Faamamalu Iesu Keriso—Le Faavae o lo Tatou Faatuatua
1 E matuā tāua le malamalama i le vaega a Iesu Keriso i le galueaina o fuafuaga a Ieova. Na foai atu e Iesu lona ola o se togiola mo le fanau a tagata usiusitai. (Mata. 20:28) A na seanoa le sauniuniga alofa a Ieova e ala ia Iesu Keriso, semanū tatou te iai pea i le tulaga oti e aunoa ma se faamoemoe mo le lumanai.
2 E faapitoa lava i le vaitaimi o le Faamanatuga, ona tatou toe manatu i le olaga o Iesu, ana aʻoaʻoga, ma lana taulaga. (Luka 22:19) O le talisapaia faapea ua “faaalitinoina mai e le Atua lona lava alofa ia te i tatou, ina ua maliu Keriso ma sui o i tatou, a o tatou agasala pea,” ua uunaia ai i tatou e faamamaluina le Atua ma Keriso i le maelega e fetufaai ma isi le tala lelei. E mafai faapefea ona tatou faia lenei?—Roma 5:8, 10.
FAAALIA LE LOTO FAAFETAI
3 Ua tatou silafia faapea o loo galue le faalapotopotoga vaaia a Ieova i lalo o le tulaga ulu o Iesu. I inei i le lalolagi, o loo faasoa mai e le vasega o le auauna faamaoni mea taumafa faaleagaga tatou te manaomia. Mai lona talavou agai aʻe ai, sa faaalia e Iesu le faaaloalo loloto mo le Afioga a lona Tamā, ma tatou te mananao e mulimuli i lana faaaʻoaʻoga i le suesueina ma le faamalūina o taumafa faaleagaga ua saunia ma le manatu e aʻoaʻoina ai isi ma le uigā. (Mata. 24:45, 46; Luka 2:46-50) E faaalia lo tatou loto faafetai mo le faalapotopotoga ma le sauniuniga faaleagaga ua ia auauai mai i lo tatou mulimuli i lana taʻitaʻiga ma le felagolagomai ma toeaiina.
4 E mafai foi ona tatou folasia le āva ia Keriso ma faaleleia la tatou faiva i le faatatauina o mea ua tatou aʻoaʻoina mai le Afioga a le Atua. O Iesu o se faitaulaga sili e aunoa ma se pona, “e taumamao ma ē agasala.” (Epe. 7:26) Sa leʻi agasala o ia i le taʻua o se tasi mea ae faia le isi. Ona o uso ā auauna, e manaomia ona tatou ola aʻe i lea lava tulaga maualuga. O lea pe a tatou taʻu atu i isi e uiga i le faiga fou amiotonu ua folafola e Ieova, tatou te mananao e ola nei i se auala o le a iloga faatasi ai i tatou ma lena lalolagi fou.—Mata. 7:21; 1 Ioane 2:17.
TALAʻI I LALO O LE TULAGA ULU O KERISO
5 Ia Aperila ma Me, o le a tatou ofoina ai le tusiga o Le Olomatamata i se faavae faameaalofa. E mafai ona tatou faamamaluina Iesu i le faailoaina i le au faitau faapea o le fuafuaga o Le Olomatamata, e pei ona faamatala i le itulau e 2 o lomiga taitasi, e faamalosia ai le “faatuatua i le tupu o loo pule nei, o Iesu Keriso, ona o lona toto masaa na tatalaina ai le ala e maua ai e le fanau a tagata le ola e faavavau.” Ia mautinoa e ofo muamua le tusiga i taimi uma e mafai ai. Afai e lē talia le tusiga, e mafai ona e aaoina mekasini e lua ma se polosiua, ina ia totoina ai le fatu o le upu moni. E ao i tagata talaʻi ona uta mamao ina ia lē faamaimauina mekasini ae maise o tusiga. (Isaia 26:10) A maeʻa ona talia se tusiga, e masani iā i latou o ē naunau moni ona faaalia lea i se meaalofa. Afai e lē mafai e se tagata naunau ona aumaia se meaalofa ae ua taliaina se tusiga, atonu la ua iai i le tagata talaʻi o lē na mauaina le tusiga se avega tauave faateleina ma se faaeaga ia faamamaluina Ieova i ana oa.—Faata. 3:9.
6 Ua faaalia e le anoanoai o se motu o tagata o ē e leʻi avea ma Molimau le faaaloalo mo Iesu i le auai i le Faamanatuga. Faamata e mafai ona fesoasoania i latou nei ia faia se agaigai i luma e sili atu e ala i se suesuega faale-Tusi Paia totino? O se mea lelei ona faamautinoa ua asiasi se tasi ia i latou ma ofo iai le fesoasoani latou te manaomia. Faatasi ma le lagolagosua alofa, atonu e agai ai i luma nisi seia auai i le faiva a o leʻi oo i le isi faamanatuina o le Talisuaga Afiafi a le Alii.
7 Maeu lo tatou faafetai mo le taulaga alofa a lo tatou Faaola, o Iesu! Na ia saunia mo i tatou se faamoemoe mautinoa. Ua avea le auala o lona olaga ma le faamaumauga o lana faiva o se faaaʻoaʻoga lelei atoatoa mo i tatou e mulimuli ai.