Gaoioiga Mautinoa Ina ia Agaʻigaʻi Atili ai i Luma

¹ O le toatele o i tatou ua uma ona faitau i le 1992 Yearbook i le taimi nei. O le iloaina o le tumutumuga i le lalolagi aoao, e sili atu i le fa ma le kuata miliona tagata talaʻi o le Malo, i atunuu e 211 i le 1991—o se faatelega lea e 6.5 pasene—e matuā faafiafiaina ai lava o tatou loto! Ma le mautinoa, o faatelega o le Malo o loo tutupu i le lalolagi atoa, o ni faamaoniga mataʻina ia o le faataunuuga o le Isaia 2:2-4 ma le Mika 4:1-4.

² E ui ina e lē o atoatoa le lipoti mo le tausaga faaleauaunaga o le 1992, ae ua manino faamaoniga e iloa ai, o loo faamanuia e Ieova lenei tausaga i ni faatelega uigaese. O loo faaauau pea ona faasalafa atu le valaaulia ina ia faatasi mai i lo tatou auuso toatele faavaomalo. Ua faaalia i le aofaiga o ē na auai i le Faamanatuga ma Tauaofiaga Itumalo, le faitau miliona o tagata ua liliu atu nei e fia faalogologo i le feau o le Malo. Mai atunuu uma lava, ua latou tali mai ai i le valaaulia faagaeeina o loo alaga atu: “O mai ia, tatou o ae ia i le mauga o Ieova, o le fale o le Atua o Iakopo; e aʻoaʻo mai foi o ia ia te i tatou ona ala, ona tatou savavali ai lea i ona ala.”

³ Maumauai e Agaʻigaʻi i Luma: O loo agaʻigaʻi i luma le faalapotopotoga a Ieova. Ona o le toatele naʻuā o ē fou ua lolofi aʻe i le mauga o le tapuaiga moni a Ieova, e matuā tāua ai i tagata taitoatasi ona faia se gaoioiga mautinoa ina ia agaʻigaʻi atili ai i luma faaleagaga, ma aapa atu e fesoasoani i isi foi tagata fou ina ia faia faapea. O le manaoga mo sea agaʻigaʻi i luma, o loo faaalia lea i le faaupuga e faapea, o i latou ua tali atu i le valaaulia ina ia ō mai i le mauga o Ieova, o loo faapea atu i isi, “O mai ia.” Na taʻu mai foi e le aposetolo o Ioane se mea faapena i le Faaaliga 22:17: “Ua fetalai mai le Agaga ma le faatoanofotane, Ina sau ia; ina fai atu foi ia o lē faalogo, Ina sau ia.”

⁴ Sa faaalia e Iesu le auala e avatu ai lenei valaaulia. Ina ua tali atu tagata i ana aʻoaʻoga, ona ia valaaulia lea o i latou e auai i lana faiva ma aʻoaʻoina i latou i le auala e faia ai. (Mata. 4:19; 10:5-7, 11-14) Sa aʻoaʻoina e ona soʻo auala uigā na ia faaaogāina e ala i le ō faatasi ma ia, ma i le matauina o le auala na ia taulimaina ai mea. Ona faataʻitaʻi lea i ai o la latou faiva i lena auala. Ona o le lelei tele o lo latou aʻoaʻoina o ana auala, na uaʻi ane ai ē tetee i la latou molimau atu ma le faamalosi, o ē sa latou iloa lelei o i latou o ni soʻo o Iesu. Fai mai le tala a le Galuega 4:13: “Ua vaai i latou i le faamalosi o Peteru ma Ioane, . . . ua latou iloa foi o i laua sa latou faatasi ma Iesu.”

