Ia Faaaogā ma le Atamai Mea Faigaluega e Sili ona Tāua
1 A o e molimau atu mai lea fale i lea fale, e tatau ona avea ma ou sini, lou faaaafia o tagata taitasi o ē ona fale i se talanoaga faale-Tusi Paia e atiina aʻe ai, e ala i le faaaogā o le Tusi Paia ma isi mea faigaluega sili ona tāua. (Faatusatusa i le 2 Korinito 6:1; 2 Timoteo 2:15.) O ā mea o popole i ai tagata i lau oganuu i nei aso? Po o popole i latou i le tulaga tau tamaoaiga, ma le paʻū maulalo o uiga o le olaga faaleaiga? O ni nai faamatalaga tomua i nisi o nei mataupu, atonu o le a taʻitaʻiina atu ai i se talanoaga lelei faale-Tusi Paia.
2 E mafai ona e faapea atu:
◼ “I nei taimi o luʻi, ua iloa ai e le toatele o tagata le faigata ona faafetauia itu eseese. E te manatu ea o le a mafai e pulega faaletagata ona foia o tatou faafitauli tau tupe i se auala tutusa mo tagata uma? [Faalogo i se tali.] Ua ou iloa e aʻu lava le matuā faalaeiauina ai i lenei manatu . . . ”
3 Ia ona e faitauina lea o le Salamo 72:12-14 ma faaauau le talanoaga i le filifilia o se mau faaopoopo mai mau na o loo maua i le itulau e 154-155 o le tusi Reasoning. Po o le uma ona faitau o se mau se tasi, e mafai ona e faasino atu i se palakalafa i le sāvali Olaga i se Lalolagi Fou Filemu. E toatele tagata talaʻi—e aofia ai ma le au talavou—ua taulau manuia i le amataina o suesuega faale-Tusi Paia i se tasi o sāvali e ala i le faitauina o se palakalafa ma fai atu se fesili i lē ona le fale mo sona manatu i le mau na faitauina.
4 I nisi nuu atonu o le a e manao e faaaogā ai lenei faafeiloaiga:
◼ “E toatele tagata o loo mananao e vaai atu ua toe foi i tu tāua faaleaiga. E te ioe mai ea e tatau ona tuu atu le pule i le tagata lava ia e filifili ai po o ā mea e ao ona tāua, po o le mea e ao ona tasi le tulaga mo tagata uma lava? [Faatali mo se tali.] E ioe le toatele faapea, afai e mulimuli i fautuaga atamai a le Tusi Paia, o le a iai se faailoga o le faaleleia i tulaga o le olaga faaleaiga.”
5 E tusa ai ma lenei manatu, e mafai ona e faailoa atu ma talanoa i le faamatalaga a le aposetolo i le Kolose 3:12-14 po o le taumafai e amata se suesuega faale-Tusi Paia i le aiga i le uluai asiasiga e faaaogā ai manatu o loo i lalo o le tamai ulutala “O lē Fea Auala e Manuia?” i le sāvali Olioli i le Olaga Faaleaiga.
6 Afai e faaalia e lē ona le fale le naunau, faailoa ia te ia le tāua o se tasi o tusi faavaamalō e 192 itulau a le Sosaiete lena o loo outou faatomuaina i lenei masina. Afai e te lē o mautinoa po o le ā le tele o lona naunau, ia faaaogā ma le atamai isi mea faigaluega tāua e ala i le faailoa atu i ai o se manatu tāua mai se sāvali, se mekasini, po o se polosiua.
7 Afai e mafai ona e amataina se suesuega i le uluai asiasiga, ia faia ni fuafuaga maʻoti ina ia faaauau le talanoaga i se isi aso lata mai. E mafai ona e faataatia le faavae mo se isi au asiasiga e ala i le taʻu atu i lē ona le fale faapea, a e toe foi atu e te manao e te lua fetufaʻi i le tali i le fesili lea e masani ona fesiligia e tagata: “Pe aiseā ua faataga ai e le Atua mafatiaga?” O le a fautuaina i le mataupu o loo i lalo po o le a faapefea ona talanoaina le mataupu pe a e toe foi atu.