Faatasitasi ma Aiga
“Faauta! Maʻeu le lelei ma le matagofie pe a nonofo faatasi o uso i le autasi!”—SALAMO 133:1.
Aiseā ua faamanatu ai e isi le Kerisimasi?
Talu ai o tagata Isaraelu uma e tupuga mai iā Iakopo, o i latou la o se “ʻauuso” mai le aiga e tasi. O lea, sa o se mea e “lelei” ma “matagofie,” pe a latou faatasitasi mo tausamiga i Ierusalema. I le pei o i latou, e tele aiga i aso nei e fiafia e faatasitasi ma faaalu se taimi “lelei” ma “matagofie” i le Kerisimasi.
Aiseā ua avea ai o se luʻi?
Ua faapea mai le lomifefiloi o le Encyclopedia of Christmas and New Year’s Celebrations: “O nisi o faafitauli faaleaiga na tanumia a o faagasolo le tausaga, e masani lava ona toe lāgā pe a faatasitasi i le Kerisimasi.”
Mataupu silisili o le Tusi Paia.
“Taui atu pea e tusa ai ma le mea e tatau mo o latou mātua.” (1 Timoteo 5:4) Ia fuafua e asiasi pea i aiga i le tele e mafai ai. E tusa pe e mamao le mea e nonofo ai ou tauaiga, ae e mafai lava ona e fesootaʻi i ai e ala i le tusi atu o se tusi, telefoni, imeli, pe e talanoa foʻi i le initaneti. O le fesootaʻi e lē aunoa o le a faaitiitia ai le lē femalamalamaaʻi.
“O outou lava ua taofia ai le faaalia mai o lo outou alofa faapelepele. . . . Ia faalautele atu o outou loto.” (2 Korinito 6:12, 13) O tauaiga e seāseā feiloaʻi i ai e masani lava ona pei o ni tagata ese, aemaise lava i le fanau. E manatu nisi tamaiti, e eseese o latou uiga mai i mātua o o latou mātua po o tauaiga. O lea, ia faalaeiau lau fanau e ʻfaalautele atu o latou loto’ e ala i le alolofa i tagata matutua o le aiga. O tamaiti e faaalu e lē aunoa le taimi ma tagata matutua, e masani lava ona alolofa ma talisapaia ē e matutua.
“E maʻeu le matagofie o le upu e fai i le taimi talafeagai!” (Faataoto 15:23) E faapefea ona e ʻalofia mataupu ia e iʻu atu ai i le faaleagaina o faiā faaleaiga? O se tasi o auala, ia sema se “taimi talafeagai” e talanoa ai mataupu e tatau ona talanoaina e le aiga. Pe afai e masani ona outou fesootaʻi, o le a faigofie la ona e talanoa atu i sui o lou aiga ina ia foʻia ni faafitauli, ma maua ai ni faatasitasiga lelei ma matagofie.