Fesoasoani i Tagata Pei ni Mamoe ina ia Atiina aʻe i se Faavae Mausali
1 O le fausiaina o se fale e manaomia ai se ata ua fuafua lelei, ma ni taumafaiga maeaea. Pe a uma ona tusia le ata o le fale, ua ao loa ona tapena le fanua o le a tu ai le fale ma fausia se faavae mausali. E faasolosolo lava ona foliga mai le ata o le galuega seia oo ina uma. E faapea foi la le tatau ona tatou fesoasoani i ē pei ni mamoe ina ia latou aʻoaʻoina faasolosolo le upu moni. Ia tatou taumafai e faagaee le fiafia i le uluai asiasiga. A uma lena, ona tatou toe asia lea ma faataatia se faavae e ala i le aʻoaʻoina o upu moni faavae e uiga i le Atua ma lana fuafuaga mo tagata.—Luka 6:48.
2 A o leʻi faataatiaina le faavae, e manaomia ona tatou sauniunia le nofoaga o le a tū ai le fale, o lona uiga, ia manatunatu i tulaga o lē ona le fale. O le ā le mataupu sa muai talanoaina? O ā mau na faaaogā? O le ā le tali mai? O le ā le lomiga na tuu? Pe a toe foi atu i ai, ia mafaufau lelei i ni manatu patino, ma ia fafau aʻe i manatu na muai talanoaina. O asiga taitasi uma, o le a tuputupu aʻe ai le poto o lē ona le fale, ma faateleina ai lona faatuatua i le Atua.
3 Afai sa tuu ai le “Ola e Faavavau,” e te faapea atu:
◼ “Ua ou fiafia e maua mai oe i le fale. Ai o e manatua le ta talanoaga talu ai, sa ta talanoa ai i le tau mou atu o le fiafia o tagata i lo tatou vaiaai nei i le Atua. Ua manino mai i le Tusi Paia e faapea, e naunau fiafia le Atua i tagata, ma o le a faamanuiaina tagata amiotonu i lona Malo. [Faitau le Mataio 6:9, 10.] O le Malo lenei o le a maua ai le amiotonu ma le faamasinotonu.” Faitau le Isaia 11:3-5, ona tatai lea o manatu o lē ona le fale i uluai palakalafa e lua o le mataupu 1 o le tusi Ola e Faavavau. Ia faataitai le auala e suesueina ai le mataupu.
4 Afai sa tuu le sāvali o le Lalolagi Fou Filemu i le uluai asiasiga, e mafai la ona autalu manatu autū na muai talanoaina e uiga i le manaoga mo ni tulaga e sili ona lelei, ma folafolaga a le Tusi Paia. Ia faamamafa le manatu e faapea, ina ia ola i se lalolagi fou, e ao ona goto i o tatou loto le poto saʻo. Faitau le Ioane 17:3. Ia faamatala e faapea, pe a goto i o tatou loto lea poto, e tatau la ona tatou faia le finagalo o le Atua. Faitau le 1 Ioane 2:17. Tatai manatu o lē ona le fale i manatu patino i le itulau e 5 o le sāvali.
5 Afai o le mataupu i le olaga faaleaiga lea sa faamatilatila i lau uluai asiasiga ina ua tuuina atu i ai le tusi o le “Ola e Faavavau,” e te ono faapea atu:
◼ “I laʻu asiasiga na faatoʻā mavae atu, na ta talanoaina ai le mataupu o le olaga faaleaiga. Sa ta ioe i le manatu e faapea, ina ia maua se olaga fiafia faaleaiga, e tatau ona usitaia taiala o loo i le Tusi Paia. O le ā sou manatu i le mea e manaomia ina ia manuia ai se faaipoipoga?” Faataga mo se tali mai. Ia faamatilatila manatu patino i faamatalaga o loo otooto mai i le itulau e 243-246 i le tusi Ola e Faavavau. Ia fesiligia ni manatu o lē ona le fale e uiga i ata, ma talatalanoa ai i ni manatu sa e filifilia pe a talafeagai. Ia faamamafa atu le aogā tāua o mataupu silisili o le Tusi Paia.
6 Afai sa tuu ai le sāvali o le Olioli i le Olaga Faaleaiga, ona autalu lea o mataupu silisili autū faale-Tusi Paia na e i itulau e 4 ma le 5. Afai ua iai se naunau, ia ofo i ai le tusi o le Ola e Faavavau. Ia faasino i le mataupu e 29, “Faia o Le Olaga i Le Aiga ia Manuia,” ma faaali i ai le auala e mafai ona talanoaina ai lenei mataupu ma lē ona le fale ma lona aiga.
7 E ao ia i tatou uma lava ona auai e lē aunoa i le faia o toe asiga. Ia toe foi atu e asi ē uma na faaalia le naunau, e ala i le faia o ni toe asiga uigā ia Setema.