Ia Faamautinoa e Toe Asiasi Atu

¹ “I tausaga e lua ua mavae atu, na ou faitauina ai faafā [le tusi Creation] ma faaauau ai pea ona maofa i le loloto o suesuega, le tamaoaiga o le poto, ma faamaoniga faamaumauina sa faaalu i lona gaosiga. Faamolemole ia faaauau pea ona lomia. E ao ona tuu atu lenei tusi i lima o tagata uma lava i le lalolagi. A taunuu lena mea, ona uma ai loa lea o le faitio ma le fenuminumiai e uiga i lo tatou amataga, atoa ma talitonuga faapea e leai se Atua.” O le mea lena na tusia e se loia e faigaluega faavaitaimi, e pei ona lipotia mai i le Awake! o Aperila 22, 1992, itulau 32.

² Ona o sea faamautinoga lelei o lenei lomiga, pe e lē ao ai ea ia i tatou uma ona mananao e lagolagosua ma le loto atoa i le tuuina atu o le tusi Creation i lima o le toatele o tagata naunau e mafai ai? Ona tatau lea ona tatou faamautinoa ua faia ni toe asiga e faagaeeina ai le naunau o loo faaalia pea i lenei lomiga uigaese.

³ E lē toatele nisi o i tatou ua faia se suesuega loloto o le anoanoai o tala faaonaponei a tagata e talitonu i le evolusione, ma atonu e itiiti foi so tatou naunau i le faia faapea. Peitai, e lē manaomia lena mea ina ia avatu ai i tagata loto faamaoni ni faamaoniga malolosi e faapea, o le aʻoaʻoga o le evolusione ua na o se isi lea o auala o loo faaaogā e Satani e taʻufaatauvaaina ai Lē na Foafoaina le fanau a tagata, o Ieova. Aua neʻi faaletonu le toe asiasi atu, ona o le fefe, neʻi lē mafai ona e taliina nisi o fesili tofotofo e ono fesiligia e nisi o tagata o aiga. Ua saunia e le lomiga lava ia le tele o faamaoniga faamaumauina mo faamatalaga uma o loo iai.

⁴ E faaopoopo atu i lena, o loo iai le tamaoaiga o faamatalaga e amata mai i le mataupu e 16 seia oo i le mataupu e 20, o loo feagai ma aʻoaʻoga mausalī a le Tusi Paia e uiga i le amataga o le fanau a tagata, le fuafuaga a le Atua mo lenei lalolagi ma tagata, atoa ma filifiliga o loo fesagaʻi ma le fanau a tagata i aso nei. O lea, e anoanoai faamatalaga o loo maua mo le faia o ni toe asiga.

⁵ Afai o e tau lagona sina faaletonu i le faia o toe asiga i nisi o tagata na e tuua ai lomiga, atonu e mafai ona lua ō faatasi ma se tasi o le faapotopotoga o lē e agavaa atu po o sē e sili atu ona malamalama i le aʻoaʻoga o le evolusione. Atonu o ia lea o se uso po o se tuafafine o loo iai i tausaga aʻoga, o lē sa manaomia ona faaalu se taimi i le aʻoga mo le suesueina o lenei mataupu ma ua sili atu ona masani i tala fou e uiga i le evolusione. I le isi itu, atonu o loo iai se tasi i lau faapotopotoga o lē sa talitonu muamua i le evolusione, ae talu mai lena taimi, ua ia aʻoaʻoina le upu moni o le Tusi Paia ma ua mafai nei ona sili atu le aogā i le faatoilaloina o aʻoaʻoga sese a le evolusione.

⁶ Aua le faatali ae tataʻi atu manatu i le mataupu e 19 i le tusi Creation, po o le tusi Ola e Faavavau, ma ia faaaogā le faamoemoe faale-Tusi Paia mo le lumanai e fai ma faavae o lau toe asiga. Ua iai i lena mataupu le tele o manatu e mafai ona faaaogā e faalaeiauina ai se tagata e uaʻi atu i folafolaga a le Tusi Paia mo le lumanai. Atonu e mafai ona e faaaogāina le vaega e amata mai i le itulau e 236 i le tamai ulutala “Faaliliuina le Lalolagi,” sosoo ai ma “Le Iʻuga o le Mativa” ma le “Lē Toe Iai o ni Maʻi, Lē Toe Iai ni Oti” i itulau e 238-239.

⁷ Ua fesoasoani lenei lomiga matagofie i le toatele o tagata e sailia ai le ala i le ola. Talosia ia mafai ona tatou fesoasoani atu foi i nisi tagata e ala i le faalaeiauina o i latou e faitau ma iloiloina le mea ua fai mai ai le tusi Creation e uiga i le mataupu o le ola ma le auala na oo mai ai i inei.