Valaaulia Isi ia Mulimuli i a Iesu Keriso
1 E pei ona faamauina i le Mataio 5:14, na taʻu atu ai e Iesu i ona soo e faapea: “O outou, o le malamalama o le lalolagi outou.” Sa tatau i soo o Iesu ona taʻu atu i tagata i so o se mea e uiga i le Malo o Ieova ma Lana sauniuniga alofa mo le faaolataga e ala i a Iesu. A o teu i le mafaufau lena tofiga, o le a tatou vaavaai atu ai i luma i le ofoina o le tusi o Laʻu Tusi o Tala o Le Tusi Paia i le masina o Tesema. O nisi nei o fautuaga atonu e te manao e faaaogā.
2 Pe a uma ona faailoa atu oe, atonu o le a e faapea atu i au lava upu faamatalaga nei o loo mulimuli mai:
◼ “E toatele o loo tau mānatu po o le a mafai faapefea ona latou faamatala atu i ā latou fanau i se auala faigofie le tele o tala matagofie o loo i le Tusi Paia. O lenei tusi matagofie, o Laʻu Tusi o Tala o Le Tusi Paia, o loo faamatalaina ai tala autū o loo maua i le Afioga a le Atua, le Tusi Paia. Ina ua uma ona faitau i ai, ua lagona e nisi, e pei lava ua latou maua se malamalamaga e sili atu ona manino o le feau atoa lea o loo aumaia i le Tusi Paia.” Pe a uma ona faaalia nisi o ata matagofie i le tusi, suʻe i le faatomuaga ma faitau le palakalafa e lua. Afai e tali lelei mai, ofo loa le tusi.
3 Pe e te faapea atu foi:
◼ “I lenei vaitaimi o le Kirisimasi, o loo mafaufau ai tagata e uiga i a Iesu. Ae peitai, ona o le tele naunau o mea leaga o loo tutupu i le lalolagi aoao, ua tau mānatu ai nisi po o manatu moni mai Iesu i a i tatou. O le ā sou lagona e uiga i lena mea?” Faatali mo se tali. Suʻe i le tala e 101 o le tusi Tala o Le Tusi Paia, ma talanoa puupuu i le mafuaaga na afio mai ai Iesu i le lalolagi. Ona faitau lea o le Ioane 15:13, faamamafa le ootia o le loto o Iesu i le alofa mo isi. Manatua, ia iai ni mekasini fou, se polosiua, po o se sāvali talafeagai e ofo pe afai e lē talia le tusi.
4 O se isi fautuaga lenei:
◼ “O le toatele o tagata talavou, o loo vaavaai mo ni faaaoaoga lelei e faataitai i ai, ae ua faigata lava ona maua ni tagata lelei e fai ma faaaʻoaʻo e mulimuli ai. Na faataatia e Iesu Keriso le faaaoaoga lelei atoatoa mo tagata uma. [Faitau le 1 Peteru 2:21.] O lona soifuaga atoa sa faaautū i le tapuaiga i lona Tamā faalelagi. O le ā sou manatu, o le a faapeī le tulaga pe afai e toatele ni tagata e taumafai e faataitai i a te ia?” Faatali mo se tali. Faasino i le palakalafa mulimuli o le Tala e 96, lena o loo faamatala ai ona uiga faapitoa. Ia faamatala po ua faapefea i le tusi o Tala o Le Tusi Paia ona fesoasoani i a i tatou uma ina ia avea o ni Kerisiano e sili atu ona lelei.
5 Atonu e te manao e faaaogā se faaupuga faapenei:
◼ “Pe a taʻua e se tasi Iesu Keriso, e toatele e manatu i a te ia o se pepe, ia po o se tagata puapuagatia ua toeitiiti lava maliu. E na o le pau lava le mea o i ō latou mafaufau e uiga i a Iesu, o lona fanau mai ma lona maliu. Ae o le ā o loo faia e Iesu i le taimi nei, ma o le ā foi o le a ia faia mo tagata i le lumanai lata mai?” Suʻe i le Tala e 114 ma le 115 o le tusi Tala o Le Tusi Paia, ma faitau le Faaaliga 21:3, 4. Ia faamatala le auala e mafai ai ona maua le tusi ma ia faaaogā mo suesuega totino.
6 Ia mautinoa ua tausia se faamaumauga o ē loto naunau ma ni lomiga na tuu ina ia mafai ai ona e tuliloa e ala i lou faia o toe asiga. A o totoe pea le taimi, seʻi ō tatou maelega i le sailia o tagata loto faamaoni, ma fesoasoani i a i latou ina ia avea ma soo o lo tatou Faaola, o Iesu Keriso.—Mata. 16:24.