Uluai Asiasiga Uigā
1 O le amataina o ni talanoaga i le faiva e mafai ona avea o se luʻi, ona o le pisi naʻuā o tagata i a latou lava mea e fai po o ni manatu maumauai e uiga i lotu. O le ā e mafai ona teu i o tatou mafaufau, o le a faapea ona fesoasoani ia i tatou ina ia uigā ai la tatou uluai asiasiga?
2 Ona o le vaitaimi lenei o aso malōlō, e ono amata ai lau talanoaga i le faapea atu:
◼ “I lenei vaitaimi o le tausaga, e mautinoa le tu mai ai i o tatou mafaufau o le taulaga a Iesu. O le ā sou manatu i le mea o loo faia e Iesu i le taimi nei?” Faataga mo se tali. Ona lua fetufaai loa lea ma lē ona le fale i le Faaaliga 6:2, lea o loo faamatalaina ai Iesu o loo tietie i se solofanua sinasina ma o loo agaʻi atu e faaiʻuina lona manumalo. Faamatala lona tofiga tautupu ma aogā e faavavau o le a aumaia e lana pulega i le fanau uma a tagata usiusitai.
3 A ofoina atu le lomiga o Aperila 1 i le mataupu “Po ua Lava ma Totoe le Lelei o So o se Lotu?” atonu e te faapea atu:
◼ “E toatele tagata o loo talitonu faapea e talia e le Atua lotu uma. Ae matau le mea na taʻua e lo tatou Alii o Iesu Keriso i le Mataio 7:13, 14.” A maeʻa ona faitau le mau, ona faasino lea i ai faapea, o loo faamatala i lenei lomiga o Le Olomatamata le auala e filifilia ai le lotu saʻo ma le pogai e manaomia ai ona tatou faia lena filifiliga.
4 E mafai ona e faatomuaina “Le Olomatamata” o Aperila 15, 1992, i le faamatilatilaina o le mataupu e uiga i tatalo, e pei ona maua i le mataupu “Ia Pipii Mau ia Ieova,” e faapea:
◼ “Ua masani ona tatalo atu tagata mo le manumalo i taimi o le taua. E te manatu ea e faafofogaina e le Atua na tatalo ma faaituʻau ai? [Faataga mo se tali.] Iloilo le tali a le Tusi Paia.” Ona faitau lea o le 1 Peteru 3:12 ma faaopoopo i ai. A maeʻa sina faamatalaga puupuu, ona faasino atu lea i se mataupu o loo i Le Olomatamata, e mafai ona faagaeeina ai le naunau o le tagata i le faitauina o le mekasini. Afai e te matauina le naunau moni, e mafai ona e ofoina i ai le tusiga.
5 Ia teu i manatu, o lo tatou sini o le faafoeina lea o suesuega faale-Tusi Paia. Ona o le toatele o le a paeonia lagolago ia Aperila, o le a tele ai foi la avanoa tatou te mauaina ai tagata o ē e naunau i le suesueina o le Tusi Paia. Ae e tusa lava pe lē faatagaina i tatou e o tatou aiaiga ina ia paeonia lagolago ai ia Aperila, ae tatou te mafaia uma lava ona faataatia le sini o le amataina o se suesuega faale-Tusi Paia.
6 Ua faaaogā e nisi tagata talaʻi sāvali e amata ai suesuega faale-Tusi Paia i le uluai asiasiga.
A ofoina atu le sāvali “Olaga i se Lalolagi Fou Filemu,” e mafai ona e faapea atu:
◼ “O i matou o ni tagata faigaluega tauofo i lo outou pitonuu. Tago ane foi i le sāvali lea, o loo faailoa mai ai le uiga o la matou galuega. E te manatu ea o le a iai se taimi e faapena ai le lalolagi?” A uma ona tali mai, ona lua talanoa lea ma le tagata i nai uluai palakalafa, e faamatilatila ai le Mataio 6:9, 10 ma le Salamo 37:29.
7 Ia manatunatu ma le faaeteete i le auala o le a faailoa atu ai oe lava. O loo aumaia ni faufautuaga e sili ona lelei i le tusi Reasoning i itulau e 9-15. O le faaaogāina ma le tomai o ia faatomuaga o le a fesoasoani lea ia te oe e uigā ai i au uluai asiasiga.