“O le Ola e Faavavau Foi Lenei”
1 E tatau ona manatu mamafa i fetalaiga a Iesu o loo faamauina i le Ioane 17:3. Sa ia faatāuaina lana fetalaiga—o le aveina i fale o le poto e uiga i le Atua ma Keriso, o lona uiga o le ola e faavavau! Ae pe na o lo tatou mauaina o le poto e uiga ia Ieova ma Iesu o le a tauia ai i tatou i le ola e faavavau? E leai. Sa iloa e tagata Isaraelu e faapea o Ieova o lo latou Atua, ae sa lei atagia atu i auala na ola ai o latou olaga lena talitonuga. O le iuga, na latou melea ai lona finagalo malie. (Ho. 4:1, 2, 6) I aso nei e faitau miliona tagata atonu “ua latou maelega i la le Atua, a e le tusa ma le poto.” (Roma 10:2) E manaomia ona latou iloa Ieova, “le Atua moni e toatasi,” ma ia aʻoaʻoina i le auala e tatau ona latou auauna ma le tonu atu ai ia te ia. I lea itu, o le a tatou ofoina ai le tusi o Le Poto e Taʻitaʻia ai i le Ola e Faavavau ia Novema. O le ā se faafeiloaiga o le a e faaaogā i le ofoina o le tusi o Le Poto? O nisi nei o fautuaga atonu e mafai ona aogā mo oe.
2 Talu ai e fou i le toatele o tagata le manatu o le ola e faavavau i le lalolagi, atonu e ono mafai ona faaosofia e lenei upu tomua lo latou fiafia:
◼ “O loo matou fesiligia o matou tuaoi i se fesili. Pe afai e valaaulia oe e te ola e faavavau i se lalolagi faapenei, po o le a e talia le valaaulia? [Faaali le ata i le itulau e 4-5 o le tusi o Le Poto. Faatali mo se tali.] E mafai ona fiafia moni faapea lou olaga. Ae o le ā sou manatu, i se mea e tatau ona e faia ina ia oo moni ai lenei mea ia te oe? [Faatali mo se tali.] Mātau le gaoioiga e manaomia ona fai e tusa ai i le Ioane 17:3. [Faitau.] O le tusi lenei ua fesoasoani i le toatele o tagata ina ia maua ai lenei ituaiga o poto faapitoa. Pe e te manao i sau lava kopi totino e faitau i ai? [Faatali mo se tali.] I le isi aʻu asiasiga, e mafai ona ta talanoa i le pogai e tatau ai ona talitonu e mafai ona tatou maua le ola e faavavau iinei lava i le lalolagi.”
3 Pe a e toe foi atu e asia i latou na tou talanoa i le Ioane 17:3, e mafai ona e fai atu faapenei:
◼ “I laʻu asiasiga talu ai, na ou faitauina atu ai ia te oe upu ofoofogia a Iesu ia o loo maua i le Ioane 17:3, o iina ua faamautinoa mai ai e Iesu ia i tatou e faapea, o le ola e faavavau o le aveina lea i fale o le poto e uiga i le Atua faapena ma ia. Ae e toatele tagata e talitonu e faapea, e na o le lagi lava e mafai ona maua ai le olaga e sili atu ona lelei. O le ā sou lagona e uiga i lena manatu? [Faatali mo se tali.] Afai o iai le tusi lea na ou tuuina ia te oe, ou te manao la e faasino atu ia te oe nisi o mau mai le Tusi Paia e faamaonia ai o le a toe faafoisia le Parataiso i le lalolagi. [Talanoa le palakalafa e 11-16 i itulau e 9-10 o le tusi o Le Poto.] I le isi aʻu asiasiga, ou te fia faailoa atu ai ia te oe le pogai e mafai ai ona e talitonuina nei folafolaga o loo maua i le Tusi Paia. Ae mo lenei taimi, atonu e mafai ona e faitauina le mataupu e 2 i lau tusi.”
