Le Filemu i Tagata ua Ia Finagalo Malie i Ai

“Ia tuu atu le viiga i le Atua o i le lagi, ma le filemu i le lalolagi i tagata ua ia finagalo malie i ai.”—LUKA 2:14.

Aiseā ua faamanatu ai e isi le Kerisimasi?

O tausaga taʻitasi e talaʻia ai e le pope ma taʻitaʻi lotu feʻau o le filemu, ma faamoemoe o le a faataunuuina i le Kerisimasi le folafolaga lenei a le agelu e faapea: ʻO le a iai le filemu i le lalolagi i tagata ua Ia finagalo malie i ai.’ O nisi tagata ua ō i ni faigāmalaga faalelotu e faamanatu faapitoa ai le Kerisimasi.

Aiseā ua avea ai o se luʻi?

E lē tumau le filemu i le taimi o le Kerisimasi. O se faataʻitaʻiga, e ui sa fetauaʻi Peretania ma Siamani i le Taua Muamua a le Lalolagi i le 1914, ae sa latou faamanatu faatasi le Kerisimasi ina ua oo i a Tesema. Sa latou fefaasoaaʻi meaʻai, meainu, tapaa, ma faia foʻi sa latou taaloga soka. Peitaʻi e leʻi tumau lenā filemu. I se tusi mai i le muaʻau o le taua, na taʻua ai e se fitafita Peretania le tala na fai atu e se fitafita Siamani iā te ia e faapea: “Ua tatou maua le filemu i le aso lenei. O taeao o le a e tau ai mo lou atunuu, ae ou tau mo loʻu atunuu.”

Mataupu silisili o le Tusi Paia.

ʻUa fanau mai mo i tatou le tama. O le a faaigoa o ia o le Perenise o le Filemu. E leai se mea e gata mai ai le tele o lana pulega o se perenise atoa ma le filemu.’ (Isaia 9:6, 7) Pe e lē faalaeiauina i tatou i lenā valoaga e uiga iā Iesu Keriso? E leʻi fanau mai o ia ina ia aumaia le filemu mo se aso se tasi i le tausaga. I le avea ma Tupu i le lagi, o le a ia aumaia le filemu moni, lea e leai sona iʻuga.

“Ina ia outou maua le filemu iā te aʻu [Iesu]. Ua puapuagatia outou i le lalolagi, ae ia lototetele! Ua ou manumalo i le lalolagi.” (Ioane 16:33) E oo lava i aso nei, o loo fesoasoani Iesu i ona soo ina ia iai le filemu i lo latou va. E moni o loo puapuagatia Kerisiano, ae e ala i le Tusi Paia, ua latou malamalama ai i le pogai ua iai mafatiaga ma le auala o le a aumaia ai e Iesu le filemu e tumau. O lea, ua latou maua ai le filemu o le mafaufau.

O le usitaʻia o fetalaiga a Iesu, ua maua ai e Molimau a Ieova lenā filemu, e ui i le eseese o atunuu, lanu, ituaiga po o gagana. E mafai ona e mātauina lenā filemu pe a e auai i a latou sauniga. Atonu o le a e ioe ma le isi toʻatele, o lenei filemu e sili atu nai lo o se filemu e maua mai i le Kerisimasi.

[Faamatalaga faaopoopo i le itulau 8]

Ua autasia Molimau a Ieova i le filemu, e ui i le eseese o lanu, po o gagana. E mafai ona e mātauina lenā filemu pe a e auai i a latou sauniga.

[Ata i le itulau 8]