Tautala atu Pea i Mea ua E Vaai ma Faalogo i Ai
1 E ui lava ina faamataʻuina i sasa ma faafalepuipui, ae na taʻu atu e aposetolo i ē na tetee ia i laua: “Ma te le mafaia ona le tautala i mea ua ma vaai i ai ma faalogo i ai.” (Galu. 4:20) Sa la talisapaia le tāua o galuega ma aʻoaʻoga a Iesu.
2 Ua faapena foi ona tāua le tala lelei e uiga ia Iesu ma lona Malo i tagata i aso nei e pei ona sa iai i lena vaitaimi. O lea la, e ao ai ona tatou puea so o se avanoa e tautala atu ai e uiga i mea ua tatou vaai ma faalogo i ai mai le Afioga a le Atua. E masani lava ona iai tagata i se tulaga lelei o o latou mafaufau pe a talanoa atu i ai e uiga i mataupu faalelotu i le vaitaimi o malōlōga, ma e tatalaina ai e lenei mea ni avanoa faaopoopo e molimau atu ai.
3 Talavou e, ia Talanoa atu i le Aʻoga: E toatele Molimau talavou latou te faaaogā avanoa e molimau atu ai i uō i le aʻoga ma faiaʻoga. O se Molimau talavou o lē sa taumafai pea e mataala mo ni mataupu fou mo talanoaga e talanoa atu ai i uō i le vasega, sa ia faaaogā se mea na tupu i le aʻoga ma faalatalata atu ai i faiaʻoga ma aumea i le vasega ma se lomiga fetaui lelei. O le iʻuga? Na ia tufaina atu ai tusi e 35 i le aso e tasi! Talu ai o le a tele mafaufau e liliu atu ia Iesu Keriso ma mafaufauga i le filemu i lenei vaitaimi o le tausaga, pe e lē o se taimi lelei ea lenei e faailoa atu ai i uō i le vasega ma faiaʻoga po ua faapefea ia Iesu i le avea o se Tupu ua pule nei ona foia faafitauli i le lalolagi?—Faatusatusa i le Luka 2:14.
4 Afai o lou faamamao mai le auai i tu faalelotu e fesootai ma le Kirisimasi ua avea o se mataupu faigata, atonu e mafai ona e faapea atu:
◼ “Ou te lē auai i faigaai e faamanatu ai le Kirisimasi, ona o na faamanatuga e lē faamamaluina ai Iesu, le auala e tasi mo lo tatou faaolataga, ma ua na o ia foi o le a na aumaia se iʻuga i taua ma faafitauli i le faailoga lanu. [Ia oto atu pe faitau le Galuega 4:12.] E lē o toe avea nei Iesu ma pepe ae ua avea o se Tupu o loo pule. O lenei tusi, E Mafai ona E Ola e Faavavau i Parataiso i Le Lalolagi o loo talanoaina ai aʻoaʻoga uma lava ma vavega a Iesu ma faaalia ai foi le auala na te faaiʻua ai puapuaga o tagata.” Ona faaali loa lea i ai o le ata o i le itulau e 119 ma faitau le palakalafa e 18. Ia faasino i ai nisi manatu e te lagona o le a fiafia i ai le tagata. Afai e lava le naunau o le a faaalia, ona faamatala lea i ai o le auala e mafai ona ia maua ai se tusi.
5 Talanoa i Uō i le Galuega: Ua mafai e nisi uso ona tufa le tele o tusi Ola e Faavavau i le na o le tuu o se tusi i luga o se laulau po o se kesi. O ona foliga faatosina ma le igoa o le tusi lava ia ua lagā ai ni fesili. Atonu pe na o lou fesili atu lava i se uō i le galuega: “Faamata o le ā sou manatu, o ā mea o faia e Iesu i le taimi nei?” Ona faaopoopo atu lea: “O le tusi lenei, o loo iloiloina auiliili ai le soifuaga atoa o Iesu, o loo talanoaina ai lauga uma na ia faia, le taliina o fesili na fesiligia e le toatele e uiga i ana vavega, ma isi lava auiliiliga o loo e naunau i ai. O se aotelega atoatoa lea o mea o loo aʻoaʻoina e le Tusi Paia e uiga ia Iesu, ma faamaonia ai e aunoa ma se fesili, o Iesu Keriso, ua pule nei o se tupu i le lagi, ma ua toeitiiti ona faasalafa mai lea o lana pule ina ia faaaofia ai ma lenei lalolagi.” Ona faasino loa lea i le mataupu e 6 i le itulau e 57 o le tusi Ola e Faavavau.
6 E ono tulai mai foi ni avanoa faapena e molimau atu ai i tuaoi po o aiga lē talitonu. Ia tatalo ina ia avatu e Ieova ia te oe le loto tele ma le tomai e tautala atu ai i le taimi tatau. (Galu. 4:29, 31) O mea o le a tatou fai atu ai e uiga ia Iesu, o le a faamafanafanaina ai loto o tagata mafaufau o ē o loo naunau moni i le amiotonu. O le ā se isi mea lelei e mafai ona tatou faia na i lo o le fesoasoani atu i se uō i le aʻoga, se uō i le galuega, tuaoi, po o aiga ina ia ui i le ala i le ola e faavavau?—Ioane 14:6.