Faaaogā Sāvali e Faalauiloa Atu ai le Tala Lelei
1. Ua faapefea ona faaaogā e tagata o le Atua sāvali?
1 Ua loa tausaga o faaaogā e tagata o Ieova sāvali faale-Tusi Paia e faalauiloa atu ai le tala lelei. I le 1880, na amata ai ona lomia e C. T. Russell ma ana aumea, sāvali na taʻua o Bible Students’ Tracts, ma sa saunia mo le ʻaufaitau o le Watch Tower ina ia tufatufa atu i tagata lautele. O le tāua tele o sāvali na lesitalaina ai loa e C. T. Russell i le 1884, se faalapotopotoga ua lesitalaina faaletulafono e lē ina ia maua ai ni tupe faasili, ae ina ia faaauilumaina ai manaʻoga o le Malo. Sa aofia ai le upu “tract” (sāvali), i le igoa Zion’s Watch Tower Tract Society, lea ua igoa nei i le Watch Tower Bible and Tract Society of Pennsylvania. E oo ane i le 1918, ua silia i le 300 miliona sāvali na tufatufaina atu e Tagata Aʻoga o le Tusi Paia. O loo avea pea sāvali o ni meafaigaluega aogā e molimau atu ai.
2. Aiseā e aogā ai sāvali?
2 Le Pogai e Aogā Ai: E felanulanuaʻi sāvali ma e matagofie i le vaai. O le feʻau puupuu o loo iai e faagaeeloto ma e aogā. E mafai ona faaosofia ai le naunau o ē atonu na taaʻina o latou mafaufau i se mekasini po o se tusi. E faigofie ona ofo e tagata talaʻi fou ma fanau ia sāvali. E lē gata i lea, e lāiti ma e faigofie ona feaveaʻi.
3. Taʻu mai se mea na tupu e faataʻitaʻi mai ai le tāua o sāvali.
3 E toʻatele na muaʻi aʻoaʻoina le upu moni e ala i se sāvali. Mo se faataʻitaʻiga, na maua e se fafine Haiti se tasi o a tatou sāvali i le auala. Na ia faitauina ma faapea mai, “Ua ou maua le upu moni!” Mulimuli ane, na alu atu o ia i le Maota mo Sauniga, amata sana suʻesuʻega faale-Tusi Paia ma papatisoina. O nei iʻuga e pogai mai i le mana o le Afioga a le Atua sa iai i le sāvali.
4. O le ā lo tatou sini pe afai o sāvali o le ofo o le masina?
4 Mai Lea Fale i Lea Fale: Talu ai o sāvali o ni meafaigaluega aogā e molimau atu ai, o lea la e amata atu iā Novema, e iai taimi o le a avea ai sāvali ma ofo o le masina. O lo tatou sini e lē o le tau ina ofo atu o sāvali, ae ia faaaogā sāvali e amata ai ni talanoaga. Pe a fiafia le tagata i le uluaʻi asiasiga po o le isi asiasiga e sosoo ai, e mafai ona faataʻitaʻi le suʻesuʻega faale-Tusi Paia e faaaogā ai le tusi Aʻoaʻoga Moni a le Tusi Paia po o se isi lomiga. E faapefea ona tatou ofo sāvali mai lea fale i lea fale? E eseese uma sāvali, e manaʻomia la ona tatou faamasani lelei i sāvali o le a ofoina.
