Faaaogā Sāvali e Faatomua ai Tusi o le Greatest Man ma le Olaga Faaleaiga
1 I le masina o Iuni, e toatele tagata talaʻi o le a faaaogāina sāvali ina ia faagaee ai le naunau i se tasi o nei tusi o le Greatest Man Who Ever Lived po o le tusi faa-Samoa o le Olaga Faaleaiga. O lenei manatu e fesoasoani lea ia i latou ina ia faamautinoa ai po o le ā le tele o le naunau o loo faaalia ma filifili ai pe talafeagai ona ofo atu le tusi i lē ona le fale i le uluai asiasiga.
2 Po o le a Faasaoina ea Lenei Lalolagi? E tele se fesoasoani a sāvali i le amataina o talanoaga. E fesoasoani e puʻe ai le uaʻi mai o tagata e ona fale auā ua iai i sāvali ni mataupu uigā e aafia totino ai i latou.
Mo se faaaʻoaʻoga, e mafai ona e faapea atu:
◼ “I le talanoa atu i tagata, ua matou mātauina ai o le toatele lava latou te taʻua lo latou manatu mamafa i le . . . [filifili se mea na tupu talu ai nei na taʻua i talafou]. E foliga mai ua agaʻi atu tulaga o le lalolagi mai le leaga i le sili atu ona leaga. Ua oo foi ina tau mānatu isi pe mafai ona faasaoina lenei lalolagi. O le ā sou manatu i lena mea? [Faataga se tali mai a lē ona le fale. O le tele o tagata e faamoemoe i se tulaga lelei.] Sa ou faitauina se faamatalaga faalaeiau ou te manao e tufa atu ia te oe. O loo iai i lenei sāvali. [Tuu atu i lē ona le fale le sāvali Po o le a Faasaoina ea Lenei Lalolagi? ae o loo e uuina se isi foi sāvali faapea.] Seʻi mātau le auala na valoia ai e Iesu lena mea . . . ” Ia faitau le palakalafa e 4 po o le 5 lea e sootaga lelei ma le mea na tupu talu ai nei o loo taʻua i lau faatomuaga. Afai e naunau moni le tagata, atonu o le a e filifili loa e faaali atu i ai le tusi o le Greatest Man po o le tusi o le Olaga Faaleaiga, pe afai e lē tautala i le gagana faa-Peretania le tagata. Afai e talafeagai, ia suʻe atu i faamatalaga faaopoopo i le valoaga a Iesu lea e faamatilatila i le mataupu e 111. A o e leʻi tuumuli, atonu e mafai ona e faamatala puupuu atu i ai le faatulagaga atoa o la tatou galuega i le lalolagi aoao ma faamatala i ai le auala o loo lagolagoina ai. Ia mautinoa foi le fai atu i ai o se fesili e uiga i le mataupu, ina ia talatalanoa i ai pe a e toe foi atu.
3 Olaga i se Lalolagi Fou Filemu: O le ā le uiga ia te oe o le ola i se lalolagi fou filemu? E masani ona mafaufau tagata i ni vaaiga matagofie o ni vaitafe tetele ma ni vanu lafulemu, ma manu matagofie o loo ola faatasi ma fifilemu. O ē o loo mafatia i tulaga o le lalolagi i aso nei o le a matuā faafouina i le iloa o le faamoemoe mo se lalolagi fou filemu.
4 Po o e sauniuni ea e ofoina atu se mea matagofie i ou tuaoi, i ē tou te faigaluega, ma i latou tou te feiloai mai lea fale i lea fale?
I le faaaogāina o le sāvali “Olaga i se Lalolagi Fou Filemu,” e mafai ona e faapea atu:
◼ “Pe e te manatu ea o le a mafai e tagata ona ola filemu e pei ona faaali mai i le faavaa o lenei sāvali? [Faataga lē ona le fale e tali mai.] Faamolemole, tagai ane i le fuaiupu mulimuli i le uluai palakalafa i le itulau e 2. O loo fesili mai e faapea: ‘Peitai pe na o se miti ea, e talitonu ai faapea o nei tulaga o le a lē taitai ona iai i le lalolagi?’ [Ona faitau lea o le palakalafa o sosoo ai i le sāvali.] O lena faamatalaga e uiga i le lagi fou ma le lalolagi fou, ua taʻua i le Tusi Paia i le 2 Peteru 3:13. Afai e mafai ona e faaaogā maia lau Tusi Paia, e mafai ona ta faitauina le Salamo 104:5 ina ia aʻoaʻoina atili ai i le lumanai o le lalolagi.” Po o lou faitauina foi o le fuaiupu i lau Tusi Paia. Afai e faaalia e le tagata le naunau, ia tataʻi atu le talanoaga i le tusi o le Greatest Man i le mataupu e 133, po o le tusi o le Olaga Faaleaiga i palakalafa e 5 ma le 6, i le itulau e 183.
5 O le a manaomia nisi toe asiga ina ia ‘faasūsūina’ ai le fatu lea ua totō. (1 Kori. 3:6, 7) Ua fautuaina i le mataupu o loo i lalo le auala e ono amataina ai se suesuega i le tusi o le Greatest Man, a lē i le uluai asiasiga po o i lau toe asiasi atu.