⁵ A o leʻi toe afio aʻe i le lagi, na avatu ai e Iesu se poloaiga e faapea, e ao i ona soʻo ona faaauau pea le faiva faa-Kerisiano, e ala i le faia o ni soʻo fou ma ia aʻoaʻoina i latou e pei lava o le auala na aʻoaʻoina ai foi i latou. Fai mai le poloaiga a Iesu i le Mataio 28:19, 20: “O lenei, ia outou o atu e fai nuu uma lava ma soo, . . . ia outou aʻoaʻo atu ia te i latou ia tausi i mea uma ua ou fai atu ai ia te outou.” Ma ina ia faaalia sa ia manatu e faaauau mai pea lenei galuega seʻia oo mai i o tatou aso, na ia aumaia ai lenei faamautinoaga faaopoopo: “Faauta foi, ou te ia te outou i aso uma lava, e oo lava i le gataaga o [lenei faiga o mea].”

⁶ E leʻi faapea ua lē taulau soʻo moni o Iesu Keriso i le usiusitai i ana faatonuga e aʻoaʻoina soʻo fou i mea uma lava na ia poloai mai ai. Peitai, o le uigaese o le tuputupu aʻe o le faapotopotoga o Molimau a Ieova i le lalolagi, e manaomia ai ona tatou iloiloina manaoga faapitoa o sui fou faatoʻā papatiso o le faapotopotoga, ma tagata talaʻi e leʻi papatisoina, atoa ma tagata o ē o loo tatou suesueina ma i latou le Tusi Paia, ma o ē atonu ua amata ona auai i sauniga a le faapotopotoga i se tulaga faifai pea.

⁷ I le amataga o le tausaga faaleauaunaga o le 1992, e tusa ma le toatasi mai tagata talaʻi uma e toaiva sa toʻaga i le faiva i le na o le tausaga e tasi. E faaopoopo atu i ai, e toatasi mai le toaono sa talaʻi mo tausaga e tolu pe itiiti ifo foi; e toatasi mai le toafa sa auai i le faiva e lē sili atu mo le lima tausaga. E ui ina toatele ē fou o loo lelei ona agaʻigaʻi i luma talu mai ona avea ma sui o le faapotopotoga, ae o le a fesoasoani tele se lagolagosua atili i nisi o vala, ina ia faatelevaveina ai lo latou agaʻigaʻi i luma faaleagaga.

⁸ Ua faalaeiauina e le Eperu 6:1 tagata uma, ina ia ‘oo atu i le taʻumatuaina.’ E tele mea e aofia ai i le taʻumatuaina faa-Kerisiano na i lo o le tau ina avatu o se lipoti o le auaunaga. E aofia ai le agaʻigaʻi i luma i le suesuega totino ma le auai e lē aunoa i sauniga, atoa ma le maelega e faia se sao i le faiva i le fanua. O loo aofia ai foi le fesoasoani atu i isi ina ia maua le poto o le upu moni mo le faaolataga. E tatau ona tatou galulue e faamaʻai o tatou tomai e ala i le ‘faatalitonu atu mai le Tusi Paia.’ (Galu. 17:2) O le tuputupu aʻe ina ia taʻumatuaina, e manaomia ai se taimi, ma e faalagolago lea i le tele naʻuā o loo tatou tuutoina atu i le Atua, ma lo tatou mauaina o agavaa aogā i le fanua. E ui ina o loo tatou pulea le loloto o loo tatou lava tuutoina atu, ae o se ala atamai le faatagaina o isi uso ma isi tuafāfine taʻumatuaina e fesoasoani mai ia i tatou, ina ia maua ai agavaa aogā. E mafai ona aʻoaʻoina i tatou mai mea na tutupu ia i latou, ae maise lava i le faiva i le fanua. E lē tau manaomia ona tatou aʻoaʻoina mea uma e i latou lava, e ala i o tatou tofotofoga ma mea sese.

