Ia Faaaogā Tatau Mekasini
1 A e asiasi atu i se faletusi, o le a e vaaia ai le fau ma soloi o mekasini felanulanuai o loo faaalia ai mea uma lava, mai tala mālie e oo i faiga faasaienitisi. E lē taitai mafai ona e faitauina uma na tusi. A o iai i nisi o mekasini ni faamatalaga aogā, ae o le tele lava e fesiligia lo latou tāua. E anoanoai tusi e matuā leaga lava, ma e tatau ona alofia.
2 Maeu se eseesega pe a faatusatusa atu i Le Olomatamata ma le Awake! Ua tuutoina atu ia mekasini i le sailia ma le folafolaina atu o le upu moni e mafai ona faaaogā mo le faaolataga o ē uma e talilelei atu i le alofa o le Atua.
3 E mafai ona pāʻia ma le uigā e le Awake! ituaiga uma o tagata, ona o le tele o mea o loo talanoaina ai, ma le eseese o ona mataupu. E pei ona faamatalaina i le itulau e 4 o lomiga taitasi, e “mo le faamalamalamaina o le aiga atoa.” O loo talanoaina ai mataupu e uiga i mea eseese, e aofia ai tagata, lotu, ma le faasaienisi. Na te suesue loloto ma faasino atu i le uiga moni o loo i tua o mea o loo tutupu i le taimi nei. E sili atu i na mea uma, na te “atiina aʻe le mautinoa i le folafolaga a Lē na Foafoaina Mea e uiga i se lalolagi fou filemu ma le saogalemu.”
4 O loo faatomuaina i le lomiga o le Awake! o Oketopa 8 le mataupu “E Mafai ona E Manumalo i Faalogona Sese.” E lē mafaitaulia ola ua lafotuina i na faalogona. O le ofoina atu o lenei mekasini e ala i le taulai atu i ona fautuaga mālū faale-Tusi Paia, atonu o le a talilelei mai ai. Ae mo le lomiga o Oketopa 22, e ao ona mafai ona tatou maua se tasi e fia faalogologo, e ala i le tataʻi atu i manatu e faamafanafanaina ai i le faasologa o mataupu “O se Lalolagi Fou e Faamalieina ai Tagata Uma.”
5 Ua atiina aʻe e Le Olomatamata ia lava o se mekasini lauiloa i le lalolagi, i le folafolaina o le tala lelei e uiga i le Malo o le Atua, atoa ma faamanuiaga faa-Parataiso o le a na aumaia. O le a taliina i le lomiga o Oketopa 1 le fesili suesue e faapea, “Pe Faamaonia e le Atua Faamalōlōga i le Faatuatua?” Ua aumaia e lena mataupu se avanoa lelei ia i tatou e fesoasoani ai i tagata, e aʻoaʻo e uiga i lo tatou faamoemoe o le Malo. O faamatalaga e uiga i “Se Togiola e Fai ma Sui o Tagata e Toatele,” o loo aumaia i le lomiga o Oketopa 15, o le a fesoasoani ia i tatou e amataina ai ni talanoaga ma i latou o ē e lē malamalama atoatoa i le manaoga mo se togiola.
6 Tatou te mananao i ē loto naunau faamaoni ina ia maua ia mekasini tautele i se faavae faifai pea. Pe a talanoaina le tele o aogā o nei mekasini, ia taumafai e faamautinoa pe faamata e naunau moni lava le tagata. A maua se tasi e naunau i le taimi muamua, atonu o le a e filifili e te alu lava oe e ave i ai nisi lomiga, o se vaega o lau ala mekasini, ma i lenei auala o le a atiina aʻe ai le naunau. Pe a e mautinoa ua naunau moni le tagata, ona ofo lea i ai e momoli atu ana mekasini e ala i le meli, o se tusiga. Afai e ioe i ai le tagata, atonu e mafai loa ona fai se tusiga mo le ono masina.
7 E mafai ona tatou ofoina atu nei mekasini i tagata uma lava, ona ua tatou mautinoa lo latou aogā. O loo ia i tatou se mea lelei, ma o le a pei i tatou o Keriso e ala i le faailoaina atu i isi.—Faata. 3:27; Epe. 13:16.