Aiseā e Sesē ai Tū Masani o le Kerisimasi?

Ua tele tausaga o taʻua le Kerisimasi, o se aso faamanatu masani faa-Kerisiano e faamanatu ai le fanau mai o Iesu. Peitaʻi, e tatou te taumānatu pe na faapefea ona fesootaʻi atu le tele o tū masani e faia i lenā aso faamanatu, i le fanau mai o Iesu.

O se tasi o vala, o le talafatu e faatatau iā Santa Claus. O le Santa Claus i aso nei, lea e foliga fiafia, e sinā lana ʻava, e mūmū ona alafau, ma e lanu mūmū lona suti, na faia mo se faasalalauga faalauiloa a se kamupani e gaosia meainu i Amerika i Mātū i le 1931. Peitaʻi, ua avea o se faasalalauga e taulau manuia i le vaitaimi o le Kerisimasi. A o faagasolo vaitausaga o le 1950, sa taumafai nisi tagata Pasili e sui Santa Claus i se tasi o o latou tuaa na tupuga mai ai, lea e taʻua o Grandpa Indian. O le iʻuga, na taʻua e le polofesa o Carlos E. Fantinati, e lē gata na sili atu ona lauiloa Santa Claus nai lo o Grandpa Indian, ae “na sili atu foʻi ona lauiloa nai lo o le pepe o Iesu, ma na avea ma faailoga aloaʻia o le aso faamanatu iā Tesema 25.” Ae pe e na o le pau le faafitauli o le Kerisimasi, ona o talafatu e pei o le tala iā Santa Claus? Ina ia tali le fesili, seʻi o tatou toe tepa i le amataga mai o le faa-Kerisiano.

Ua taʻua i le Encyclopedia Britannica: “A o faagasolo uluaʻi senituri e lua o le faa-Kerisiano, sa malolosi teteega i le faamanatuina o aso fanau o ē na faamaturoina, e aofia ai ma Iesu.” Aiseā? Sa manatu Kerisiano i le faamanatuina o aso fanau o se tū faapaupau, ma e tatau ona matuā ʻalofia. O le mea moni, e lē o taʻua mai i le Tusi Paia le aso na fanau ai Iesu.

I le senituri lona fā T.A., na faavae ai e le Lotu Katoliko le aso faamanatu o le Kerisimasi, e ui lava sa teena e uluaʻi Kerisiano le tū o le faamanatuina o aso fanau. O le manaʻoga o le lotu ia faamalosia lona tulaga lauiloa e ala i le aveesea o se tasi o mea autū na faalavelave iā i latou, o le lauiloa lea o lotu faapaupau a Roma ma a latou aso faamanatu i le aso o le tau mālūlū lea e vave ona pogisa. Ua taʻua e Penne L. Restad i le Christmas in America, i tausaga taʻitasi mai iā Tesema 17 seʻia oo iā Ianuari 1, “o le tele o tagata Roma e fai a latou faigaʻai, taaloga, patī, solo, ma auai i isi sauniga a o avatu le faaaloalo i o latou atua.” Ae iā Tesema 25, na faamanatu ai e tagata Roma le aso fanau o le Lā e Lē Mafaatoʻilaloina. E ala i le faamanatu o le Kerisimasi i lenā aso, na faaliliu ai e le lotu le toʻatele o tagata Roma i le faamanatuina o le aso fanau o Iesu, nai lo o le aso fanau o le lā. Ua taʻua e Gerry Bowler i lana tusi Santa Claus, a Biography, ʻsa fiafia pea tagata Roma i faiga sa faia i nei faatasitasiga i le ogatotonu o le tau mālūlū.’ O le mea moni, “sa latou faaaogā faiga tuai ina ia faailoga ai la latou aso faamanatu fou.”

E manino mai la, o le faafitauli autū o tū masani o le Kerisimasi, ona e lē mamā mea na amata mai ai. I lana tusi The Battle for Christmas, o loo faasino atu ai Stephen Nissenbaum i le Kerisimasi, o se “sauniga faapaupau ae ua faaupu o se aso faamanatu faa-Kerisiano.” O lea la, e lē faamamaluina le Atua ma lona Alo o Iesu Keriso i le Kerisimasi. Po o se mataupu la e manatu māmā i ai? Ua tali mai le 2 Korinito 6:14: “E faapefea ona fesootaʻi le amiotonu ma le amioleaga? E faapefea ona mafuta le malamalama ma le pōuliuli?” I le pei o le ogālaau o se laau e tupu aʻe e piʻo, ua faapena foʻi ona matuā sesē le Kerisimasi ua “lē mafai ona faasaʻoina.”​—Failauga 1:15.