“Ia E Fetalai Mai iā i Matou, Pe e oo Afea ia Mea?”

1. E pei o le ʻauaposetolo, o le ā o loo tatou naunau ia iloa?

A O LATA ina māeʻa le faiva a Iesu i le lalolagi, na naunau ona soo e fia iloa mea o le a tutupu i le lumanaʻi. A o toeitiiti oo i lona maliu, na fesili ai nisi o ona soo iā te ia: “Pe e oo afea ia mea, ma o le ā foʻi le faailoga o lou faatasi mai, ma le taufaaiʻuiʻuga o le faiga o mea a le lalolagi?” (Mata. 24:3; Mare. 13:3) Na tali atu Iesu e ala i le faailoa atu o se valoaga e tele ona vala, o loo faamauina i le mataupu e 24 ma le 25 o le Mataio. Na valoia mai e Iesu i lenā valoaga le tele o mea mataʻina o le a tutupu. E iai le aafiaga o lenā valoaga iā i tatou, auā o loo tatou naunau foʻi ia iloa mea o le a tutupu i le lumanaʻi.

2. (i) O le ā na tatou taumafai e malamalama i ai mo le tele o tausaga? (ii) O ā fesili o le a tatou iloiloina?

² E tele tausaga o suʻesuʻeina faatasi ma le tatalo e uso faauuina sa taʻimua, le valoaga e faatatau i aso e gata ai. Na latou taumafai e malamalama atili i le taimi tonu e faataunuu ai fetalaiga a Iesu. Ina ia iloa le auala ua faamanino atili ai lo tatou malamalamaga, e tāua ona tatou iloiloina fesili nei: (1) O afea e amata ai le “puapuaga tele”? (2) O afea e faamasino ai e Iesu “mamoe” ma “ʻoti”? (3) O afea e sau pe “taunuu” mai ai Iesu?​—Mata. 24:21; 25:31-33.

O AFEA E AMATA AI LE PUAPUAGA TELE?

3. O le ā lo tatou malamalamaga sa iai e faatatau i le puapuaga tele?

³ I le tele o tausaga, sa tatou manatu ai na amata le puapuaga tele i le Taua Muamua a le Lalolagi i le 1914. Peitaʻi na “faapuupuuina [e Ieova] ia aso” i le 1918 ina ua māeʻa lenā taua, ina ia mafai ai e le vaega totoe ona talaʻi atu le tala lelei i atunuu uma. (Mata. 24:21, 22) Pe a māeʻa le galuega talaʻi, ona faaumatia loa lea o le lalolagi a Satani. Sa tatou talitonu e tolu vaega o le puapuaga tele: E iai le amataga mai le 1914-1918, ona faasalavei lea ma taofia i le 1918, ae faaiʻu iā Amaketo.

4. O le ā ua tatou malamalama ai e uiga i le valoaga a Iesu?

⁴ O suʻesuʻega atili i le valoaga a Iesu e faatatau i aso e gata ai, na iloa ai e lua faataunuuga o nisi vala o lenā valoaga. (Mata. 24:4-22) O le faataunuuga muamua sa tupu i Iutaia i le uluaʻi senituri T.A, ae e iai foʻi le faataunuuga i le lalolagi aoao i o tatou aso. O lea, e tatau ai ona toe suia lo tatou malamalamaga i isi vala o lenā valoaga.a

5. (i) O le ā le vaitaimi faigatā na amata mai le 1914? (ii) O le ā le vaitaimi i le uluaʻi senituri e faatusa i ai le vaitaimi o puapuaga?

⁵ Ua tatou iloa e leʻi amataina le vaega muamua o le puapuaga tele i le 1914. Aiseā? Talu ai sa valoia i le Tusi Paia, e lē amataina le puapuaga tele i le fetauaʻi o atunuu. Peitaʻi, e amata i le osofaʻia o lotu sesē. O mea na amata ona tutupu i le 1914, e lē o le amataga lenā o le puapuaga tele. Peitaʻi, o le “amataga ia o le tigā o puapuaga.” (Mata. 24:8) O lenei “tigā o puapuaga,” e tutusa ma mea na tutupu i Iutaia ma Ierusalema mai le 33 T.A.-66 T.A.

6. E faapefea ona tatou iloa le amataga o le puapuaga tele?

⁶ E faapefea ona tatou iloa le amataga o le puapuaga tele? Na fetalai Iesu: “Pe a outou vaaia le mea e inosia e faatafuna aʻi, e pei ona faamatalaina e le perofeta o Tanielu, ua tū i le mea paia, (o lē faitau, ia iā te ia le faautaga loloto) o ē o i Iutaia, inā sosola atu ia i mauga.” (Mata. 24:15, 16) O le faataunuuga muamua o le “tū i le mea paia,” na tupu i le 66 T.A. ina ua osofaʻia e ʻautau a Roma (ʻmea inosia’), Ierusalema ma lona malumalu (mea paia i manatu o tagata Iutaia). Peitaʻi o le faataunuuga sili, pe a osofaʻia e Malo Aufaatasi (ʻmea inosia’ i aso nei) lotu ua faapea mai o Kerisiano, (mea e paia i manatu o tagata e faapea mai o Kerisiano) ma isi vaega uma o Papelonia le Aai Tele. E tutusa lenā ma le osofaʻiga o loo faamatalaina i le Faaaliga 17:16-18. O lenā osofaʻiga, o le amataga lea o le puapuaga tele.

7. (i) Na faapefea ona faasaoina tagata i le uluaʻi senituri? (ii) O le ā tatou te faatalitalia o le a tupu a o faagasolo le puapuaga tele?

⁷ Na faapea mai Iesu e “faapuupuuina ia aso.” O le uluaʻi faataunuuga o lenā mea na tupu i le 66 T.A., ina ua “faapuupuuina” le osofaʻiga a ʻautau a Roma. O lea, na mafai ai e le ʻaufaauuina na iai i Iutaia ma Ierusalema ona sosola ese mo le “faaolaina.” (Faitau le Mataio 24:22; Mala. 3:17) O le ā tatou te faatalitalia o le a tupu a o faagasolo le puapuaga tele? O le a “faapuupuuina” e Ieova le osofaʻiga a Malo Aufaatasi i lotu sesē, ina ia lē faaumatia faatasi atu ai ma le tapuaʻiga moni. E faamautinoa e Ieova o le a faasaoina ona tagata.

8. (i) O ā mea o le a tutupu pe a māeʻa le vaega muamua o le puapuaga tele? (ii) E foliga mai o afea e maua ai e le sui mulimuli o le 144,000 le taui faalelagi? (Tagaʻi le faaopoopoga.)

⁸ O le ā e tupu pe a māeʻa le vaega muamua o le puapuaga tele? Na faamatala e Iesu, e iai mea o le a tutupu a o leʻi amataina Amaketo. O ā na mea o le a tutupu? E maua le tali i le Esekielu 38:14-16 ma le Mataio 24:29-31. (Faitau.)b A māeʻa lenā, ona tatou molimauina lea o Amaketo, le tumutumuga o le puapuaga tele lea e talitutusa ma le faaumatiaga o Ierusalema i le 70 T.A. (Mala. 4:1) O le taua iā Amaketo e taualuga ai le puapuaga tele. E tutasi le puapuaga tele ona “e leai sona tusa talu le amataga o le lalolagi.” (Mata. 24:21) A mavae lenā, ona amata loa lea o le Pulega a Keriso mo le Afe Tausaga.

9. O le ā le aafiaga i tagata o Ieova o le valoaga a Iesu e faatatau i le puapuaga tele?

⁹ O le valoaga e faatatau i le puapuaga tele e mafai ona faamalosia ai i tatou. Aiseā? Ona ua tatou mautinoa ai, po o ā lava faigatā e tatou te fesagaʻia, o le a faasaoina e Ieova ona tagata uma i le puapuaga tele. (Faaa. 7:9, 14) Ae e sili atu ona tatou olioli, ona o le a faamaonia ai e Ieova le tonu o lana pule silisili ese ma faapaiaina lona suafa paia iā Amaketo.​—Sala. 83:18; Eseki. 38:23.

O AFEA E FAAMASINO AI E IESU MAMOE MA ʻOTI?

10. O le ā lo tatou malamalamaga sa iai muamua e faatatau i le taimi e faamasino ai mamoe ma ʻoti?

¹⁰ Seʻi o tatou iloiloina le faataunuuga o le isi vala o le valoaga a Iesu e faatatau i le faamasinoina o mamoe ma ʻoti. (Mata. 25:31-46) I le taimi muamua, sa tatou manatu ai o le faamasinoina o mamoe ma ʻoti, na faia a o faagasolo aso e gata ai lea na amata mai i le 1914. O lea, sa tatou talitonu ai o ē teena le feʻau o le Malo ma iʻu ina maliliu a o leʻi amataina le puapuaga tele, o le a latou feoti e pei o ni ʻoti ma lē mauaina le faamoemoe o le toetū.

11. Aiseā e leʻi amataina ai le faamasinoina o tagata e pei o ni mamoe ma ʻoti i le 1914?

¹¹ I le 1995, na toe iloiloina ai i le Olomatamata le Mataio 25:31 lea e faapea mai: “Pe a taunuu le Atalii o le tagata i lona mamalu, ma agelu uma faatasi ma ia, ona tiʻetiʻe ai lea o ia i lona nofoālii mamalu.” Na avea Iesu ma Tupu o le Malo o le Atua i le 1914. Ae e leʻi ʻtiʻetiʻe ai o ia i lona nofoālii mamalu’ e avea ma Faamasino o “atunuu uma.” (Mata. 25:32; faatusatusa i le Tanielu 7:13.) Peitaʻi o le talafaatusa e faatatau i mamoe ma ʻoti, o loo faamatalaina ai Iesu o se Faamasino. (Faitau le Mataio 25:31-34, 41, 46.) E leʻi avea Iesu ma Faamasino o atunuu uma i le 1914. O lea, e leʻi amataina ai foʻi i lenā tausaga ona faamasinoina mamoe ma ʻoti.c O afea la o le a amata ai?

12. (i) O afea o le a avea ai Iesu ma Faamasino o atunuu uma? (ii) O ā mea o le a tutupu o loo faamatalaina i le Mataio 24:30, 31 ma le Mataio 25:31-33, 46? (Tagaʻi i le faaopoopoga.)

¹² O le valoaga a Iesu e faatatau i aso e gata ai, ua faailoa mai ai e faatoʻā avea Iesu ma Faamasino o atunuu uma pe a māeʻa le faaumatiaga o lotu sesē. O nisi o mea o le a tutupu pe a māeʻa le vaega muamua o le puapuaga tele, o loo faamauina i le Mataio 24:30, 31, e pei ona taʻua i le palakalafa e 8. Pe a e iloiloina na fuaiupu, o le a e mātauina ai nisi o mea na taʻua e Iesu o le a tutupu e tutusa ma le talafaatusa i mamoe ma ʻoti. O se faataʻitaʻiga: E sau le Atalii o le tagata i lona mamalu faatasi ma agelu, o le a faapotopotoina ituaiga ma atunuu uma. O i latou o le a faamasinoina e pei o ni mamoe o le a “ea i luga o [latou] ulu,” ona o le a latou maua le “ola e faavavau.”d O le a “taufaitagituʻi” ʻoti i le iloaina o le a ʻfaaumatia e faavavau’ i latou.​—Mata. 25:31-33, 46.

13. (i) O afea o le a faamasino ai e Iesu tagata e pei o ni mamoe ma ʻoti? (ii) E faapefea i lenei malamalamaga ona aafia ai la tatou vaaiga i le faiva?

¹³ O le a avea Iesu ma Faamasino o atunuu uma e pei o ni mamoe ma ʻoti, pe a afio mai a o faagasolo le puapuaga tele. Ae iā Amaketo, le tumutumuga o le puapuaga tele, o le a “faaumatia” ai e faavavau ē e pei o ni ʻoti. E faapefea i lenā malamalamaga ona aafia ai la tatou vaaiga i le faiva? E fesoasoani iā i tatou e iloa ai le tāua o le galuega talaʻi. A o leʻi gāpā le puapuaga tele, o loo maua pea e tagata le avanoa e suia ai o latou mafaufauga ma savavali ai i le auala vaitiiti “e tau atu i le ola.” (Mata. 7:13, 14) I le taimi nei, e ono tali mai tagata e pei o ni mamoe po o ni ʻoti foʻi. Ae ia tatou manatua, o le faamasinoga mulimuli e iloa ai po o ai mamoe ma ʻoti, o le a faataunuu a o faagasolo le puapuaga tele. O lea, ia tatou ofo atu i so o se tagata le avanoa e faalogo ma tali mai ai i le feʻau o le Malo.

O AFEA E SAU PE TAUNUU MAI AI IESU?

14, 15. O ā mau faale-Tusi Paia na faasino atu ai Iesu i lona taunuu mai i le lumanaʻi o se Faamasino?

¹⁴ Po o le toe iloiloina o le valoaga a Iesu e faailoa mai ai, e tatau ona toe fetuunaʻi lo tatou malamalamaga e faatatau i le taimi e faataunuu ai isi mea mataʻina o le a tutupu? E maua le tali pe a tatou iloiloina lenā valoaga.

¹⁵ I se vaega o le valoaga na taʻua e Iesu i le Mataio 24:29–25:46, na taulaʻi atu ai Iesu i mea o le a tutupu i aso e gata ai, ma a o faagasolo le puapuaga tele. O lea, e faavalu ona taʻua e Iesu lona “sau” po o lona taunuu mai.e Na fetalai Iesu e faatatau i le puapuaga tele: “O le a latou vaaia foʻi le Atalii o le tagata ua sau i ao o le lagi.” “Tou te lē iloa po o lē fea aso e sau ai lo outou Alii.” “O le itula tou te lē manatunatu ai, e sau ai le Atalii o le tagata.” Ae i le talafaatusa e faatatau i mamoe ma ʻoti na fetalai ai Iesu, e “taunuu le Atalii o le tagata i lona mamalu.” (Mata. 24:30, 42, 44; 25:31) I na mau, e faafā ona faasino atu Iesu i lona afio mai i le lumanaʻi o se Faamasino. O lea, o fea o le valoaga a Iesu o loo ia taʻua ai isi taimi e fā o lona taunuu mai?

16. O ā isi mau o loo taʻua ai le taunuu mai o Iesu?

¹⁶ Na fetalai Iesu e faatatau i le pologa faamaoni ma le faautauta: “E fiafia lenā pologa pe a taunuu mai lona matai, ma maua mai o loo faapea ona ia fai!” I le faataoto e faatatau i taupou, na ia fetalai ai: “A o latou ō atu e faatau, ae taunuu mai loa le alii faaipoipo.” I le talafaatusa e faatatau i taleni, na ia fetalai ai: “Ina ua mavae se taimi umi, ona sau ai lea o le matai o na pologa.” I le talafaatusa lava lenā, na faapea mai ai le matai: “Pe a ou taunuu mai e maua ai aʻu tupe.” (Mata. 24:46; 25:10, 19, 27) O le ā le taimi na faasino atu i ai na fetalaiga a Iesu?

17. O le ā lo tatou malamalamaga sa iai e faatatau i le Mataio 24:46?

¹⁷ O le taunuu mai o Iesu e pei ona talanoaina i le palakalafa e 16, e faasino atu i lona taunuu mai i le 1918. O le manatu lenā sa taʻua i a tatou lomiga i le taimi ua mavae. O se faaaʻoaʻoga, o le fetalaiga a Iesu e faatatau i le “pologa faamaoni ma le faautauta.” (Faitau le Mataio 24:45-47.) Sa tatou manatu o le “taunuu” mai o loo taʻua i le fuaiupu e 46, sa faasino atu i le taimi na asiasia ai e Iesu le tulaga faaleagaga o le ʻaufaauuina i le 1918, ma le tofia o le pologa e vaavaaia mea uma a le Matai i le 1919. (Mala. 3:1) Peitaʻi, ina ua toe faia isi iloiloga o le valoaga, na iloa ai e manaʻomia ona toe fetuunaʻi lo tatou malamalamaga i le taimi e faataunuu ai isi vala o le valoaga. Aiseā?

18. O le ā ua tatou iloa mai le iloiloina o le valoaga a Iesu e faatatau i lona taunuu mai?

¹⁸ I nisi o fuaiupu a o leʻi oo i le Mataio 24:46, o loo faasino atu ai le upu “sau” i le taimi e afio mai ai Iesu e faalauiloa ma faaooina mai le faamasinoga o atunuu, a o faagasolo le puapuaga tele. (Mata. 24:30, 42, 44) Na tatou talanoaina i le palakalafa e 12, o le “taunuu” mai o Iesu o loo taʻua i le Mataio 25:31, e faasino atu foʻi i le taimi o le a faaoo mai ai le faamasinoga i le lumanaʻi. O lea, e mafai ona tatou faapea atu o le taunuu mai o Iesu e tofia le pologa e vaavaaia ana mea uma, e pei ona taʻua i le Mataio 24:46, 47, e faasino atu foʻi i le lumanaʻi a o faagasolo le puapuaga tele.f O lea, o le iloiloina o le valoaga a Iesu ua manino mai ai e faasino atu le taunuu mai o Iesu lea e faavalu ona taʻua i lana valoaga, i le taimi e faaoo mai ai lana faamasinoga a o faagasolo le puapuaga tele.

19. (i) O ā fetuunaʻiga i lo tatou malamalamaga sa tatou talanoaina? (ii) O ā fesili o le a taliina i mataupu o sosoo mai?

¹⁹ O le ā ua tatou aʻoaʻoina? E tolu fesili na lāgā i le amataga o le mataupu, e faatatau i le taimi e taunuu ai nisi vala o le valoaga a Iesu. Muamua, e leʻi amataina le puapuaga tele i le 1914. Peitaʻi, o le a amata i le taimi e osofaʻia ai e Malo Aufaatasi Papelonia le Aai Tele. Lona lua, e leʻi amata ona faamasinoina e Iesu mamoe ma ʻoti i le 1914. Peitaʻi, e faataunuu a o faagasolo le puapuaga tele. Lona tolu, e leʻi taunuu pe afio mai Iesu e tofia le pologa e vaavaaia ana mea uma i le 1919. Peitaʻi o le a faataunuu a o faagasolo le puapuaga tele. O lea, o nei mea uma e tutupu a o faagasolo le puapuaga tele. E faapefea i nei fetuunaʻiga ona aafia ai lo tatou malamalamaga e faatatau i le talafaatusa i le pologa faamaoni? E faapefea ona aafia ai lo tatou malamalamaga i isi talafaatusa a Iesu, o loo faataunuuina i lenei taimi o le iʻuga? O na fesili tāua, o le a iloiloina i mataupu o loo sosoo mai.