⁹ Fesoasoani mo i Latou e Lē Lava le Poto Masani: Sa faataatia mai le faaaʻoaʻoga mo le avatuina o se fesoasoani i le amataga o le faapotopotoga Kerisiano. Na aʻoaʻoina e Iesu ona soʻo. (Mare. 3:14; Luka 9:1; 10:1) Ona latou aʻoaʻoina ai lea o isi. Sa maua e Timoteo se faalaeiauga faapitoa ma le fesoasoani mai le aposetolo o Paulo, ma sa agaʻigaʻi i luma le soʻo o Apolo ona o le fesoasoani totino mai ē e sili atu ona agavaa o Akula ma Pisila. (Galu. 18:24-27; 1 Kori. 4:17) I aso nei, o loo mulimuli ai foi sui taʻumatuaina o le faapotopotoga Kerisiano i na faaaʻoaʻoga, i le aʻoaʻoina ma le faalaeiauina o ē e lē lava le poto masani, ae maise lava ē fou ma ē talavou. E pei ona faapea mai le Roma 15:1, 2: “O i tatou o e malolosi ia tatou fesoasoani i le vaivai o e ua le lavā e tatau ai.”

¹⁰ Ua iai i mātua le avega tauave mo le faia o gaoioiga mautinoa e fesoasoani ai i a latou fanau ina ia agaʻigaʻi i luma faaleagaga. E aofia ai i lenei le suesuega faaleaiga, aʻoaʻoina o le fanau i le auala e faia ai suesuega totino, auai e lē aunoa i sauniga ma fai ai se sao, ma tofo i ai e ala i le faatatauina o mea ua latou aʻoaʻoina. (Efe. 6:4; 1 Timo. 5:8) E ao i taʻitaʻi o Suesuega Tau Tusi a le Faapotopotoga ona taʻimua faapitoa lava i le faia o fuafuaga e fesoasoani ai i tagata o loo i la latou suesuega tau tusi, ma vaega mo le auaunaga i le fanua ina ia agaʻigaʻi ai i luma i se auala faaleagaga. E mafai foi ona fesoasoani i ai le ovasia o le auaunaga ma isi toeaina, atoa ma auauna o le faiva ma isi sui o le faapotopotoga.

¹¹ Saunia Mea e Manaomia: Atonu o le manaoga, ua na o se fesoasoani i se vala patino o le galuega faa-Kerisiano, e pei o le suesuega totino. Atonu o loo manaomia e se tagata ni faufautuaga mo le faatulagaina o se faasologa aogā tau suesuega. Ma e ono manaomia e se tasi le fesoasoani i le sauniunia o tali po o ni tofiga. Ae atonu e manaomia e isi pe faapefea ona suesueina ni mataupu o le Tusi Paia.

¹² E toatele ē fou latou te manaomia le fesoasoani i le faiva i le fanua. Atonu e manao se tagata talaʻi ina ia sili atu ona uigā i le galuega i lea fale ma lea fale, le faia o toe asiga, po o le amataina ma le faia o se suesuega faale-Tusi Paia. E mafai ona lava ma totoe ni nai vaega faataʻitaʻi, e faaaogā ai faatomuga ma taulimaga o loo fautuaina i le tusi Reasoning pe mai La Tatou Faiva o le Malo. I isi taimi, atonu na pau lava le mea e manaomia, o ni faufautuaga mo se faasologa aogā o le auaunaga i le fanua ma se fesoasoani ina ia tausisi i ai. O le faia o ni fuafuaga maʻoti e galulue faatasi ma se tagata o manaomia se fesoasoani, o le a mafai ai ona ia agaʻigaʻi i luma i ni sini patino.

¹³ Ua faalaeiauina i tatou e le Afioga a le Atua ina ia iloa mai e isi lo tatou agaʻigaʻi i luma faaleagaga. O le fautuaga lena na tusi atu ai Paulo i lana aumea faigaluega o Timoteo. (1 Timo. 4:15) I le ōgatasi ma lena faalaeiauga, na faamamafa ai e le aposetolo le manaoga ina ia toleniina i tatou lava e pei o loo tausiniō i se tausiniogā po o loo auai ma le manuia i se taua faaleagaga. (1 Kori. 9:24-27; 2 Kori. 10:5, 6) E ao ona tatou vave faatatauina mea uma ua tatou aʻoaʻoina e uiga i le finagalo o le Atua, ina ia vaaia ai e ē matauina i tatou, o i tatou o ni faaaʻoaʻoga ola o le faatuatua moni faa-Kerisiano. I se auala faapena, e ao ai foi ona tatou agaʻigaʻi i luma i le tomai o le aʻoaʻoina o isi e avea ma soʻo tuuina atu o Iesu Keriso.—Iako. 1:22-25; 1 Timo. 4:12-16.

