaitiiti le malupuipuia ma le lē fefe. Pe na iai se taimi na e moomoo ai e uu e se tasi lou lima, ma taʻitaʻi ma le saogalemu oe a o feagai ma toʻatugā o le olaga? Afai o lea, o le a e maua faamāfanafanaga i upu o loo i le Isaia.—Faitau le Isaia 41:10, 13.
Sa faasino atu upu a Isaia i le nuu o Isaraelu. E ui sa silasila le Atua i lenā nuu o se “oloa tāua,” ae na siʻomia e fili. (Esoto 19:5) Pe na tatau ona matataʻu le nuu o Isaraelu? Na faaaogā e Ieova Isaia e momoli atu ai se feʻau mautinoa. A o iloiloina na upu, e tatau ona tatou iloa o loo faatatau foʻi na faamatalaga i tagata tapuaʻi o le Atua i aso nei.—Roma 15:4.
Ua fetalai mai Ieova: “Aua e te fefe.” (Fuaiupu e 10) E leʻi fai fua e Ieova nei upu. Na faamatala atu e Ieova māfuaaga e lē tatau ai ona fefefe ona tagata: “Auā ou te faatasi ma oe.” E lē o mamao le Atua ma i tatou, ma e lē faatoʻā latalata mai pe a manaʻomia se fesoasoani. E finagalo Ieova ia iloa e ona tagata o loo faatasi o ia ma i latou, e pei o loo tū i o latou tafatafa ma sauni e fesoasoani atu i so o se taimi. Pe e lē o se manatu faamāfanafanaloto ea lenā?
Sa faamautinoa atili atu e Ieova i ona tagata tapuaʻi e faapea: “Aua e te vaai solo.” (Fuaiupu e 10) O le veape Eperu o loo faaaogā i inei, e faasino atu iā i latou e “tilotilo solo i itu eseese pe e i ai se mea e ono lamatia ai.” Na faamatala atu e Ieova māfuaaga e lē tatau ai i ona tagata ona vaavaai solo: “Auā o aʻu o lou Atua.” O le ā se isi faamautinoaga e sili atu i lo o lenā? O Ieova, o “Lē e Silisili Ese,” o “Lē e ona le malosi uma lava.” (Salamo 91:1) I le avea o Ieova o Lē e silisili ona malosi ma o latou Atua, aiseā la o le a latou fefefe ai?
O lea, o le ā e faatalitalia e tagata tapuaʻi o Ieova mai iā te ia? Na ia folafola mai: “Ou te matuā lagolagoina oe i loʻu lima taumatau o le amiotonu.” (Fuaiupu e 10) Na toe fetalai mai foʻi o ia: “O aʻu o Ieova lou Atua, o loo uuina lou lima taumatau.” (Fuaiupu e 13) O le ā e te mafaufau i ai pe a e faalogo i na upu? Ua faapea mai se lomifefiloi: “O le iloiloina o na fuaiupu e lua, o loo faaalia ai se ata manino o se tamā ma sona atalii. E lē na o le tūtū [o le tamā] ma sauni e puipuia lona atalii, ae o loo ia uu lona lima ma lē tuua le tamaitiiti e valavala ma ia.” Seʻi manatu i le mea lenei, o le a lē tuua e Ieova ona tagata e valavala ma ia, e oo lava i taimi e foliga mai e sili ona faigatā i o latou olaga.—Eperu 13:5, 6.
E matuā faamāfanafanaina tagata tapuaʻi o Ieova i aso nei, i upu o loo i le Isaia. I nei “aso e sili ona faigatā,” e iai taimi e lofitūina ai i tatou i popolega o le olaga. (2 Timoteo 3:1) Ae e tatou te lē o fesagaʻia na o i tatou na luʻi. O loo naunau Ieova e aapa mai ma uu o tatou lima. I le pei o fanau e faatuatuaina mātua, e mafai ona tatou uuina lona aao malosi ma le mautinoa, e na te taʻitaʻia i tatou i le ala saʻo, ma fesoasoani mai i taimi e tatou te manaʻomia ai.—Salamo 63:7, 8.
Faitauga Tusi Paia mo Ianuari: