Se Faaeaga Lelei o le Auaunaga
1 Na faapea mai se tasi tagata faitau, e tele mea tāua moni na ia aʻoaʻoina e ala i lona faitauina o Le Olomatamata ma le Awake! na i lo o mea na ia aʻoaʻoina i le ono tausaga na aʻoga ai i le iunivesite. E lē o se mea fou i tagata faitau loto faamaoni ona faia na faaupuga faamafanafana loto o le talisapaia, ina ua uma ona faitau i nei mekasini mo sina taimi puupuu. Maeu so tatou faaeaga i le tufa atu e lē aunoa o a tatou mekasini i ē e tāua moni ia i latou!
2 E toatele tagata, e ui lava ina naunau i le upu moni, ae e lē o agaʻi lava i luma i se tulaga e mananao ai e faia se suesuega faale-Tusi Paia. Ae e mafai ona atiina aʻe lo latou naunau ona o le toe asiasi atu e lē aunoa o se tasi, ma lomiga fou taitasi o Le Olomatamata ma le Awake! Ioe, o le faamaoni i le faaooina atu o mekasini i se ālā mekasini ua fesoasoani e uunaia tagata ina ia mulimuli ane ioe e faia se suesuega faale-Tusi Paia e lē aunoa.
3 E aogā patino mo i tatou le faia o se ālā mekasini pe afai tatou te faitauina muamua mekasini ma mātau manatu patino na o le a naunau faapitoa i ai tagata taitoatasi o loo i la tatou lisi.
4 Ia manatua o le tele o le naunau o lē ona le fale, e fuafua i ai lou faapipii atu o lona igoa i lau lisi o ālā mekasini, ae e lē o le telē o lana foai tauofo. Afai e faaalia e se tagata le naunau moni pe a talia mekasini, e mafai ona e faamatala atu i ai faapea e iai mataupu matilatila, na e taʻi lua vaiaso ma aumaia i a tatou mekasini ma o le a e fiafia e faaooina atu ia i latou. Ia mautinoa lou tuliloaina i se faavae faifai pea, i le faaaogā lea o avanoa e talanoa ai ma lē ona le fale i mataupu faale-Tusi Paia. Matou te iloa o le a e olioli i lenei faaeaga lelei o le auaunaga.