Suesueina o Le Tagata Silisili o Ē Uma na Soifua Mai
1 I le gasologa o vaiaso o Setema 9, o le a amata ai ona tatou suesueina Le Tagata Silisili o Ē Uma na Soifua Mai i a tatou Suesuega Tautusi a le Faapotopotoga. Maeu se olioli o le a maua i le autaluina o le soifuaga ma le faiva a Iesu Keriso! Ona e fai si ese o le auala na fuafuaina ai lenei tusi mai isi tusi ua tatou suesueina, o le a aogā ai la nisi o taiala nei.
2 E lē o faanumeraina itulau o le tusi, o le faasologa la lea e lomia atu i La Tatou Faiva o le Malo o le a lisi atu ai mataupu e suesueina, e masani lava e tolu i le fa mataupu i vaiaso taitasi. O mataupu e 35, 111, ma le 116, e fai si uumī, ma o le a vaevaeina i ni suesuega tailua i mataupu taitasi. A uma ona faitauina e se uso agavaa se mataupu atoa (po o se tamai ulutala atoa, e pei ona iai i mataupu e 35, 111, ma le 116), ona fai atu lea e le faisuesuega fesili o loo i le faaiuga o le mataupu, e talafeagai ma le mataupu po o le vaega na faitauina. E lē o maua foi i taimi uma tali i se auala faasolosolo i le mataupu. E ao ona faavae aʻe tali pupuu ae tuusaʻo i le mataupu o le lesona.
3 A maeʻa lena, pe a lava le taimi, e ao ona faitauina mau uma o loo sii mai i le faaiuga o le mataupu. O mau uumī o loo sii mai, e mafai ona vaevae i ni vaega laiti ina ia mafai ai e ni tagata talaʻi eseese ona maua se avanoa e faitau ai, ona faia lea o ni faaopoopoga i le vaega na faitau. O le a fesoasoani ni fesili tuusaʻo ua sauniunia e le faisuesuega ina ia aumaia ai ni tali uigā e faaalia ai le auala e fesootai ai mau na faitauina ma manatu ua faamatilatila i le tusi. E ao i fesili ma tali uma ona fesoasoani ia i latou o loo auai, ina ia uai totoʻa atu ia Iesu Keriso, lona soifuaga, ma ana aʻoaʻoga.
4 O loo talanoaina e le tusi o Le Tagata Silisili le soifuaga o Iesu e tusa ai ma le faasologa saʻo o mea na tutupu. O le faaataina faalemafaufau o mea na tutupu ma le matuā teu i le mafaufau le nofoaga na tutupu ai, e mafai ona avea o se fesoasoani moni i le manatuaina o na mea. O lea la, ia mautinoa le iloiloina o ata felanulanuai ma ia fai ma faasino atu i faamaumauga o loo i le faafanua ua faaalia i le amataga o le tusi, lena o loo sosoo atu ai ma le faatomuaga.
5 O le a talanoaina le faatomuaga o le tusi i le vaiaso muamua. A maeʻa ona faitauina palakalafa uma o loo i lalo o le tamai ulutala, ona fai lea e le faisuesuega o ni fesili talafeagai ua ia sauniunia. O lena uluai talanoaga o le a faataatia ai le faavae mo suesuega o loo mulimuli mai a o faagasolo masina e sefulu ma le lua. O le tele o aogā e maua mai i le talanoaina o le mataupu o le a matuā faalagolago lava lea i le tele o sauniuniga a i latou uma e aofia ai. Ae maise lava, e ao i le faisuesuega ona sauniuni lelei i vaiaso taitasi e fesoasoani i le vaega, ina ia masani lelei i le tagata silisili o ē uma na soifua mai, o lo tatou Alii ma le Faaola, o Iesu Keriso.