Vivii ia Ieova i Pesega
1 Faamolemole sue ane lau tusi pese faa-Peretania i le itulau e pito tua. O le ā ua e tagaʻi i ai? O se solo o tagata pese sa Levī i le malumalu paia o Ieova, ua matuā matala o latou fofoga, ma pepese ma le naunautai. Sa avea pesega o se vaega tāua o le tapuaiga moni i le malumalu o Ieova. I le taimi o le Tupu o Tavita, e sili atu i le 10 pasene o i latou na tapuai i le malumalu sa tofia e vivii ia Ieova i musika. Ma o le 288 o lena fuainumera, o ni tagata pepese sa aʻoaʻoina, “o i latou uma e popoto.” E mafai ona e mautinoa sa uigā le faatinoina o a latou pesega.—1 Nofo. 23:3, 5; 25:7.
2 Ua tatou iloa, ina ua oo mai i taimi o Kerisiano sa usuina e Iesu ma ona aposetolo se pese i le faaiʻuga o le Talisuaga Afiafi a le Alii. (Mare. 14:26) Ma ua taʻu soo mai e le aposetolo o Paulo ia i tatou ia usuina viiga i lo tatou Atua. Na ia tusia i le Kolose 3:16 “Ia nofo le afioga a Keriso i totonu ia te outou ia tele lava, i le poto uma lava, ia outou aʻoaʻo ma apoapoai le tasi i salāmo, ma pese, ma siva faaleagaga, o loo pepese atu ai ma le faafetai [ia Ieova] i o outou loto.”—Tagaʻi foi Efeso 5:19, 20.
3 O le usuina o pese o le Malo o se tasi lea o auala tatou te viivii ai ia Ieova. O lea pe lē tatau ai la ona tatou pepese ma o tatou loto atoa? Afai tatou te faia faapea, tatou te avatu ai le viiga ia Ieova. E faafofoga mai o ia i a tatou pesega ua taulai atu ia te ia e pei foi ona ia faia ia tatou tatalo. Afai tatou te pepese moni atu lava, e mafai foi ona tatou avatu ai le olioli i isi, ma e aogā foi ia i tatou.
4 Manatunatu i upu matagofie o a tatou pese. Ioe, o ni fesoasoani moni ia agaʻi i lo tatou “aʻoaʻoina ma apoapoai ai le tasi i le isi.” Maeu se fautuaga lelei o loo iai ia tatou pese! I le manatu mamafa i lena fautuaga, e mafai ona fesoasoani ia i tatou e atiina aʻe fua o le agaga, ina ia faaoloa teleina ai ma puipuia ai faasaga i le faauilavea ane o taaʻiga o le tino, faalelalolagi. Ua faalaeiauina i tatou e ‘Pesega mai o tatou loto’ e auauna ai ia Ieova ma le faamalosi ma le tausaafia.
5 Ina ia usuina le pese i se amataga lelei i sauniga, e mafai e le taʻitaʻi fono ona lē gata ina faailoa atu le numera o le pese ae faapea foi lona matua, po o lona autū. Atonu na te matauina mai lea taimi i lea taimi le faavae faale-Tusi Paia mo le pese ma faaopoopo puupuu ai i le auala ua fetaui lelei ai ma faamatalaga ua taulimaina.
6 O Musika o le Malo atoa foi ma kaseti ua taina i le piano o a tatou pese o ni mea faigaluega matagofie mo i tatou e fesoasoani ai i o tatou aiga ina ia faamasani lelei ma pese. O le taina o nei pese o ni musika faalogologo o se auala sili ona olioli lea mo i tatou e atili faamasani ai ma a tatou pese.
7 Ua faifai pea ona faamanatu mai e le Tusi Paia ia i tatou le matafaioi ia vivii i lo tamā faalelagi i pese. Seʻi o tatou faia ia faapea ma le loto atoa. I lea e mafai ai ona tatou avatu se molimau faamafanafana loto i tagata ese o ē o mai i lo tatou lotolotoi. Ioe, seʻi o tatou pepese ia ma fai viiga ia Ieova, e pei ona faia e Tavita anamua.—Sala. 108:1-3.