Pusa Fesili

◼ O le ā le manatu e manaomia ona iai faatatau i mea faigaluega o tatou faaaogaina i le galuega o le molimau atu?

¹ E ui lava o loo iai se taulimaga talafeagai faale-Tusi Paia i le mafaufau, e ono mafai ona lē sauniuni se tagata talaʻi o le tala lelei pe a oo i meafaigaluega o ia faaaogaina. A o iai i le fale, atonu e lē o ia te ia le lomiga mo le ofo o mekasini, polosiua, ma sāvali i lana ato talaʻi, atonu ua maanuminumi po o ua masaesae foi. Atonu ua lē mafai ona ia maua se penitala po o se pepa faamaumau o le galuega mai lea fale i lea fale auā e lē o faamaopoopoina lelei lana ʻato. E tāua le uai ma le faaeteete i au mea faigaluega a o leʻi auai i le auaunaga i le fanua.

² O ā mea e tatau ona iai i se ʻato ua faaauupegaina lelei? E tatau ona iai se Tusi Paia. E aofia ai ma ni pepa faamaumau o le galuega mai lea fale i lea fale. Ia mautinoa ua iai le lomiga lea ua faatomua mo le ofo o le masina. E manaomia foi ni lomiga fou o mekasini, faapea sāvali ma polosiua. Ave se kopi o le tusi Reasoning. O le iai o se kopi fou o La Tatou Faiva o le Malo o le masina, o le a mafai ai ona e autaluina taulimaga ua fautuaina a o leʻi ō atu i le talaʻiga i le fale. Pe a galue i le oganuu e ono feiloai ai ma tagata e tautala i se gagana a se isi atunuu ese, e lelei pe a iai le tamai tusi, Good News for All Nations. O le iai o se kopi o se tasi o ā tatou lomiga ua fuafuaina mo tagata talavou, o le a fesoasoani ia te oe e sauniuni lelei ai e talanoa atu i tagata talavou.

³ O mea uma e faaaogā e tatau ona tuu ma faamaopoopo lelei i lau ʻato. E lē tau tuli ina fou le ʻato, ae e ao ona mamā ma ia iai i se tulaga lelei. O lau ʻato talaʻi, o se vaega lea o au mea faigaluega o loo faaaogā i le folafolaina atu o le tala lelei. Ia tausia i se tulaga lelei.