Pe a lē Faamaoni se Paaga Faaipoipo

E LAGONA e se tasi le matuā mafatia pe a lē faamaoni lana paaga. E moni, o nisi paaga e mafai ona latou faamagalo a latou paaga ua salamō ma galulue ia toe faaleleia la laʻua faiā.a E tusa lava pe e toe faaleleia le faaipoipoga pe leai, ae o i latou na iloa ane ua lē faamaoni a latou paaga e mafatia i ni āuga lē lelei. E faapefea ona feagai nei paaga faamaoni ma nei faalogona tigā?

O MAU O LE TUSI PAIA E MAUA AI FAUTUAGA LELEI

E ui i le matuā faanoanoa, ae e toʻatele paaga faamaoni ua maua faamāfanafanaga mai i le Tusi Paia. Ua latou iloa o loo silasila mai Ieova i o latou loimata ma alofa mutimutivale mai i o latou tigā.​—Malaki 2:13-16.

“Ina ua tele popolega o loʻu loto, na fiafia loʻu loto ona o au faamāfanafanaga.”​—Salamo 94:19.

Na taʻua e Bill, “A o oʻu faitau i lenā fuaiupu, ou te faaāta Ieova o loo ia tausi ma le alofa oʻu tigā, e pei ona faia e se tamā alofa mutimutivale.”

“E te faamaoni i le tagata faamaoni.”​—Salamo 18:25.

Na faamatala e Carmen, o lē na lē faamaoni lana tane mo ni masina, “E leʻi faamaoni laʻu tane. Ae e mafai ona ou maufaatuatuaina Ieova e faamaoni mai pea iā te aʻu. E na te lē tuulafoaʻia aʻu.”

“Aua neʻi popole i se mea, ae ia faailoa atu o outou manaʻoga i mea uma lava i le Atua, i le tatalo ma le faatoga . . . ona leoleoina ai lea o o outou loto ma mafaufau i le filemu mai i le Atua.”​—Filipi 4:6, 7.

Na faapea mai Sasha, “Na ou faitau e lē aunoa i nei fuaiupu. A o oʻu tatalo pea, na foaʻi mai e le Atua le filemu i loʻu olaga.”

E foliga mai o manatu o tagata na tatou talanoaina, na iai taimi na lagona ai le fiu. Ae sa latou maufaatuatuaina Ieova le Atua ma maua ai le malosi mai i lana Afioga. Na faamatala e Bill: “O loʻu faatuatua na aumai ai se fuafuaga i loʻu olaga ina ua foliga mai ua leai se aogā e ola ai. E ui lava sa iai se taimi na ou savali ai ʻi le vanu e matuā pogisa,’ ae sa faatasi mai pea le Atua.”​—Salamo 23:4.