4 O se taulimaga lenei atonu e te manao e faaaogā ia i latou o ē mapo lotu:
◼ “O loo matou talanoa atu i o matou tuaoi e faatatau i le pogai ua tele naʻuā ai lotu eseese i le lalolagi. Pe tusa ma le 1,200 lotu eseese o loo iai i na o le Iunaite Setete lava ia, ma e sili atu i le 10,000 lotu eseese i le lalolagi aoao. Ae peitai, e na o le tasi lava le Tusi Paia. O le ā sou manatu, aisea ua tupu ai lenei fenuminumiai i lotu? [Faatali mo se tali. Suʻe le tusi o Le Poto i le mataupu e 5, ma faitau le palakalafa 1.] O le a e maua ai tali faamalie loto i na fesili i le faitauina o lenei mataupu. Ou te fiafia e tuu le tusi ma oe pe afai e te fia suesue i ai.” Afai e talia le tusi, fai ni fuafuaga maʻoti mo le toe foi atu, ma fai i ai: “Pe a ou toe sau e mafai ona ta talanoa pe faamata o lotu uma ua na o ni auala eseese e tau atu i le nofoaga e tasi.”
5 Pe a e toe foi atu e faaauau le talanoaga e uiga i le pogai ua tele naʻuā ai lotu, e mafai ona e faapea atu:
◼ “I la ta talanoaga talu ai, na ou faatū atu ai se fesili e faapea, po o lotu uma ua na o ni auala eseese e tau atu i le nofoaga lava e tasi. O le ā sou manatu i lena mea? [Faatali mo se tali.] Ou te fia faasino atu ia te oe mai le tusi lea na ou tuua le mea na fetalai i ai Iesu e faatatau i lea mataupu. [Suʻe i le mataupu e 5 i le tusi o Le Poto, ma faitau palakalafa e 6-7, e aofia ai ma le Mataio 7:21-23.] Atonu o loo e tau mānatu i le mafuaaga e tāua ai le iloa tonu o le finagalo o le Atua. O le a e iloa ai o isi palakalafa ia e sosoo mai, o loo aumaia ai ni faamatalaga aogā. Faamolemole faitau le vaega o loo totoe o lenei mataupu. I le isi taimi ou te toe sau ai, ou te fiafia e faailoa ia te oe le tāua o le mauaina o le poto saʻo o le Tusi Paia.”
6 E masani lava ona taulau se faafeiloaiga tuusaʻo i le amataina o ni suesuega faale-Tusi Paia. O se upu tomua lenei ua fautuaina mai o loo maua i le itulau e 4 o le tamai tusi “Le Auala e Amata ma Faaauau ai Talanoaga Faale-Tusi Paia”:
◼ “Ua ou asiasi mai e ofoina atu ia te oe se suesuega faale-Tusi Paia e aunoa ma se totogi. Afai e te finagalo i ai, ou te fia faaalu ni nai minute e faataitai atu ai ia te oe le auala o loo faia ai e tagata i atunuu e 200 ni talanoaga ma aiga i le Tusi Paia i o latou lava fale. E mafai ona ta faaaogā so o se mataupu o mataupu nei e faavae ai se talanoaga. [Faaali le faasologa o mataupu o i le tusi o Le Poto.] O lē fea mataupu e te fiafia faapitoa i ai?” Faatali mo le tagata e filifili se mataupu. Suʻe i le mataupu ua filifilia, ma amata le suesuega i le palakalafa muamua.
7 O se isi foi lenei taulimaga tuusaʻo ua taulau manuia e mafai ona e taumafai i ai mo le amataina o ni suesuega:
◼ “Ou te faia ni lesona faale-Tusi Paia e aunoa ma se totogi ma o loo iai pea ni avanoa i laʻu faasologa mo nisi tagata e fia suesue. O se fesoasoani faale-Tusi Paia lenei o loo matou faaaogaina. [Faaali le tusi o Le Poto.] O lesona e faia mo na o ni nai masina ma o loo saunia ai tali i fesili e pei o nei: Aisea ua faataga ai e le Atua mafatiaga? Aisea tatou te ola mātutua ai ma oti? O le ā ua tupu i ē pele ia i tatou ua maliliu? Ma e mafai faapefea ona tatou faalatalata atu i le Atua?” Ona fesili lea i ai, “Pe e mafai ona ou faataitaia atu ia te oe le faiga o le suesuega?” Afai e teena le ofo mo se suesuega, fesili i ai pe manao e tuu le tusi o Le Poto e faitau ai ia lava. Afai na te folafola mai e faitau i ai, ona tuu lea o se kopi.
8 Maeu se oloa tāua o le poto saʻo e uiga i le Atua ma Keriso mo tagata uma ua umiaina! O le aveina i fale o lenei poto, o lona uiga moni o le ola e faavavau lea i tulaga lelei atoatoa. Seʻi o tatou faaaogā avanoa uma ia Novema e fetufaai ai ma isi le poto e taʻitaʻia ai i le ola e faavavau.