“O le Ola e Faavavau Foʻi Lenei”
“O le ola e faavavau foʻi lenei, ia latou iloa oe, le Atua moni e toʻatasi, atoa ma lē na e auina mai, o Iesu Keriso.”—IOANE 17:3.
O LE iloa o le mea e fai, e mafai ona faasaoina ai le ola. Ina ua maʻi Nouhou e sefulu masina le matua, na iloa lelei e lona tinā, o lē e faigaluega i le matagaluega o le falemaʻi i Niger, le mea e tatau ona fai. Sa ia palu faatasi le masima ma le suka i le vai mamā, e faainu ai lana tama ina ia faafoʻisia ai le vai i le tino. E tusa ai ma le UNICEF, “o le vave o le gaoioi [a le tinā] ma le aveina o le tamaitiiti i le falemaʻi, na vave ai ona toe manuia le tamaitiiti.”
O le atamai mai i le Tusi Paia e mafai ona faasaoina ai foʻi le ola. Ua faapea mai Mose, o lē na muamua tusia se tusi o le Tusi Paia: “E lē o se upu faatauvaa ia mo outou, ae e faalagolago i ai lo outou ola, ma o upu foʻi ia, e faaumiumi ai o outou aso.” (Teuteronome 32:47) Pe e mafai e le Tusi Paia ona faafualoaina moni o tatou ola? E faapefea ona faalagolago i ai o tatou ola?
O mataupu e lima ua mavae, ua faaalia ai e lē mafaatusalia le Tusi Paia ona o valoaga maufaatuatuaina o loo iai, o le saʻo aʻiaʻi o le talafaasolopito ma faamatalaga faafomaʻi o loo taʻua ai, o le autasi o ona manatu, ma o loo tumau pea ona aogā i aso nei. O faamaoniga ia e iloa ai e tutasi le Tusi Paia. O lea la, pe afai o loo taʻua mai ai le auala e maua ai le ola e faavavau, pe ua lē tatau ai ea la ona tatou iloilo totoʻa le Tusi Paia?
E matou te faalaeiauina oe ina ia aʻoaʻoina atili pe e faapefea i le poto saʻo o le Tusi Paia ona e maua ai le filemu o le mafaufau i le taimi lenei, faapea le fiafia i le lumanaʻi. E fiafia Molimau a Ieova e faailoa atu iā te oe le auala e maua ai lenā poto saʻo.
[Pusa/Ata i le itulau 9]
E tutasi foʻi le Tusi Paia ona e pau lea o le tusi o loo maua ai tali faamalieloto, i fesili e masani ona tatou fesili ai e pei o le:
• Aiseā ua tatou iai i inei?
• Aiseā ua tele ai puapuaga?
• Pe e iai se faamoemoe mo ē pele iā te aʻu ua maliliu?
E mafai ona e maua tali faale-Tusi Paia o nei fesili mai i lenei tusi, O ā Aʻoaʻoga Moni a le Tusi Paia?, lomia e Molimau a Ieova.