Tatalaina Mealilo—O le Faaaliga
1 Ua loa ona avea le tusi o Faaaliga o se mealilo. Mo le tele o senituri sa sailiili ai tagata aʻoga o le Tusi Paia ina ia tatalaina ana mealilo, e ui ina itiiti se taunuuga. Peitai sa lē fuafuaina ina ia faalilolilo ai pea e faavavau faamatalaga faagaeeina tauatua o loo i le Faaaliga. O se vaega lea o le Afioga a le Atua e manaomia ona tatou malamalama i ai. (2 Timo. 3:16,17) Ma e faafetai, ona ua tatalaina e le Atua le Faaaliga a o agaʻi atu ona valoaga faagaeetia i le faataunuuga i o tatou aso. E pei lava ona sa faaaogā e Ieova Ioane e faaoo atu ai ia faaaliga i ona uso Kerisiano, ua faapena foi ona Ia faaaogāina i aso nei ‘le auauna faamaoni’ ina ia faailoa mai ai le uiga o lenei valoaga faamaniti tino.—Mata. 24:45-47; Faaa. 1:1-3.
2 Le Ofo mo Mati: O le tusi Revelation—Its Grand Climax At Hand! ua matuā faafiafiaina ma faalaeiauina ai lava tagata o le Atua. Ae aiseā e ao ai ona naunau i ai tagata i lau oganuu? Auā o lenei lomiga faagaeetia, o loo feagai lea ma le tumutumuga o mea ua faamatalaina i le tusi o le Tusi Paia o Faaaliga, ia o le a tutupu i nei aso e gata ai. Pe ua lē naunau ea tagata fai mafaufau i le lumanai e pei ona faaalia mai e le Atua? A o faaata mai e le tusi o le Tusi Paia o Faaaliga faamasinoga amiotonu a le Atua, ae ua ofo mai ai foi ni folafolaga e uiga i faamanuiaga matagofie i le lumanai. (Faaa. 21:1-5) O le malamalama i ana feau faagaeeina e fesoasoani lea ia i tatou ina ia iloa ai po o fea o loo tatou iai i le gasologa o le taimi ma ua faamamafa mai ai ia i tatou le faanatinati o le faia o le finagalo o le Atua.
3 Pe ua faigata tele le tusi Revelation Climax ina ia malamalama ai le lautele? E aliali mai, o le toatele ua latou iloa e lē faigata nauā. Ia matau nisi nei o le tele o faamatalaga sa faia e ē na faitau i le tusi. Fai mai se tasi tamaloa: “E malosi tele lenei faamatalaga. Peitai e faaoso naunau. Ou te fiafia i ai.” Sa faapea mai se faifeau: “Ou te leʻi iloa lava pe na ou faitau i se mea ua sili ona faagaeetia ma moni e pei o lenei tusi!” Na taʻua e se isi tagata o lē e leʻi atoa se vaiaso na ia faitauina ai le tusi: “O lea faatoʻā ou malamalama atoatoa i le upu moni. Ua ou manao e suia loʻu olaga atoa.” E manino lava, e toatele ua latou maua le fiafiaga a o latou faitauina le tusi o le Tusi Paia o Faaaliga faatasi ma le malamalamaga mo le uluai taimi i lo latou olaga ma ua amata ai ona anaana i ana faamatalaga.
4 Faailoa ma le Faamaoni le Revelation Climax i Isi: A o e auai i talanoaga faale-Tusi Paia ma isi ia Mati, aua e te faatali ae faailoa i ē naunau le tusi Revelation Climax. Taʻu ia i latou o ē fia faitau i ai faapea e mafai ona latou faailogaina vaega o le tusi latou te lē malamalama ai, ma pe a e toe foi atu, ona e talanoaina lea o na manatu ma i latou. E mafai ona fai lena ma auala e mautinoa ai le tele o lo latou naunau, ma saunia ai ni mafuaaga faaopoopo mo se toe asiga.
5 E faaopoopo atu i le auaunaga i lea fale ma lea fale, e toatele sa taulau i le ofoina o le tusi Revelation Climax i se auala e leʻi fuafuaina i tauaiga, o ē masani, ma ē e fesootai i faiga faapisinisi. Ia faailoa atu le auala ua aogā totino ai ia te oe ata manino, pusa o manatu fesoasoani, ma isi fesoasoani ofoofogia e aʻoaʻo atu ai o loo i le tusi. Atonu o lenei mea o le a faalaeiauina ai isi e suesueina le tusi o Faaaliga, e ui ina atonu latou te manatu e faigata tele ona malamalama i ai.
6 Maeu le faaeaina o e tatou e mauaina le poto e uiga i mea tutupu i le lumanai o loo faaalia i le tusi o Faaaliga, ma ua faamatalaina mai i le auala a le Atua i aso nei! Ona ua foaiina mai lena poto ia i tatou, talosia ia aua lava neʻi lē taulau ona tatou faailoa atu pe tatalaina atu le uiga o le Afioga a le Atua ia i latou o ē o le a faalogo, i le lē pei o tusiupu i ona po o Iesu atoa ma taʻitaʻi lotu i aso nei. (Faatusatusa Luka 11:52.) A o tatou faia faapea, e faamoemoe o le a toatele atu nisi o le a sapasapaia le faamoemoe o le ola e faavavau i le lalolagi fou a le Atua ma auai faatasi ma i tatou i le faia o le finagalo o Lē na Foafoaina i tatou.—Faaa. 4:11.