Ofo Mekasini e Silisili le Lelei i le Lalolagi
1 O le fuafuaga autū o Le Olomatamata o le “faaeaina lea o Ieova le Atua o le Alii Silisiliese o le vateatea.” O le Awake! o le mekasini lea “mo le faamalamalamaina o le aiga atoa. . . . Ua atiina aʻe e lenei mekasini le mautinoa i le folafolaga a Lē na Foafoaina Mea i se lalolagi fou filemu ma saogalemu.” O nei upu sii e mai lava i mekasini. I le tausisia o nei sini, ua mafai ai ona avea ma puna o faamafanafanaga i le faitau miliona o le au faitau.
2 O le a tatou faatomuaina nei mekasini i la tatou faiva ia Aperila ma Me. Ina ia uigā, e manaomia ona tatou masani lelei ma mea o iai. Ia faitau lomiga taitasi, ma faamau ni manatu tāua atonu e mafai ona e faaaogā pe a e ofoina. Mafaufau i mea o loo manatu mamafa i ai tagata. O ā ni mataupu tau i faafiafiaga, i aiga, po o ni tulaga tau i faalogona, o mamafa i mafaufau o le toatele o ou tuaoi? Taumafai e manatunatu i se mea e mafai ona e taʻu atu e pāʻia ai loto ma faagaee ai se faanaunauga ina ia aʻoaʻoina atili.
3 Faamatilatila Le Olomatamata o Aperila 1: O le toatele o tagata ua leva ona latou momoo i se lalolagi e sili atu, se lalolagi e aunoa ma ni faafitauli e masani ona aveesea ai lo latou olioli.
A maeʻa ona faailoa atu oe, atonu e te ono faapea atu:
◼ “Ou te fiafia tele e faaalia ia te oe se faamatalaga fiafia o loo i totonu o lenei mataupu ua faaulutalaina faapea ‘Se Lalolagi e Sili atu ona Lelei—Pe ua na o se Miti?’ Ua faapea mai: ‘O lenei lalolagi, lo tatou lalolagi, ua mautinoa e lē o se nofoaga lelei. . . . O le faasologa o auē i lenei taimi ua foliga mai ua lē muta.’ Ona o lenei tulaga, ua faafaigata ai ona mautinoa e uiga i le lumanai, pe lē moni ea? Peitai, seʻi ou faaali atu ia te oe le mea o fai mai ai le Salamo 37:11 e uiga i le lumanai.” A uma ona faitau le fuaiupu, ona fesili lea i lē ona le fale po o le ā sona lagona e uiga i lenei folafolaga. Afai e tali fiafia mai le tagata, ona suʻe lea i le mataupu i le itulau e 4, “Se Lalolagi e Sili atu ona Lelei—Ua Lata Mai!” ma faapea atu: “E tele ni mau ua siiina mai e aofia ai le mau lea na faatoʻā uma ona ta faitauina mai le Salamo 37:11. Ou te talitonu o le a e fiafia e faitau nei mataupu ma suʻe faamatalaga o loo aumaia i lau Tusi Paia. Ou te fiafia e tuu nei lomiga ia oe.” Afai e fetaui, taʻu i ai o la tatou galuega o loo lagolagoina i ni foai tauofo ma e te naunau tele e talia sana foai itiiti.
4 Faamatilatila Le Olomatamata o Aperila 15: Ua fesili mai le mataupu i le itulau e 4 e faapea: “O Fea e Mafai ona E Maua ai Taiala Maufaatuatuaina?”
A maeʻa ona faailoa atu oe, e mafai ona e faapea atu:
◼ “Ua tele naunau faafitauli i le lalolagi i aso nei, e pei [taʻu se mea fou o tupu o loo popole ai tagata o le tou vaipanoa po o se tala tomua]. Ua avea lena mea ma pogai tatou te faapea ai pe e iai ea se tasi e mafai ona sao mai i nei faafitauli. Ma le fiafia lava, ua faamautinoa mai ia te i tatou e le 2 Timoteo 3:16, 17 e faapea, o le Tusi Paia o se taiala lea i se olaga fiafia ma saogalemu.” A uma ona faitau ia fuaiupu, faaali i ai le auala e fesoasoani ai Le Olomatamata ia i tatou ina ia malamalama i le pogai ua avea ai le Tusi Paia ma taiala maufaatuatuaina.
5 Afai e te manao e faatomua le Awake!, atonu e te faaaogāina le lomiga o Me 8 ma le mataupu e faapea “Le Faamoemoe Moni mo Tamaiti?” I lena tulaga, o le a e iloaina ai le aafia o mātua i manaoga o tamaiti ma latou fia iloa ai le mea e mafai ona faia e fesoasoani ai ia i latou.
6 Afai tatou te mitamita i a tatou mekasini e silisili le lelei i le lalolagi, tatou te naunau foi la e tuu i isi ina ia mafai ai foi ona latou maua le faamoemoe o le Malo, ma faia se sao i le faaeaina o Ieova o le Alii Silisiliese o le vateatea.—Sala. 83:18.