Tuliloa le Naunau e Aunoa ma le Faatuai
1 “Aua le tuua mo taeao mea e mafai ona e faia nei.” E toatele ua masani ma lenei muāgagana, lea e faamalosia ai le vave faia o mea e tatau ona fai. E mafai ona faatatau lenei mataupu silisili i la tatou faiva e pei ona faaalia i se mea na tupu o loo mulimuli mai.
2 Na tuua e se tuafafine se tusi i se tamaloa ma folafola i ai e toe foi atu. I se itula mulimuli ane, sa sese ai ona afea e se isi tuafafine le fale lava lea e tasi. Na sau le tamaloa i le faitotoa ma uu mai le tusi ma taʻu atu ia te ia: “Ina ua e fai mai e te toe sau, sa ou lē manatu o le a vave tele e pei o lenei, ae sau ia i totonu, o lea ua ou sauni mo laʻu suesuega.”
3 A o avea lena toe asiga vave o se tulaga e lē masani ai, ae o lenei mea na tupu e faamatilatila ai le manaoga ina ia mataalia e tuliloa le naunau tatou te maua i la tatou faiva e aunoa ma le faatuai fua. Ia Mati o le a tatou ofoina ai le tusi Revelation Climax. Ua faamaonia e mea tutupu i le lalolagi faapea o lenei lomiga, lea o loo faamatalaina ai le tusi faaiʻu o Tusitusiga Kerisiano Eleni, o loo ōgatasi lea e pei o nusipepa i aso nei, leitiō, atoa ma lipoti o tala i le televise i mea tutupu i le lalolagi, e fesootai tuusaʻo ma olaga o le fanau uma a tagata.
4 Manaomia e Tagata le Fesoasoani Faaopoopo: Ina ia mafai ona fesoasoani i tagata e malamalama i faamatalaga o loo i lenei lomiga ma talisapaia faapea e fesootai ma lo latou olaga ma le lumanai, e manaomia ona tatou fuafua mo se toe asiga, e sili ona faia i totonu o ni nai aso pe a maeʻa le uluai asiasiga. O le a faapefea ona tatou faia lenei mea? Atonu i le faailoaina atu lea i le tagata faapea e te toe foi atu, o le a fesoasoani ai e faamautinoa le tele o lona naunau.
5 Saunia le Ala mo le Toe Asiga: E lē faigofie i taimi uma i le lalolagi i aso nei ona faia se ioega mo se taimi patino, ma atonu foi e lē o manatua e lē ona le fale le fuafuaga. Ae peitai, afai e te tusia ma le faaeteete le taimi mo sea toe asiga, ona faamautinoa lea e faia le asiga—i totonu o ni nai aso pe afai e talafeagai—o le a e tauaveina ai lau avega tauave o le manatu mamafa i le fuafuaga. Afai e lē o iai le tagata i le fale, ia mautinoa e faaauau pea ona taumafai e faafesootai o ia. Atonu o le a faalaeiauina o ia e manatu mamafa i lau asiasiga pe afai na te vaaia lou maumauai ina ia maua o ia i le fale.
6 Talu ai ona e lē mafai ona tatou mautinoa atoatoa le naunau e faaalia e le tagata pe a tatou muai asiasi atu, o lea, ia faia ai se faamaumauga ina ia toe foi atu e tusa lava pe aliali mai e faalē manatu mamafa mai. E aogā tele ona tuliloaina o lena naunau e aunoa ma le faatuai. Atonu ua e faagaeetia le naunau o le tagata i le tusi Revelation Climax, ma i lou toe foi atu, atonu o le a e fiafia ai ma maofa i le talilelei e te maua. O lea ia mautinoa e tuliloa le naunau e aunoa ma le faatuai!