Pe E te Maufaatuatuaina Lotu e Faatatau i Amioga Tatau?

Na faapea mai Sylvia, lea e faigaluega i se matagaluega e fesootaʻi atu i tausiga faafomaʻi: “Na matou aʻoʻoga faatasi ma nisi e faapea mai e toʻaʻaga i lotu, peitaʻi e latou te kopi i taimi o suʻega ma faaaogā fualaau faasāina. E leʻi iai se aafiaga o a latou lotu i o latou olaga.”

Na faapea mai se tamāloa e igoa iā Lionel: “E masani ona pepelo aʻu uō matou te faigaluega faatasi ma vili mai o loo mamaʻi, ae o le mea moni e lē o mamaʻi. E latou te toʻaʻaga i le lotu, ae e leai se aogā iā i latou, e tai pei o se meafale e fausia ae e leai sona aogā.”

E leai se uunaʻiga malosi o faia e lotu i tagata e faatatau i amioga tatau. O le toʻatele i aso nei “e foliga mai e faamaoni i le Atua,” ae o le mea moni, “e latou te lē o ola e tusa ai ma lea mana.” (2 Timoteo 3:5) E lē o faataatia e o latou taʻitaʻi lotu ni faaaʻoaʻoga lelei, e latou te lē avatu foʻi ni fautuaga faale-Tusi Paia e faatatau i amioga tatau. E lētioa manatu le toʻatele o tagata, e lē o popole mai le Atua i le auala o loo latou ola ai.

AʻOAʻOGA A LE TUSI PAIA

Ua faailoa mai e le Tusi Paia, e iai faalogona o le Atua, ma e matuā telē se aafiaga o a tatou amioga iā te ia. Ina ua fouvale Isaraelu anamua i le Atua, ʻna latou faatigā iā te ia.’ (Salamo 78:40) Peitaʻi, “e sili atu ona olioli le lagi” pe a liliuese se tasi mai i ona ala leaga. (Luka 15:7) Pe a talisapaia e se tasi uiga matagofie o lo tatou Tamā i le lagi, o le a tupu aʻe ai lona alofa iā te Ia. O le faia faapea, o le a ia fiafia ai i mea e fiafia i ai le Atua, ae ʻinoʻino i mea e inosia e Ia.​—Amosa 5:15.

AE FAAPEFEA MOLIMAU A IEOVA?

Ua faapea mai le nusipepa o le The Deseret News a le aai o Salt Lake City i Amerika: “E fesoasoani Molimau a Ieova i tagata ina ia faaleleia a latou faiā faaleaiga, ma avea ma tagatānuu faamaoni. . . . . E mulimuli ona tagata i tapulaa maualuluga tau amio. E latou te talitonu, o le ulaula, inu tele, faaaogāina o fualaau faasāina, taalo tupe, feusuaʻiga lē mamā, ma faiga faatauatane, o ni gaoioiga e faaleagaina ai le itu faaleagaga.”

E faapefea ona fesoasoani le aʻoaʻoina o uiga o le Atua i Molimau a Ieova? Na faapea mai Sylvia lea na taʻua i luga: “O faiga faatogafiti o se mea e masani ona tupu i le matagaluega e fesootaʻi i le tausiga faafomaʻi. E mafai foʻi ona ou lolo atu i ai. Peitaʻi, o le malamalama i faalogona o Ieovaa ua fesoasoani iā te aʻu e faia le mea saʻo. Ua ou maua le fiafia ma le filemu o le mafaufau.” Na mautinoa e Sylvia, o lona ola e tusa ma ona talitonuga, na fesoasoani lea iā te ia e faaleleia lona olaga.