Fesoasoani i Isi ia Maua le Poto e Taʻitaʻia ai i le Ola
1 Na faamatala e le aposetolo o Paulo e faapea, ‘o le finagalo o le Atua, ia maua e ituaiga o tagata uma lava le poto saʻo e uiga i le upu moni.’ (1 Timo. 2:4) E mafai faapefea ona tatou fesoasoani i isi ina ia maua lena poto? O le tasi o auala, o le toe asia lea o tagata o ē na faaosofia le naunau e ala i le tusi, E Mafai ona E Ola e Faavavau i Parataiso i Le Lalolagi. Ua faailoa mai i lenei lomiga upu moni o le Tusi Paia, i ni upu manino, faigofie, ma filifilia lelei. O le suesueina la o lenei tusi, o le a mafai ai ona taʻitaʻiina ituaiga uma lava o tagata i le ola. O le ā se faamatalaga e mafai ona tatou fai atu o le a faamalosiau ai i isi e suesue le tusi ma i tatou?
2 Afai o le tatalo le mataupu na e muai talanoa i ai ma se tasi, e mafai ona e faataʻitaʻia lenei taulimaga i se taumafaiga e amata se suesuega:
◼ “Ou te faamoemoe sa e fiafia i le faamatalaga e uiga i le tatalo lea na ta talanoa i ai mai le tusi E Mafai ona E Ola e Faavavau i Parataiso i Le Lalolagi. Sa ou folafola atu ou te toe foi mai ta te talanoa i le auala ua mafai ai e i latou o loo tatalo atu i le Atua, ona faalogo atu foi i latou ia te ia. Ia mātau le mea lea e fai mai ai i le itulau e 228. [Faitau le palakalafa e 10.] I lea, o le suesueina totino o le Tusi Paia, ua tatou faalogologo atu ai i mea o loo fetalai mai ai le Atua ia i tatou. O le faia o lena mea tatou te vavalalata atu ai ia te ia ma fesoasoani ai ia i tatou e feagai ai ma faafitauli i lea aso ma lea aso, lea o loo tatou tatalo atu ai. O se fiafiaga mo aʻu le suesueina o le Tusi Paia ma oe.” Faailoa i ai e faapea, e tusa ma le lima miliona suesuega faale-Tusi Paia o loo faia e Molimau a Ieova i le lalolagi aoao, e fesoasoani ai i tagata i so o se mea ina ia maua le poto e taʻitaʻia ai i le ola e faavavau. Ofo e fai sina faataʻitaʻiga puupuu o le auala e faia ai se suesuega, i le faaaogaina o uluai palakalafa e lima i le mataupu e 27.
3 Afai sa e faaaogā se faafeiloaiga tuusaʻo e amata ai se suesuega, atonu o le a e faapea atu ina ia toe sosoo le uluai talanoaga:
◼ “Sa ou taumafai lava ou te toe asia oe ona o lea ou te manao e faailoa atili atu ia te oe e uiga i la matou polokalame o le faia o suesuega faale-Tusi Paia i aiga e aunoa ma se totogi. Sa ou tuua ia te oe se kopi o lenei tusi, E Mafai ona E Ola e Faavavau i Parataiso i Le Lalolagi, o le fesoasoani lea o loo matou faaaogaina mo le suesuega. Mātau le auala o faalaeiauina ai i tatou e le tusi ina ia talanoa i le Afioga a le Atua. [Faitau le palakalafa e 19 i le itulau e 15.] Afai la e te finagalo malie i ai e aumai lau kopi o le tusi, atonu o le a mafai ona ta faaauauina ai le suesuega e amata i le mea lea na gata ai la ta talanoaga talu ai.” Afai e lei amataina se suesuega i le uluai asiasiga, e mafai ona e faapea atu: “Atonu o se taimi lelei lenei mo aʻu e faataʻitaʻia ai le auala ta te suesueina ai le Tusi Paia.” Pe a uma ona talanoaina ni nai palakalafa, ia fuafua se taimi maʻoti e toe foi atu ai mo le isi suesuega.
4 O le faaaogaina ma le uigā o le tusi o le Ola e Faavavau, o le a mafai ai ona tatou faasalalau atu le poto saʻo auā le faamanuiaina ai o isi. (Faata. 15:7) O lena poto o le a faafiafiaina ai i latou o ē saʻo o latou loto, ma o le a avea o se uunaiga malosi mo i latou ina ia ola e talafeagai ma tapulaa amiotonu a Ieova, ma iu ina taʻitaʻia ai i le ola e faavavau.