Faia i Latou ia Lagona Talileleia i le Faamanatuga
1 I nai tausaga ua tuanai, na o le 1 mai le 3 tagata na auai i le Faamanatuga sa fai ma tagata talaʻi o le tala lelei. E foliga mai o le a moni lea i lenei tausaga. Atonu e auai nisi ona o le faalaeiauga faatauanau a se tauaiga po o sē e masani ai o lē nofo i se isi aai, a o isi atonu sa valaaulia e le au talaʻi o lena vaipanoa. Peitai o isi o ē auai, e ui ua papatiso, ae ua lē o toe tiotio i le faiva. Tatou te talileleia ma le loto faamaoni i latou uma o ē faaalia le faaaloalo mo le faatonuga a Iesu e faapea: “Ia outou faia lenei mea ma faamanatuga ia te au.”—1 Kori. 11:24; Roma 15:7.
2 E ao i le au tautua ua tofia ona mataala e talileleia tagata uma, ae maise sē e fou, a o taunuu mai o ia i le Maota o le Malo. Peitai, e mafai e i tatou uma ona faia se sao i le tausisi i le alofa i le Faamanatuga. (Roma 12:13) E faapefea?
3 I lena afiafi, o le a pisi naua nisi o le au talaʻi i le saunia o auala mo tagata naunau. Atonu e mafai ona vave taunuu isi, ma ia iai e faafeiloaia malo o ē taunuu atu na o i latou. A ulufale mai se tagata ese i le maota, faafeiloai mafana o ia, ma amata se talanoaga. Siligia o ia pe na te silafia se tasi i le faapotopotoga. Afai na te iloa, ia vaai faalelei o ia seia taunuu mai lena tagata. (Faatusatusa i le Luka 10:35.) Afai na te lē iloa totino se tasi, aisea e lē valaaulia ai o ia lua te nonofo faatasi a o faagasolo le sauniga? Faamatala le auala o le a faaaogā ai le uaina ma le areto a o faagasolo le polokalama. Atonu na te manaomia lau fesoasoani i le sueina o mau o loo siiina mai e le failauga.
4 I le faaiuga o le faamanatuina o le Faamanatuga, faailoa atu ia te ia ua e fiafia ina ua sau o ia. Atonu e iai ni ana fesili e faatatau i la tatou galuega e mafai ona e talia. O lou naunau totino atonu e taitaia ai i se talanoaga i se mataupu o le Tusi Paia, a lē i le Maota o le Malo po o se isi nofoaga. Ua amataina ni suesuega e sili ona lelei e uso mataala o ē na iai lenei tausolomua lelei. A o leʻi tuua e ia le Maota o le Malo, faafeiloai atu o ia i isi, ma valaaulia mafana o ia e toe foi mai.
5 Maeu se fiafiaga o le talileleia o o tatou uso ma tuafāfine peleina, o ē sa leʻi auai pea i sauniga pe sa leʻi toe maelega i le faiva mo se taimi umi! Na i lo o le siligia o fesili i le mafuaaga na latou lē auai ai i sauniga, ia tau ina faaali atu lou olioli mo lo latou faatasi mai. Atonu o se mea latou te faalogo i ai a o faagasolo le lauga o le Faamanatuga, o le a uunaia ai i latou e toe fuataiina lo latou faiā tuuina atu ma Ieova. O le talileleia mafana tatou te tuuina atu ma le manatu mamafa moni tatou te faaalia atonu o le a pāʻia ai o latou loto. Ia faailoa atu ia i latou faapea o loo e tulimatai ma le fiafia e toe feiloai ma i latou.—Roma 1:11, 12.
6 O se lauga faapitoa e faaulutalaina “Faamalieina e le Lotu Moni Manaoga o le Sosaiete o Tagata” o le a faia i le tele o faapotopotoga ia Aperila 10. Ia faamautinoa o i latou uma o ē auai i le faamanatuina o le Faamanatuga ua valaaulia ma fesoasoani i ai ia auai. O lo tatou faamoemoega, o i latou e auai i nei sauniga faapitoa o le a lagona le talileleia ma tofo i le agaga mafana o le mafutaga i le lotolotoi o tagata o Ieova.—Sala. 133:1.