Faagaee Isi e Vaai atu ma le Naunautai ia Iesu
1 O le The Greatest Man Who Ever Lived o se tusi e tutasi. O ona mataupu e 133 ua mafai ona faagaee ai le au faitau ina ia vaavaai atu ma le naunautai ia Iesu, ma uunaia ai i latou e faataʻitaʻi i lana faaaʻoaʻoga. Ua faamatalaina ai ma le manino e faapea pe a tuufaatasia tupu uma lava o ē na pule, e lē mafai ona taaʻina ai le olaga o tagata i lenei lalolagi i se auala e sili atu ona malosi e pei ona sa faia e Iesu. O i latou o ē vaavaai atu ma le naunautai ia Iesu e mautinoa lava o le a latou maua ni aogā.
2 Na aʻoaʻo e Iesu ona soʻo e uiga i lona Tamā ma faia ni faaaʻoaʻoga na faaatagia ai uiga tautele o le Atua. Pe a tatou manatunatu i le tomai sili o Iesu i le avea o se faiaʻoga, e faagaeetia ai o tatou loto i lana taʻitaʻiga lē fefe, ma lona alofa mutimuti vale. Pe a tatou mafaufau i ona puapuaga a o ia foaiina atu lona soifua e togiola ai i tatou, e faagaeetia ai i tatou e talisapaia! E mafai e le tusi The Greatest Man Who Ever Lived ona fesoasoani i tagata e vaavaai atu ia Iesu i lenei auala.
3 Sauniuni Maeʻaeʻa: Ia sauniuni lelei e amataina se talanoaga faale-Tusi Paia e faagaeetia ai isi e vaavaai atu ma le naunautai ia Iesu. Pe a outou feiloai ia i latou o ē tautala i le gagana Peretania, ofo i ai le tusi o le Greatest Man, ma o i latou o ē tautala i le gagana Samoa, ofo i ai le tusi o le Ola e Faavavau. Ia taumafai e faagaee le naunau ma uunaia tagata ina ia faitau le tusi. Atonu e sili atu i le tasi se talanoaga e faia ma se tagata, ina ia faataunuu ai lea itu. Afai e lē faaalia se naunau tele, e mafai ona tatou tuu ai se sāvali pe atonu o se polosiua po o se mekasini.
4 O a tatou talanoaga i lea fale ma lea fale ia Tesema, o le a faaautū ia Iesu ma faalaeiauina ai tagata ina ia iloa lelei o ia. E ala i le faatomuaina o manatu o loo faaalia i le mataupu e 6 o le tusi Ola e Faavavau, o le a mafai ai ona tatou fesoasoani i tagata e vaavaai atu ia Iesu, e lē na o se tagata o talafaasolopito, ae o le Alo o le Atua ma o le Tupu o loo pule, o le malo lea o le a na foia faafitauli uma o tagata.
5 E pei ona faamamafaina i La Tatou Faiva o le Malo i le masina ua mavae, tatou te mananao e faaaogā ma le atamai a tatou lomiga. E mafai faapefea ona tatou iloa pe naunau moni se tagata? Afai e faalogologo lelei se tagata, e faia ni fesili, pe uaʻi totoʻa mai foi i mea o tatou faitauina mai le Tusi Paia, atonu o se faailoga lena o le naunau faamaoni. I nisi taimi, atonu e faaalia ai e lē ona le fale le talisapaia mo a tatou asiasiga ma taʻua ai faapea e fiafia o ia e faitau a tatou lomiga. Afai tatou te faailoa atu i ai le tusi ma ua ia iloiloina pe fesili mai foi pe mafai ona ia maua se tusi, o le faaalia lena o le naunau moni. Ae afai e lē o faaalia sea naunau, e mafai ona tatou tuua ai se sāvali, ma faatulai se fesili e mafai ona talanoaina i se taimi o i luma, ma fuafua le faia o se toe asiga. Pe a toe foi atu, atonu o le a mafai ona tatou iloa lelei ai le tele o lona naunau ua iai.—Tagai i La Tatou Faiva o le Malo, o Me 1990, itula 7.
6 O se tasi tagata sa lē masani ona fiafia e faitau tusi, na faaalia lona talisapaia o le tusi Greatest Man, i le faapea mai na avea ai le faitau o se mea fiafia i le faaiʻuga o le aso. Seʻi o tatou fesoasoani atu i isi ia iai lena foi lagona, i le faia o taumafaiga uma e faagaeetia ai i latou ia vaavaai atu ma le naunautai ia Iesu e ala i le faitauina ma le naunau moni o le tusi The Greatest Man Who Ever Lived i le gagana Peretania po o le tusi Ola e Faavavau i le gagana Samoa.