5. E faapefea ona tatou ofoina sāvali mai lea fale i lea fale?
5 E tatau ona fetuunaʻi la tatou taulimaga e fua i le oganuu ma le sāvali o loo faaaogā. E mafai ona amata le talanoaga e ala i le tuu atu o le sāvali i lē e ona le fale. E ono faaosofia lona naunau i le matagofie o le faavaa. Pe tatou te faaali atu foʻi sāvali eseese, ona fai lea i le tagata po o lē fea sāvali e fiafia i ai. Pe a talaʻi i oganuu e mumusu tagata e tatala mai faitotoʻa o a latou fale, ia uu i luga le sāvali ia iloa mai e le tagata, pe fai foʻi i ai pe mafai ona tuu atu i lalo o le faitotoʻa se sāvali ae tatou te fia iloa sona manatu. Afai o se fesili le ulutala o le sāvali, ia fesili atu i le tagata e faailoa mai sona manatu. Pe fai atu foʻi se fesili e faaosofia ai lona naunau ma faaauau ai le talanoaga. Ona tatou faitau faatasi lea o se vaega o le sāvali, tilofaʻia fesili i le palakalafa ma valaaulia o ia e faailoa mai sona manatu. E mafai ona faitau mau autū mai i le Tusi Paia. Pe a māeʻa ona iloiloina nisi o manatu, ona faaiʻu lea ma fai se fuafuaga maʻoti e toe foʻi atu e asi. Pe afai e masani ona tuu e le faapotopotoga lomiga i fale e leai ni tagata, ia tuu se sāvali i se mea e lē faigofie ona iloa atu e isi.
6. E faapefea ona faaaogā sāvali i talaʻiga i alatetele?
6 Talaʻiga i Alatetele: Po o e faaaogāina sāvali i talaʻiga i alatetele? O nisi tagata e pāsia i tatou, o loo faanatinati ma e mumusu e tutū e talanoa mai. Atonu e faigatā ona tatou iloa pe e fiafia moni. Nai lo o le tuu atu i ai o mekasini fou pe a lē mautinoa pe faitauina, ia tuu i ai se sāvali. Talu ai e matagofie le faavaa ma e puupuu le feʻau o loo iai, atonu la o le a fia iloa e le tagata ma uunaʻia ai e faitau le sāvali pe a maua sina avanoa. Afai e lē o faanatinati le tagata, e mafai ona tatou talanoaina faatasi nisi vaega o le sāvali.
7. Taʻu mai se mea na tupu e iloa ai le auala e ofo ai sāvali pe a molimau atu lē fuafuaina.
7 Molimau Lē Fuafuaina: E faigofie ona faaaogā sāvali e molimau lē fuafuaina atu ai. E tuu e se tasi o uso ni nai sāvali i le taga o lona ofu pe a alu ese ma le fale. Pe a feiloaʻi i se tasi e pei o se faatau oloa, e na te ofoina i ai se sāvali e faitau. Ina ua malaga atu se ulugalii i le taulaga o Niu Ioka e maimoa i vaaiga mananaia, na la iloa o le a la feiloaʻi i tagata mai i atunuu eseese. O lea, na la ō ma ave le tamaʻitusi Good News For People of All Nations, ma nisi o sāvali i gagana eseese. Pe a la faalogo atu i ni tagata o tautatala i se gagana ese, o faatau ni oloa i le auala pe saofaʻi i o la autafa i se paka po o se faleʻaiga, ona la ofo lea i ai o se sāvali i le gagana a lenā tagata.
8. Aiseā ua faatusaina ai sāvali i ni fatu?
8 “Ia E Lūlū Fatu”: Ua faatusaina sāvali i ni fatu. E faasalalau solo e se faifaatoʻaga fatu, auā e na te lē iloa po o lē fea fatu o le a ola ma fua mai. Ua taʻua i le Failauga 11:6: “Ia e lūlū fatu i le taeao ma aua neʻi mālōlō lou lima seʻia oo i le afiafi; auā e te lē iloa po o lē fea e taulau manuia, a lē o i inei po o i inā, pe tutusa ona lelei o ia mea e lua.” O lea la, tau ina ia faaauau ona tatou ʻfaasalalau solo le poto,’ e ala i le faaaogā o nei meafaigaluega aogā.—Faata. 15:7.
[Faamatalaga faaopoopo i le itulau 3]
Talu ai o sāvali o ni meafaigaluega aogā e molimau atu ai, o lea la e amata atu iā Novema, e iai taimi o le a avea ai sāvali ma ofo o le masina.