Faataatia le Faavae i Lau Uluai Asiasiga
1 O le a faigofie le faia o toe asiga uigā pe a tatou faataatiaina se faavae lelei i le uluai asiasiga. E mafai ona fesoasoani ia i tatou le tusi Reasoning ina ia faia faapea.
2 O le taulimaga o loo mulimuli mai e faavae i le faatomuaga lona lua i le itulau e 10 o le tusi Reasoning, i lalo o le ulutala, le “Tusi Paia/Atua.”
A uma se faafeiloaiga faaleuō, ona faapea atu lea:
◼ “Matou te iloa ua faatoateleina pea tagata i aso nei ua lē mautinoa po o fea e mafai ona latou mauaina ai ni tali aogā i faafitauli o loo faafaupuʻe mai pea i lea aso ma lea aso. Po o ua e iloaina ea le moni o lena mea? [Faataga mo se tali.] I le taimi ua mavae, sa masani ona tagai tagata i le Tusi Paia mo se fesoasoani. A o le taimi nei, e toatele ua faapea mai ua latou māsalomia. O le ā sou manatu e uiga i le Tusi Paia?” Afai e faaalia e lē ona le fale, le masalosalo e uiga i lona moni aʻiaʻi, ia avane le sāvali Le Pogai e Mafai ai ona E Faatuatua i le Tusi Paia ma faitau i ai le palakalafa lona lua ma le tolu i le itulau e 2. Afai e ioe lē ona le fale faapea o le Tusi Paia o le Afioga lea a le Atua, ia suʻe ma faitau i ai mau o loo faaalia i le palakalafa lona lua i le itulau e 2 o le sāvali, ma lua talatalanoa puupuu i ai.
3 Afai o toatele i la outou oganuu i latou o ē faaalia le lē talitonu, ia taumafai e faaaogā le faatomuaga lona lima i le itulau e 10 o le tusi Reasoning e faagaee ai lo latou naunau.
E mafai ona e faapea atu:
◼ “Ona o feteenaiga uma o loo faia i le lalolagi i aso nei, ua toatele ai tagata loto faamaoni ua faafaigata ona talitonu i le Atua. Ma afai foi o latou talitonu ia te ia, ae latou te lē talitonu e mafai ona ia foia faafitauli o loo tatou fesagaʻi. O le ā sou manatu? [Faataga mo se tali.] Seʻi matau le mea ua taʻua i lenei sāvali e uiga i tagata, le faasaienisi, ma le Tusi Paia.” Ona amata lea ona faitau o le palakalafa lona lima i le itulau e 3 o le sāvali, Le Pogai e Mafai ai ona E Faatuatua i le Tusi Paia.
4 Fai ni Fesili Mai le Sāvali e Faavae ai Lau Asiasiga e Sosoo Ai: Ia fuafua mo lau uluai asiasiga ua na o se amataga lea o se faasologa o asiasiga e fua mai. Aua neʻi e manatu faapea e manaomia ona e matuā tala auiliiliina; pe e ao foi ona soona faatatope, neʻi faapea ai lē ona le fale e te lē o naunau moni atu ia te ia. A maeʻa ona faitauina ni palakalafa se lua pe tolu mai le sāvali, ona fai lea o se fesili e mafai ona talanoaina i se asiga i le lumanai.
5 Mo se faaaʻoaʻoga, e mafai ona e tataʻia i le palakalafa lona tolu i le itulau e 4 ma fesili atu i ai: “Pe e te manatu ea ua lava faamaoniga ua saunia e le Tusi Paia ina ia talitonuina ai mea o loo fai mai ai e uiga i le lumanai?” O le a faataatia ai i lena se manatu faasino mo se toe asiga, pe afai e teʻi ua e iloiloina le Vaega e 4 i le polosiua Po o Silasila Alofa mai ea le Atua ia i Tatou?
6 Afai e naunau moni lē ona le fale, ma e foliga mai na te talisapaia faamatalaga na taulimaina, atonu la o le a e manatu e ofo i ai le polosiua fou i le uluai asiasiga. I mea e talafeagai, ia faamatala puupuu atu faapea, o loo lagolagoina la tatou galuega i meaalofa tauofo ma o le a e fiafia e taliaina sina meaalofa itiiti mo lena fuafuaga.
7 Afai tatou te manatu e ono avea tagata taitoatasi o aiga ma soʻo, o le a tatou taumafai ai la e faaaogā a tatou upu faaiʻu ina ia faataatia ai se faavae mo se toe asiga.