¹⁴ E Aofia ai i le Agaʻigaʻi i Luma le Onosai i Tofotofoga: Sa aʻoaʻoina foi e Iesu Keriso ni lesona e sili ona tāua ona o mea sa ia mafatia ai. (Epe. 5:8) Tatou te mafaia foi. E tusa ai ma lea, e faamalosia le agaʻigaʻi i luma faaleagaga pe afai e ia i tatou le uiga mautinoa o loo fautuaina i le Iakopo 1:2, 3: “Ia outou manatu, o le mea e fiafia tele ai pe a maua outou i tofotofoga eseese; ina ua outou iloa o le tofotofoina o lo outou faatuatua e tupu ai le onosai.” O lea, e tusa lava pe tatou te fetaiai ma se luʻi o ni faamaʻi faaumiumi, faigata tau tamaoaiga, ola i se aiga e lē talitonu, teteega mai le oganuu, po o isi lava mau tulaga e lē maalofia, ua ia i tatou le faamautinoaga a Ieova e faapea, faatasi ma lana fesoasoani, o le a mafai ai ona tatou foia ma faaauau ai pea ona agaʻigaʻi i luma i la tatou tapuaiga ia te ia. (1 Kori. 10:13; 2 Kori. 12:9; 1 Pete. 5:8-11) E maua le manuia ona o le tūtūmau ma le lē faagaeetia i lalo o tulaga uma, ma ‘tautala atu i afioga paia a le Atua ma auauna e tusa ma le malosi ua foaiina mai e le Atua, ina ia viia ai le Atua i mea uma lava e ala ia Iesu Keriso.’—1 Pete. 4:11.

¹⁵ Talia le Fesoasoani Ina ia Agaʻigaʻi Atili ai i Luma: Afai o oe o se tasi o manaomia se fesoasoani ina ia agaʻigaʻi atili ai i luma faaleagaga, ia naunau e talia se fesoasoani mai sui e sili atu ona agavaa o le faapotopotoga. E tusa lava pe e leʻi faafesootaia atu oe ma ofo atu se fesoasoani, e lē manaomia ona e faatagaina le matamuli e aveesea ai lou avanoa mo le mauaina o se fesoasoani. Fesili atu mo se fesoasoani. Ia saoloto e saili le fesoasoani mai so o se tasi e agavaa i le faapotopotoga. Pe e mafai foi ona e talosaga atu i lo outou taʻitaʻi o le Suesuega Tau Tusi a le Faapotopotoga, le ovasia o le auaunaga, po o se tasi o isi toeaina mo se fesoasoani manaomia.—Faatusatusa i le Kenese 32:26; Mataio 7:7, 8.

¹⁶ E mautinoa lava, o se faaeaga ofoofogia le aofia ai i le faatelega ua oo i ai le “motu o tagata e toatele” faavaomalo, o loo lolofi atu i le mauga o le tapuaiga mamā a Ieova. (Faaa. 7:9) O se faaeaga foi le valaaulia o isi ina ia ō atu faatasi ma i tatou i lena mauga. Faatasi ma le talisapaia mai le loto, talosia ia faaauau pea ona tatou faia se gaoioiga mautinoa ina ia agaʻigaʻi atili ai i luma, i le atiina aʻe o lo tatou itu faaleagaga ma le faia o le mea tatou te mafaia e fesoasoani atu ai i isi e agaʻigaʻi i luma faatasi ma i tatou i le auaunaga ia Ieova.