E Foai mai e Ieova le Malosi

¹ Ona o tagata o Ieova, ua aumaia ai ia i tatou le tofiga ina ia talaʻi le tala lelei ma ia tausia foi a tatou amio “ia lelei . . . i luma o nuu ese.” (1 Pete. 2:12; Mata. 24:14) I le manatu atu i aso faigata faapea ma o tatou lava vaivaiga ma mea sese tatou te faia, e lē mafai ai ona tatou faataunuu i lo tatou lava malosi lenei galuega. (2 Timo. 3:1-5) Maeu lo tatou fiafia ona e mafai ona tatou vaai atu ia Ieova mo se fesoasoani!

² Na tumau le aposetolo o Paulo i le tele o tofotofoga. (2 Kori. 11:23-27) Na mafai faapefea ona ia faafesagaia ma le manuia nei mea ma faaiuina lana galuega tofia? Na tuuina atu e Ieova ia te ia “le matuā tele o le mana.” (2 Kori. 4:7) Na faailoa mai e Paulo lea fesoasoani tauatua ina ua ia tusi mai e faapea: “Ou te mafaia mea uma lava i le faamalosi mai o Keriso ia te au.” (Fili. 4:13) O le auala foi lena o le a fesoasoani mai ai Ieova ia i tatou. E mafai faapefea ona tatou maua lenei fesoasoani?

³ E Ala i le Tatalo e Le Aunoa: Na uunaia i tatou e Iesu ina ia ‘⁠ole atu pea, saili atu pea, ma tuʻituʻi atu pea,’ a e aua le faavaivai. (Luka 11:5-10) O lo tatou maumauai i le tatalo ua faaalia atu ai ia Ieova le loloto o lo tatou manatu mamafa, le telē o lo tatou faanaunauga, ma le moni o o tatou loto. (Sala. 55:17; 88:1, 13; Roma 1:9-11) Sa iloa e Paulo le tāua o le tatalo faatauanau i lona uunaia o i tatou ina “ia tatalo e le aunoa.” (1 Tesa. 5:17) O le tatalo, o le tasi lea o auala sili tatou te maua ai le fesoasoani a Ieova.

⁴ E Ala i le Mulimuli i le Taʻitaʻiga Faatiokarate: O le “faatiokarate” o lona uiga e “pulea e le Atua,” o lē e alofa. Tatou te maua aogā mai lana pulega e ala i le talia o lana pule ma mulimuli i ana faatonuga i filifiliga tetele ma filifiliga laiti. Ua fai le “auauna faamaoni ma le mafaufau” ma sui o le pulega faatiokarate i luga o lenei lalolagi. (Mata. 24:45-47) O le felagolagomai ma le faalapotopotoga lea e faaaogā e le “auauna,” e tāua pe a tatou fia maua faamanuiaga a Ieova. (Faatusatusa i le Eperu 13:17.) O le a tauia e Ieova lo tatou faamaoni ia te ia ma le naunau e usiusitai i ana tulafono i le foaiina mai pea o le malosi lea tatou te manaomia i le taimi tatau.—Epe. 4:16.

⁵ E Ala i le Vavalalata ma O Tatou Uso: O le alofa o le faailoga lea ua iloagofie ai soo o Iesu. (Ioa. 13:34, 35) Ona o le lasi o uiga eseese, e ono mapuna aʻe ai ni feteenaiga ia i tatou ona o le eseese o uiga. E manaomia ona femutimutivaleai lo tatou alofa, ma ia fefaamagaloai o le tasi i le isi. (Efe. 4:32) O lenei mea e mafai ai ona tumau lo tatou vavalalata ma o tatou uso i le faatuatua ma faalototeteleina i lo latou tutū mausalī i tofotofoga. O le “iloa o loo oono lo [tatou] au uso o i le lalolagi i ia lava mea tiga,” ua tatou maua ai le malosi mai le Atua e feagai ai ma omiga faapena.—1 Pete. 5:9.

⁶ E Ala i le Tausia o se Faasologa Lelei o Suesuega Totino: O le faamalosia faaleagaga o o tatou mafaufau ma loto, ua mafai ai ona tatou tetee atu i osofaiga a Satani. (1 Pete. 5:8) O se faasologa lelei i le faia o a tatou suesuega totino, o le a faateleina ai lo tatou mauaina o le poto faaleatua. E mafai ona tatou utufia mai i lenei poto faaleatua pe a tatou faafesagai ma faafitauli i aso faisoo. Na faamamafa mai e Paulo e faapea, e tāua se vaega ua faia e le “poto saʻo” i le mauaina ai o le faaolataga. (1 Timo. 2:3, 4, NW) Ua alagātatau ai la ona tatou ave i fale e le aunoa mea e ʻai faaleagaga.

⁷ O sauniuniga uma e mafai ona fesoasoani mai ia i tatou ina ia tumau ai ona malolosi, ua mafai nei ona maua e auala mai lea i le faapotopotoga Kerisiano. O le lagolagosua atu ma le loto atoa i ana gaoioiga, o le a faamaonia atu ai e faapea, o le a tatou “savavali, a e le tigaina.”—Isa. 40:29-31.