Pe E te Faaaogāina le Tusi Paia?

¹ O se fitafita tomai e sauni e tau, e matuā lava saunia ma faaauupegaina lelei. O se tufuga poto e sauniuni e fausia se fale telē, na te tapenaina ana meafaigaluega e manaomia, e faauma ai le galuega. O se auauna a Ieova e galue i le faiva i le fanua, o le a ave lana “pelu” ma faaaogāina ma le poto i so o se taimi na te maua ai le avanoa. (Efe. 6:17) Po o moni ea lenei manatu ia te oe lava ia? Pe a e galue i le auaunaga, po o e faaaogā le Afioga a le Atua e pāʻia ai loto o lau au faalogologo e le agaga paia?—Faata. 8:1, 6.

² O le talaʻiga, e lē o se galuega e faigofie i taimi uma. I nisi oganuu, e seāseā iai tagata i aiga, a maua foi ni tagata, e masani lava ona tali mai e pisi, ma e puupuu lava se taimi e faataga mai mo ni talanoaga uumi faale-Tusi Paia. Talu ai o le Tusi Paia o le tatou tusi autū lea, e mafai la faapefea ona tatou faaaogāina soo i le auaunaga ma faaaafia ai le au faalogologo i lana feau faagaeeina?

³ I Avanoa Uma: I so o se fale tatou te ō atu i ai, tau te mananao e faaaogā le Tusi Paia e faagaee ai le tagata o le aiga. E ao ona tatou sauniuni e faia faapea e tusa po o le ā le lomiga tatou te ofo atu i ai. Afai e pisi le tagata ma lē lava se taimi e suʻe ai le Tusi Paia ma faitau se fuaiupu e tasi pe lua, pe mafai ona e sii atu i ai se mau pe otooto i ai na o se fasi fuaitau o le mau a o leʻi ofo atu i ai le lomiga? I lena auala, e mafai ai ona faapogaia le tagata e faatali ma faalogologo.—Epe. 4:12.

⁴ Mo se faaaoaoga, afai o e faatomuaina le mataupu o Le Olomatamata o Novema 15, 1993, e faapea “O le ā le Umi e Mafai ona E Ola Ai?” pe a uma ona e faasino i le ata i le faavaa, ona faatū lea o le fesili, “Pe e te talitonu ea o le a faamutaina faamaʻi, o se taimi o le a olioli ai tagata uma i le soifua maloloina lelei?” E tusa po o le ā le tali mai, ae e mafai ona e faitau saʻo i ai se fuaitau po o se mau mai le Tusi Paia, e pei o le Isaia 33:24 po o le Faaaliga 21:4. O le faia faapea ua e tuu atu ai le Afioga a le Atua e tautala atu.

⁵ I Toe Asiga: E ao ona tatou sauniuni a o leʻi ō atu e faia toe asiga. E ui i lea, e masani lava ona aliai mai mataupu tatou te leʻi sauniuni e talanoaina. O le itu la lenei e faamaonia ai le aogā o la tatou meafaigaluega lea o le Reasoning From the Scriptures. O lo tatou siiina atu pe faitauina ni mau mai le tusi o le Reasoning e lagolagoina ai se manatu, o le a fesoasoani ai i tagata e iloa o i tatou o faifeau a le Atua, ae lē o ni ē o faafilogiaina le Afioga a le Atua.—2 Kori. 2:17.

⁶ Pe a e toe asiasi ia i latou e leai se mataupu patino sa talanoa i ai, atonu o le mea faigofie mo oe, o le suʻe lea o le tusi Reasoning i se mataupu fetaui, e pei o “Iesu Keriso,” “Aso e Gata Ai,” po o le “Toetutu,” ma faaaogā se tasi o tamai ulutala e amata ai le talanoaga. E te ono valaaulia tagata o le aiga e faitau nisi o mau mai a latou lava Tusi Paia. I lena auala, o le a avea ai le Tusi Paia o se mea latou te fiafia i ai ma uigā ia i latou, ona iai lea o le agaga paia o Ieova ia i latou, pe a latou faatatauina ma le tonu na manatu.

⁷ O la tatou avega tauave o le talaʻiina o le tala lelei ma le lapataia o tagata amio leaga, o se galuega e matuā tāua. O le feau lea a Ieova ae lē o i tatou. Ia avea lana Afioga, le pelu o le agaga, o se fesoasoani ia te oe.