Faaalia le Talisapaia mo le Togiola
1 O le faanaunauga e faaalia le talisapaia mo se uō po o se tasi o le aiga ua maliu, o se mea masani i aganuu uma lava. O lenei faanaunauga, e mafai ona sili ona malosi ae maise lava pe afai o lē pele ua maliu na faapogaia ona o le laveaiina o ola o isi. O i latou uma o ē o loo faamoemoe i le ola e faavavau, ua iai mafuaaga e sili ona malolosi e faaalia ai le talisapaia mo le togiola e ala i le auai i le Faamanatuga o le maliu o Keriso ia Aperila 6.—2 Kori. 5:14; 1 Ioane 2:2.
2 Ia Talisapaia le Alofa o Ieova: Maeu le fetaui o le faaalia o lo tatou talisapaia loloto mo Lē Sili ua tatou maua mai ai mea lelei, o Ieova le Atua, o lē na saunia le togiola! (1 Ioane 4:9, 10) Ua faaalia le loloto o le alofa o Ieova e ala i le meaalofa tutasi na ia saunia e fai ma togiola mo i tatou, ua lē na o se tasi o le faitau miliona o agelu faamaoni, ae o lona lava Alo pele e toatasi. (Faata. 8:22, 30) Ua faamanatu mai ia i tatou e lenei Alo o lē sili lona silafia lelei o Ieova, o Iesu Keriso, e faapea: “Ua faapea lava ona alofa [tele] mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.”—Ioane 3:16.
3 Talisapaia le Alofa o Iesu Keriso: E faapena foi ona tatau lo tatou matuā faaalia o le talisapaia mo Iesu Keriso, o lē na tuuina atu lona ola o se togiola mo le toatele. (Mata. 20:28) Ua faaalia lona alofa i lona lotomalie e gauai atu i le finagalo o Ieova mo ia e tusa ai ma le togiola. Seʻi manatu i lona tuua o lona tulaga matagofie sa iai faatasi ma lona Tamā ma le manomanō o agelu amiotonu, ina ia fai ma togiola mo i tatou. Sa leʻi faavaivaia o ia i le luʻi o le soifua faatasi ma tagata agasala, po o le nofo i lalo o a latou pulega, po o le saunia foi o le togiola o le a oo ai i lona maliu. Na i lo o lea, sa “uiga o ia faatasi ma le pologa, ina ua faia o ia faapei o se tagata.” E lē gata i lea, “ua faamaulalo e ia ia te ia, ua na anaana ua oo ina maliu, o le maliu lea i le satauro.”—Fili. 2:5-8.
4 E Faapefea ona Tatou Faaalia le Talisapaia mo le Togiola?: O lo tatou talisapaia o le togiola, e tatau ona sili atu na i lo na o sina faafetai. E manaomia ona tatou aʻoaʻo e uiga i le sauniuniga a le Atua mo le faaolataga e ala ia Iesu Keriso. (Ioane 17:3) Ona tatau ai lea ona faaalia lo tatou faatuatua i le togiola. (Galu. 3:19) I le isi itu, e tatau ona uunaia i tatou e o tatou loto ina ia tatou avatua ia Ieova le Atua e ala i le tuuina atu ma papatisoina. (Mata. 16:24) A o tatou ola ai e tusa ma lo tatou tuuina atu, e ao ona tatou faaaogā so o se avanoa e taʻu atu ai i isi le sauniuniga ofoofogia o le togiola mo le faaolataga.—Roma 10:10.
5 E lē faigata nauā e tusa ai ma tomai o i tatou taitoatasi ona ausia nei mea manaomia. Ua faamautinoa mai e le Mika 6:8 ia i tatou faapea: “Se a foi se mea e finagalo ai Ieova ia te oe, pe a le o ia mea, ia fai le amiotonu [“faamasinoga tonu,” NW], ia naunau i le alofa, ma ia feooai ma lou Atua ma le loto faamaulalo?” Sa faapena foi ona fai atu Tavita ia Ieova: “Auā mai ia te oe mea uma lava; o au mea foi ua matou foaiina atu ai ia te oe.”—1 No. 29:14.
6 Ina ia tatou matuā talisapaiaina le sauniuniga ofoofogia a Ieova, aiseā e lē faitau ai ma talanoaina e le aiga atoa le mataupu e 112 e oo i le 126 o le tusi Greatest Man a o leʻi oo i le aso o le Faamanatuga? I lenei auala, o le a mafai ai e i tatou uma ona sauniuni o tatou lava mafaufau ina ia talisapaia le togiola i le faamanatuina o le Faamanatuga lea o le a faia ia Aperila 6, 1993.