Faatatauga o le Suesuega Tau Tusi a le Faapotopotoga
Vaega 2: Le Manaoga ia Sauniuni ma Faia se Sao
1 Ua folafola mai e le Afioga a le Atua, e fiafia le tagata na te maua le atamai ma le faautauta, auā e sili lona taui. (Faata. 3:13, 14, 16-18) O le atamai faaleagaga e tautele ma e faasaoina ai le ola. E mafai ai e se Kerisiano ona faaaogā le poto ua ia maua mai le Afioga a le Atua mo se lelei auiluma i le tapuaiga olaola, i le foia o faafitauli mai lea aso i lea aso, ma i le faia o faaiʻuga e faatatau i ona sini i le olaga.
2 Ua fuafuaina le Suesuega Tau Tusi a le Faapotopotoga e fesoasoani ia i tatou e suesue ma faatatauina le Afioga a le Atua ma i lenei auala o le a tuputupu aʻe ai i le atamai ma le malamalama faaleagaga. O lea, o le auai e lē aunoa i le Suesuega Tau Tusi a le Faapotopotoga, e ao ona avea o se vaega atoa o la tatou polokalama totino mo le mauaina o le atamai.—Faata. 4:7-9.
SAUNIUNI MAEʻAEʻA
3 O nisi o i latou na mafuta ma le faapotopotoga i le uluai senituri, sa lē finafinau i latou lava ma le faamalosi e aʻoaʻoina le upu moni ma ō faatasi ma le malamalama auiluma. Na avea pea i latou o ni tamameamea ia Keriso ma sa lē atamamai ai i latou i le upu o le amiotonu. (Epe. 5:11-13) Sa tomatauina e le aposetolo o Paulo le faapotopotoga ina ia ‘faaoo atu i le taʻumatuaina.’ (Epe. 6:1) Ua manino mai ai, e sili atu e manaomia e lenei mea i lo le na ona faalogologo a o talanoaina e isi le upu moni. E manaomia le manatunatu ma sailiiliga ina ia faagaee ai o tatou ‘malosi manino faalemafaufau,’ ma e tatau ai ona tatou finafinau i tatou lava ma le faamalosi.—2 Pete. 3:1, 2; Luka 13:24)
4 O sauniuniga maeʻaeʻa mo le Suesuega Tau Tusi a le Faapotopotoga e faateleina ai lo tatou malamalama ma atiina aʻe ai le talisapaia mo le mataupu. Peitai, o sauniuniga uigā, e manaomia ai e sili atu na i lo le faitauina o palakalafa ma faatopelau ona vasevaseina tali saʻo i fesili. Tatou te manaomia se taimi e faamalū ai le mataupu e ala i le mafaufau loloto i lona uiga ma lona aogā ia i tatou totino. Sue i mau sii ma mafaufau i le auala e fesootai ai ma manatu o loo i palakalafa. Ia sue foi upu e lē malamalama atoatoa i ai.
5 Atonu ua avea le suesuega totino o se galuega mamafa mo nisi o i tatou, ma e moni e alu ai le taimi; ae, ioe, maeu sona aogā! Na faasino atu e Paulo i iʻuga o sea suesuega filigā, e faapea: “A o mea aano, mā e matutua ia, o i latou ua masani ona lagona ina ua aʻoaʻosooina e iloa ai le lelei ma le leaga.” (Epe. 5:14) Ua fesoasoani sea suesuega totino ia i tatou e tutupu aʻe i le taʻumatuaina, ina ia mafai ai ona tatou filifilia le ala saʻo pe a tatou fesagaʻi ma le faia o faaiʻuga.
FAIA SE SAO
6 E ao ona tatou tauivi e faia se sao i sauniga taitasi. Aiseā? O a tatou tali lava saunia e lē gata o se faaleoga lea o lo tatou faatuatua ae e faalaeiauina ma atiina aʻe ai foi o tatou uso. (Roma 10:10; Epe. 10:23-25) Ua faatino foi e le faia o se sao ola i le Suesuega Tau Tusi a le Faapotopotoga se vaega tāua i lo tatou tuputupu aʻe faaleagaga. Afai e saoloto uma ē agavaa, fanau, atoa ma tagata naunau fou e faia se sao, o le a olioli ai la le vaega i faamatalaga matalasi faaʻoaina. O le a avea lenei o se mea e aʻoaʻoina ai ma faafouina i tagata uma.—km 3/86 itu. 3.
7 Afai tatou te toaʻaga e sauniuni mo le Suesuega Tau Tusi a le Faapotopotoga, auai e lē aunoa, ma saoloto e faia se sao, o le a manuia ai la la tatou sailiga mo le atamai ma o le a tatou “maua ai le poto i le Atua.”—Faata. 2:4, 5.