Faataatia Sini e Fesoasoani e Tausia Lou Faatuatua ia Malosi
1 O le faatuatua malosi ia Ieova ma le pulega a lona Malo e ala ia Keriso Iesu e manaomia, pe afai e fia taʻuleleia i tatou i le Atua. (Epe. 11:6) E mafai ona taulau o se faiā lelei ma ia, ma e faatumauina ai le faamoemoe o le ola e faavavau. Ae e pei ona faamatala e le aposetolo o Paulo, “e le o i tagata uma le faatuatua.” Ona ua tatou silafia a aunoa ma le faatuatua e lē mafai ona matuā fiafia mai le Atua ma faapea ona lamatia ai olaga, ua iai la mafuaaga lelei mo i tatou e tausisia ai se faatuatua malosi a o tatou fesagaʻi ma “le faaiʻuga o le faiga o mea.”—2 Tesa. 3:2; Mata. 24:3, 36, NW.
2 O le ā atonu e fesoasoani ia i tatou e tausia lo tatou faatuatua ia malosi i le tausaga faaleauaunaga fou? E mafai e sini faatiokarate ona fesoasoani i lena itu. Pe a faataatia sini talafeagai e faatatau i le faiva i le fanua ma isi vaipanoa o le olaga, e anoanoai mea e mafai ona faataulauina mo lo tatou lava lelei ma mo le viiga o lo tatou Tamā faalelagi.
I LE FAIVA MA I SUESUEGA TOTINO
3 Atonu e telē se eseesega o mea tatou te faataunuuina taitoatasi i le faiva. E ui i lea, o le auaunaga faamaoni, tusa lava pe faatapulaa ona o aiaiga tatou te lē tāea, e taʻuleleia e Ieova. Sa faataʻitaʻia lenei i le foai ma le solu atoa a se fafine mativa o ni tupe iti se lua. (Luka 21:1-4) Ae, atonu e iai pea ni auala e mafai ona agaʻigaʻi ai i luma tagata taitoatasi i le faiva i le tausaga faaleauaunaga fou. Mo se faaaʻoaʻoga, e mafai e nisi ona faaalu atili le taimi i le faiva i masina taitasi. Faamata e mafai ona e fuafua se faasologa e faapea ona faatagaina ai oe e paeonia lagolago i se masina pe sili atu mo se vaitaimi o le tausaga? Pe atonu foi e te galue agaʻi i le avea ma paeonia sauatoa? O le faia nei loa o fuafuaga maʻoti e ono fesoasoani ia te oe e ausia sea sini.
4 O se isi sini tāua o le maua atili o mea mai le suesuega totino. Ina ia taulau lenei, e mafai ona e fuafua e faitauina le Tusi Paia atoa i se taimi faatulagaina. E te ono faataatia ese se taimi iloga i vaiaso taitasi mo suesuega totino ma ia pipii i lau faasologa. Ina ia fesoasoani ia te oe e mitiia atoatoa le mataupu ma avea o sau mea totino, ia faaaogā i le auaunaga i le fanua, talanoa i ai ma isi, pe faia sona faatatauga totino i isi auala.
TAGATA TALAVOU MA MĀTUA
5 O se sini e tatau i ē talavou ona iloiloina i le aʻoga o le avatuina o se molimau uigā i faiaʻoga ma uo i le vasega. E faatatau i le polosiua Aʻoga, na faapea mai se Molimau talavou: “Ua sili ona ia faafaigofieina ona matou talanoa atu i faiaʻoga ma aumea aʻoga e uiga i o tatou talitonuga.” Pe ua e taumafai e faaaogā lenei lava auala? Atonu e manaomia ona e maua le loto tele, peitai e mafai ona e mautinoa o le a faamanuia e Ieova au taumafaiga.
6 Outou talavou e, ia fai ma sini ona lē faatagaina o taaiga lē mamā e pei o aumea leaga, fualaau faasaina, ma amioga palapalā e aafia leaga ai oe i masina o i luma! Faamolemole autalu le mataupu i le polosiua Aʻoga, faaaogā lelei mea o iai, ma tuu atu i lenei e fesoasoani ia te oe e sao mai tofotofoga o le faamaoni atonu lua te faafesagaʻi a o iai i le aʻoga.
7 Atonu o iai ni vala eseese o lou olaga faapea ma le faiva o loo e manao e faaleleia. O le ausiaina o sini ua faataatitia mo oe ma lou aiga o le a manaomia ai se fua o le faataulagaina. Ae pe a e manatu faapea o le a “mavae” atu mea o lenei lalolagi, o le a e manao la e faia taumafaiga uma e maua ai le faamaoniga a le Atua. (1 Ioane 2:17) O lea a o e toe tepa i le tausaga faaleauaunaga ua mavae ma vaavaai atu i luma i le tausaga fou ua amataina nei, ia maumauai e tausia lou faatuatua atoa ma le faatuatua o lou aiga ia malosi. Faataatia sini mo oe lava, ma filigā e tauivi ia ausia i latou.