Folafola le Tala Lelei ma le Faamalosi
1 Ua lauiloa Kerisiano moni i lo latou faamalosi, i tala faasolopito. O faaaʻoaʻoga lelei o lenei o aposetolo o Peteru ma Ioane. E ui na lafoina i le falepuipui ma faamataʻuina, sa faaauau e nei aposetolo ona tautala i le upu moni ma le lē fefe ma le faamalosi. (Galu. 4:18-20, 23, 31e) Na tauaveina foi e Paulo lana faiva ma le faamalosi i oganuu faigata e ui sa oo ia te ia le tele o sauaga.—Galu. 20:20; 2 Kori. 11:23, 28.
2 Sa mafai faapefea e le au aposetolo atoa ma isi Kerisiano i le gasologa o talatuufaasolo ona faaauau ma le faamalosi e folafola le tala lelei, e ui i puapuaga e tele? Ua tali e le aposetolo o Paulo lena fesili i le 1 Tesalonia 2:2, lea na ia taʻua ai, “ua matou faamalosi ona o lo tatou Atua e tautala atu ia te outou i le tala lelei a le Atua.” I se uiga tali tutusa, na mafai ai e Peteru ma Ioane atoa ma isi soʻo ona folafola le tala lelei ma le faamalosi. Ina ua maeʻa ona tatalaina mai i o la noanoataga i le falepuipui, sa toe o atu Peteru ma Ioane i o la uso le au soʻo. Na la ole atu ia Ieova i le tatalo e avatu ia te i latou le lototele ma le malosi e ‘tautala ai pea i lana afioga ma le faamalosi uma.’ Na vave ona tali mai le Atua i lena tatalo ina “ua tutumu foi i latou uma i le Agaga Paia, ma ua tautala atu i le afioga a le Atua ma le faamalosi.”—Galu. 4:29, 31.
FAAALIA LE MAUTINOA IA IEOVA
3 Na mautinoa e le au aposetolo sa lagolagoina i latou e Ieova. O folafolaga uma na faia e Ieova e ala i lana Afioga ua faamaonia le moni. Ma o isi e fia faataunuuina ua faamaonia ona o Iesu Keriso. Pe o ia i tatou lenei mautinoa e tasi e folafola le tala lelei ma le faamalosi? E ui ina tatou lē tautatala i gagana eseese pe faamalōlō i maʻi, e fau ma soloi faamaoniga ua ia i tatou o le lagolagosua a Ieova. A tatou vaaia le faataunuuga o le valoaga a le Tusi Paia, pe uunaia ai i tatou e tautala i le tala lelei o le Malo o le Atua ma le faamalosi?
4 E ui i lea, e ao ona faatalitalia, faapea, o sea talaʻiga ma le faamalosi o le a fesagai ma teteega. (Ioane 15:20) O le tulaga lena na oo i ai Iesu ma Kerisiano o le uluai senituri. Peitai e leʻi faalavelavea i latou e lena pe faaitiitia ai le malosi na latou talaʻi ai. O le mea moni, sa masani ona avatua e na sauaga ia i latou le avanoa tele e faasalalauina ai le tala lelei o le Malo. (Galu. 4:3, 8-13a) Ona o lo tatou tausisi i le Afioga a le Atua i mataupu tāua, e masani i nisi taimi ona taloina i tatou e avatu se mafuaaga mo lo tatou tulaga. Tatou te manatu i na faatasiga o ni avanoa e faalauiloa ai le tala lelei ma le faamalosi. I le faia faapea, ua tatou faataʻitaʻi ai ia Iesu Keriso ma ona aposetolo.
5 Ua gafatia e le paeonia lagolago avanoa e tele e faalauiloa ai le tala lelei. E toatele o le a paeonia lagolago ia Aperila ma Me, a o isi ua fuafua e faia faapea i masina o loo mulimuli mai. Faamata e faatagaina oe e ou aiaiga e talosaga? I le faia o se taumafaiga e auai i le galuega paeonia lagolago, ua tatou faamaonia ai i tatou e pei o Paulo ma Panapa. Ua taʻua faapea i le Galuega 14:3 (NW): “Ua la faaalu se taimi tatau e tautala ai ma le faamalosi i le pule a Ieova.” Afai e mafai ona tatou faatauina le taimi mai isi gaoioiga e faaalu a itiiti ifo o le 60 itula i le faiva i le masina e tasi, e lē masalomia o le a faateleina lo tatou manuia.
6 E faapitoa lava ona fesoasoani le faamalosi i le faiva pe a ofoina tusiga. Ua iai i mekasini se feau faasaoola e faavae i le Afioga a le Atua. O lea ia aua nei tatou solomuli ae talaʻi ma le faamalosi i le faataʻitaʻi i lo tatou Faaaʻoaʻo, o Iesu, ma ona aposetolo.