Faaalia le Manatu Mamafa mo Ē Naunau
1 E ese mai isi tagata uma, ua faaalia ma le agaalofa e Ieova le manatu mamafa mo tagata. E lē gata ua ia saunia le fau ma soloi o mea faaletino, ae ua ia foaiina mai foi ia i tatou mea faaleagaga tatou te manaomia ma olioli ai. Ona o lona manatu mamafa mai tele ia i tatou, ua oo ai foi ina ia suesueina mea o i o tatou loto.—Sala. 139:23.
2 A o iai Iesu i le lalolagi, sa ia matuā mulimuli atoatoa i le faaaʻoaʻoga a lona Tamā i le faaalia o le manatu mamafa mo isi. Manatua le tagata na aioi atu ia Iesu, “Le Alii e, a ē finagalo i ai e te mafaia lava ona faamamā mai ia te au”? Na tali atu Iesu, “Ou te loto i ai.” (Mata. 8:1-3) Ina ua iloa atu e Iesu se fafine ua oti lana tane o loo faanoanoa, o le ā le mea sa ia faia? Sa tu o ia ma fesoasoani atu i le fafine. (Luka 7:11-15) Pe mafai ea ona sili atu lou mataala i le faaalia o le manatu mamafa mo ē naunau?
3 I le faaaʻoaʻo i lo tatou Tamā o Ieova, ma lona Alo o Keriso Iesu, e tatau ai foi ia i tatou ona faaalia se naunau totino i isi. Tatou te faia lena mea e ala i le tausia o se faamaumauga saʻo o le galuega i lea fale ma lea fale. E aofia ai i lena le tusia i lalo o le igoa ma le nofoaga tonu o le tagata naunau, faatasi ma le mataupu sa talanoaina i le uluai asiasiga. Ma, a o leʻi faia le toe asiga, ia sauniuni lelei. Afai sa tatou tuua ni mekasini i le uluai asiasiga, e mafai ona faavae la tatou toe asiga i se manatu patino ua faamatalaina i se tasi o mataupu. Matau le auala atonu e faia ai lenei mea.
4 Afai sa e tuua Le Olomatamata o Oketopa 1, 1992, ma na taulai atu i le mataupu “Pe Faamaonia e le Atua Faamalōlōga i le Faatuatua?,” e mafai ona e sauniuni e faamatilatila le Faaaliga 21:4 ma le Ioane 17:3 i lau toe asiga.
Mo se faaaʻoaʻoga, a uma ona faitau le Faaaliga 21:4, atonu e te fesili atu faapea:
◼ “E mafai faapefea ona avea i tatou ma vaega o se lalolagi o le a lē toe iai ni maʻi? [Faataga mo se tali.] Faafofoga foi i le mea na fetalai mai ai lo tatou Alii o Iesu, e manaomia ina ia maua ai le ola i se lalolagi faapena.” Ona faitau lea o le Ioane 17:3, ma faamatilatila e faapea, e mafai ona maua le ola e faavavau i se lalolagi fou e ala i le aʻoaʻoina o le poto e uiga i le Atua ma Keriso. Afai e iai sina naunau, ona taumafai lea e amata se suesuega i le sāvali, Olaga i se Lalolagi Fou Filemu.
5 E mafai ona maua se tali lelei mai e ala i le talanoaina o se manatu e filifilia mai i le Awake! o Oketopa 8, 1992, e uiga i le “E Mafai ona E Manumalo i Faalogona Sese.” Pe a faia se toe asiga, e mafai ona faavae lau talanoaga i le Filipi 4:6,7.
Atonu e te fesili atu faapea:
◼“O le ā e te talitonu o le a avea ma vaifofo e manumalo ai i faalogona sese i aso nei?” Ioe atu i le tali mai, ona fai atu lea: “O se mea e lelei ai, ona o loo aumaia e le Tusi Paia ni mataupu silisili, afai tatou te faatatauina, o le a saosaolaumea ai i le filemu o le mafaufau ma le loto. [Faasino atu i manatu talafeagai mai le Filipi 4:6,7.] O loo taulai atu le Tusi Paia i se taimi o le a ola ai tagata uma i mataupu silisili o le Tusi Paia ma o le a lē toe iai ni tulaga e aumai ai ni faalogona sese.” Ona faamatilatila lea o isi faamanuiaga i le lumanai e ala i le iloiloina o le sāvali, Olaga i se Lalolagi Fou Filemu, ma tataʻi atu ai i se suesuega.
6 Ae ā pe afai ua uma ona iai i lē ona le fale se tasi o a tatou lomiga? Aiseā la e le faaaogā e amata ai se suesuega? Afai o le tusi Ola e Faavavau, ona suʻe lea i le faasologa o mataupu o loo iai ma fesili atu i lē ona le fale e filifili se mataupu e fia talanoa i ai. Atonu o le a e amataina ai loa se suesuega i le iloiloina o se palakalafa e tasi pe lua.
7 O le faaalia o le manatu mamafa mo ē naunau e ala i le sauniuni lelei ma le faia o ni toe asiga uigā, e faaalia ai o i tatou o ni ē e faaaʻoaʻo i le Atua ma Keriso, e mananao ina ia faasaoina le toatele o tagata e mafai ai.—2 Pete. 3:9.