Faatatauga o le Suesuega Tau Tusi a le Faapotopotoga
Vaega 1: Avega Tauave a le Taʻitaʻi o le Suesuega
1 Ua faatinoina e le Suesuega Tau Tusi a le Faapotopotoga se matafaioi matuā tāua i taualumaga faaleagaga a tagata o Ieova. I masina o loo lumanai, o le a tatou auiliilia ai vala eseese o le faatatauga o le Suesuega Tau Tusi a le Faapotopotoga ma iloilo pe mafai faapefea ona aogā ia i tatou. I lenei lomiga tatou te fia taulaʻi atu ai i le auala e mafai ai e le taʻitaʻi o le suesuega tau tusi ona faafoe le suesuega ina ia faalaeiau ma faamalosia ai le faatuatua.
2 Ina ia uigā i lana aʻoaʻo atu, e ao i le taʻitaʻi ona sauniuni lelei. I le avea ma tagata aʻoga toʻaga o le Afioga a le Atua, e lē gata e tatau ona ia iloa le tali i fesili taitasi ae ao foi ona ia malamalama pe aiseā ua saʻo ai lena tali. O lona sini o le fesoasoani lea i tagata uma i le suesuega ia iloa mafuaaga mo tali. (1 Pete. 3:15) O le a faalolotoina ai e lenei mea lo latou talisapaia mo le mataupu.
SINI I LE FAAFOEINA O LE SUESUEGA
3 O se tasi o sini o le taʻitaʻi o le faaaogā lea o le mataupu i le suesuega e faamalosia ai le faatuatua o i latou uma o loo auai ma uunaia ai i latou ia mananao e faia le finagalo o le Atua ia atili atoatoa. (Sala. 110:3; 2 Tesa. 1:3-5) Ina ia faataulauina lenei mea, e tatau i le taʻitaʻi ona malōlō i vaega talafeagai ina ia ‘faagoto ifo ai’ manatu e faapea ona atiiaʻe ai le mautinoa mai le loto mo Ieova, lana Afioga, ma lana faalapotopotoga. (Kala. 6:6, NW Ref. Bi. faamatalaga i lalo) E mafai ona faaaogā fesili ua tomai ona faaupuina ina ia vane aʻe ai ia auiliiliga e atiina aʻe ai le faatuatua pe a lava le taimi.
4 O se isi sini o le fesoasoani lea i tagata uma ia iloa le auala e mafai ai ona latou faaaogā le mataupu i se auala faatino. Pe mafai faapefea ona latou faaaogāina i le faiva i le fanua? I le faalaeiauina o uso atoa ma ē fou? I le faamalosia o o latou aiga ma i latou lava? A o sauniunia e taʻitaʻi o le Suesuega Tau Tusi a le Faapotopotoga lesona taitasi, e ao ona latou taumafai e tāea le aogā faatino o manatu patino i le suesuega.
5 E mafai ona faaaogā nisi faamatalaga e fesoasoani ai i ni tauaiga lē talitonu, uo i aʻoga, po o uo faigaluega. O isi mataupu atonu e fesoasoani ia i latou o i auaiga fevaevaeai pe atonu i aiga e na o le toatasi le matua. E ono lagā e le taʻitaʻi manatu o i latou i le aofia e ala i le fesoasoani ia i latou e fefulisai ma tagai pe mafai faapefea ona latou faia se faatatauga faatino o le mataupu o loo iloiloina. E ao ona taumafai le taʻitaʻi e tausia le suesuega ia fiafia, ma faia e sili atu na i lo le na ona ufitia o le mataupu i fesili ma tali.—Faatusatusa 1 Korinito 14:9, 19.
FAAALIA LE NAUNAU TOTINO
6 E ala i le faaalia o le naunau totino i tagata taitoatasi o le vaega, e mafai ai e le taʻitaʻi ona faalaeiauina le auai atoatoa. E mafai ona muai tofia i latou o ē matamuli e faitauina mau, pe tuu muamua foi ia i latou se fesili e sauniuni mo le taliina. E ao ona taumafai tagata uma e tali i a latou lava upu. I le faalogologo ma le faaeteete i tali, e mafai ai e le taʻitaʻi ona mautinoa po o iai nisi o loo manaomia se fesoasoani totino. E mafai foi ona ia faaaogā isi o ē agavaa i le vaega e lagolagosua i le avatuina o le fesoasoani i na tagata.
7 O le Suesuega Tau Tusi a le Faapotopotoga o se faamanuiaga mo i tatou. Ua aumai ai ia i tatou le avanoa e feiloai ai i vaega laiti ma atili uaʻi totino atu ai i isi. E ao lava ona aua neʻi o tatou manatu i ai faapea e itiiti sona aogā na i lo o isi sauniga. O loo faatoʻaga ona tauaveina e lau taʻitaʻi o le Suesuega Tau Tusi a le Faapotopotoga lana avega tauave e faaaogā suesuega taitasi e faamalosia ai lou faatuatua ia Ieova ma atiina aʻe ai lou talisapaia mo sauniuniga faaleagaga a le Atua.