Faaaogā le Tusi Ola e Faavavau i Toe Asiga
1 Sa iloa e le aposetolo o Paulo le tāua o le maelega i le tausia o i latou o ē faaalia le naunau i le upu moni. Na ia faatusaina i latou i ni laau iti e faaeteete gatā, e manaomia ona faasūsūina ma galueaiina e lē aunoa. (1 Kori. 3:6-9) E faapena foi i aso nei, e manaomia e ē naunau, le tausiga ma le faaeteete tatou te avatua ia i latou, pe a tatou faia ni toe asiga e atiina aʻe ai lo latou tuputupu aʻe faaleagaga.
2 O se mea lelei ona teu i manatu, o le a manaomia pea e tagata tatou te asiasi atu i ai ni faamanatu, ina ia fesoasoani ai ia te i latou e manatuaina manatu sa lagā i a tatou talanoaga faatoʻā mavae atu. O lea, i toe asiga taitasi, atonu e lelei ona toe autalu puupuu mea sa lua talanoa i ai i le talanoaga faatoʻā mavae atu, ma taulai atu ai i manatu e talisapaia faapitoa e lē ona le fale. Ia faaaafia lē ona le fale i le talanoaga ma ia sauni e matauina mea e naunau i ai ma ona manaoga.
3 I le faia o se toe asiga, e tusa pe sa taliaina le tusi “Ola e Faavavau” pe leai, ae atonu e te manao e faaaogā le faafeiloaiga tuusaʻo lenei e amataina ai se suesuega:
◼ “E toatele tagata matou te talanoa i ai ua mauaina tali i a latou fesili faale-Tusi Paia, ona o le faaaogāina o le tusi lenei.” Ona suʻe lea i le faasologa o mataupu o loo i le tusi Ola e Faavavau, ma fesili atu: “O lē fea o nei mataupu e sili atu ona e naunau i ai? Suʻe i le mataupu ua ia faaalia i ai le naunau, ma faailoa atu i lē ona le fale le auala e fesootai ai palakalafa ua faanumeraina ma fesili o loo i le pito i lalo o itulau taitasi, ina ia mafai ai ona ia mauaina manatu e sili ona aogā i palakalafa taitasi. Ia talanoa na o ni nai manatu ma faia ni fuafuaga maʻoti e toe asiasi atu.
4 E mafai ona faapea se isi faafeiloaiga:
◼ “Na ou matuā fiafia lava i la ta talanoaga i le vaiaso ua mavae. E toatele tagata ua faaalia le popole i le pogai matou te asiasi soo atu ai i o latou aiga. Ou te manatu o le a e naunau i le faamatalaga o loo maua i le itulau e 29 o le tusi lenei, E Mafai ona E Ola e Faavavau i Parataiso i Le Lalolagi. [Faitau le palakalafa e 11.] E faavae i mea na ta faitau i ai, o le ā sau tala i le mea e manaomia ina ia taliaina ai la tatou tapuaiga i le Atua? [Faataga mo se tali ma faamālō atu i lē ona le fale.] I tuā i ona po o Iesu, sa iai i latou o ē na manatu sa taliaina la latou tapuaiga i le Atua. Ae matau le mea na taʻua e uiga ia te i latou i le palakalafa e 2 o lenei mataupu.” Faitau ma faaopoopo i ai i faamatalaga.
5 I le tuliloaina o se asiga faatoʻā mavae atu na taliaina ai le tusi “Ola e Faavavau,” e mafai ona e faapea atu:
◼ “I le taimi mulimuli na ou asiasi mai ai, sa ta talanoa ai i tulaga o le lalolagi e manaomia ona suia. Pe na e tau mānatu ea i le pogai ua faatagaina ai e le Atua le amioleaga?” Faataga mo se tali ma suʻe i le itulau e 99, palakalafa e 2, ma fai atu fesili o le suesuega. Faitau ma talanoaina lena palakalafa, ma suʻe i mau o loo iai. E mafai ona e faaopoopo atu i le talanoaga e ala i le suʻe atu i ata ua filifilia o loo i le tusi, mo se faaaʻoaʻoga, i itulau e 78, 84-85, 119, 147, 149-153, ma le 156-158.
6 I Mea na Taliaina ai se Sāvali: O nisi taimi e taliaina ai se sāvali i le uluai asiasiga. I le faia o toe asiga, e mafai ai ona e talanoaina se palakalafa e tasi pe lua i le sāvali, faatasi ma mau sii o loo iai. Ona faailoa atu lea o le auala o loo matuā talanoa auiliiliina ai se tasi o mau sii o loo iai i le tusi, Ola e Faavavau. Afai e faaalia e le tagata le naunau, atonu la o le a e manao e ofo i ai le tusi, Ola e Faavavau, ma faia ai ni fuafuaga e faaauau pea le talanoaga i lau asiasiga e sosoo ai.
7 A o tatou tausia pea ma le faamaoni le faasūsūina o laau iti e faaeteete gatā o le faatuatuaga Kerisiano o loo tatou vaavaaia, ae o le a faatupuina e le Atua mo lona lava viiga ma lona mamalu.—1 Kori. 3:7.