Fesoasoani i Tagata Aʻoga o le Tusi Paia e Sauniuni mo a Latou Suesuega
1 O tagata aʻoga o le Tusi Paia e sauniuni mo a latou suesuega i vaiaso taitasi, latou te faaalia se naunau moni i le suesuega, ma e masani lava ona vave lo latou agaigai i luma faaleagaga na i lo o i latou e lē sauniuni. I nisi taimi, atonu e lē sauniuni ai se tagata aʻoga ona e na te lē iloa pe faapefea ona sauniuni. Atonu la e manaomia ona aʻoaʻoina o ia i le auala e suesue ma sauniuni ai. E mafai faapefea ona faia lea tulaga?
2 Mai lava i le amataga, ia faaalu sina taimi e faamautinoa ai ua iloa e le tagata aʻoga e faapea, o sauniuniga e aofia ai le suesuega totino. O le toatele o tagata, e ui lava ina mafai ona faitau, ae e leʻi aʻoaʻoina pe faapefea ona suesue. Ua saunia e le suesuega e 7 ma le 8 i le Theocratic Ministry School Guidebook le tele o fautuaga aogā e te ono mafai ona taʻu atu i le tagata aʻoga pe a manaomia.
3 Faailoa i le Tagata Aʻoga le Tāua o le Suesue: Atonu e te faaali atu i le tagata aʻoga lau tusi o le suesuega lea ua uma ona faailoga ma vasevase upu ma fuaitau e faatauaina. Faasino ia te ia le mafai e se tepa vave atu i vaega ua uma ona vase, ma faamanatu ai ia te ia manatu o le a mafai ona ia faamatala mai i ana lava upu. Ona lē tosina ai lea o ia e faitau vaega atoa mai le tusi pe a taliina fesili. O le lelei o le aʻoaʻoga i lena taimi, o le a fesoasoani ia te ia e faia ai ni faaopoopoga uigā i se taimi mulimuli ane i sauniga a le faapotopotoga. O le a atagia mai i ana tali lona talisapaia o le mataupu o loo talanoaina, ma faaalia ai le loloto o lona malamalama.
4 Aʻoaʻo o Ia e Faaaogā le Tusi Paia: E manaomia ona aʻoaʻoina le tagata aʻoga i le sueina o mau o le Tusi Paia o loo aumaia i le mataupu o le suesuega. Afai e mafai ona ia faia ma le saʻo lelei lenei mea, o le a ia matuā talisapaia atoatoa ai le manatu e faapea, o ia moni lava o se tagata aʻoga o le Tusi Paia. E ui i le taimi muamua, atonu sa manaomia ona ia faaaogāina le faasologa o tusi o le Tusi Paia o loo i le itulau i luma, ae peitai, e ao ona faalaeiauina le tagata aʻoga ina ia faamasani i le faasologa o tusi e 66 o le Tusi Paia. Pe afai o le a sueina se mau ma faitau, ia fesoasoani ia te ia ina ia ona iloaina le vaega lena o loo lagolagoina le manatu tāua i le palakalafa o loo talanoaina, ae aua neʻi tosina atu i vaega e lē o fesootai tonu atu i le suesuega o faia.
5 A o agaigai pea i luma le tagata aʻoga, ia faalaeiau ia te ia e faitau le Tusi Paia mai lava i le amataga seia oo i le faaiuga. Faamamafa i ai e faapea, o le Tusi Paia atoa, o le Afioga faagaeeina a le Atua, ma e tatau ona fafagaina ai faaleagaga Kerisiano moni.—Mata. 4:4; 2 Timo. 3:16, 17.
6 Faasino i ai Isi Lomiga Faatiokarate: Pe afai ua matuā lelei le agaigai i luma a le tagata aʻoga, e mafai ona ia amata faaaogāina isi lomiga faatiokarate. Ia faalaeiau ma le faautauta o ia e suʻe faamatalaga faaopoopo i lomiga a le Sosaiete na o le a ia masani lelei i ai, a o ia auai atu i sauniga a le faapotopotoga. Aʻoaʻo ia te ia le auala e faaaogā ai vaega faapitoa o le New World Translation, e pei o le “Bible Words Indexed.” A o amata ona faaputu sana fata tusi faatiokarate, ia faailoa ia te ia pe faapefea ona faaaogā le Comprehensive Concordance, Reasoning From the Scriptures, le Index, ma tusi o le Insight.
7 Afai tatou te aʻoaʻoina tagata aʻoga o le Tusi Paia i le auala latou te sauniuni ai mo a latou suesuega faale-Tusi Paia, o le a tatou faaauupegaina ai la i latou e faaauau pea ona agaigai i luma i le upu moni, ma avea ai i latou o ni tagata aʻoga agavaa o le Tusi Paia, e tusa lava pe ua faaiuina a latou suesuega totino faale-Tusi Paia i aiga.