Le Faailogaina e Maua ai le Faasaoina
1 A o lei faaooina mai lana faamasinoga amiotonu, e tuuina mai pea e Ieova lapataiga ma saunia se auala e sao ai ē agamalu. I aso o Esekielu, sa i ai i latou na mapuitiga ma feoi ona o mea inosia uma na faia. Na faapogaia e Ieova le faailogaina o i latou ua tatau ai mo le faasaoina. (Eseki. 9:4-6) Ua faataunuuina e la tatou galuega talaʻi i aso nei lena lava fuafuaga. E mafai ona tatou faia ai se vaega tāua.
2 O le sailia o tagata loto faamaoni, ua na o se uluai laasaga lea. E tatou te fuafuaina se toe asiga. O sauniuniga mo le faia o se toe asiga e faia lava i le uluai asiasiga e ala i le matauina o le lomiga na tuu ma le mataupu na talanoaina. O lo tatou taulau i le faia o toe asiga, e faalagolago tele lava i mea ua tatou sauniuni e fai atu ai ma faia pe a tatou toe foi atu.
3 I le tuliloaina o lomiga na tuu o “Le Olomatamata,” e mafai ona e tataʻi le manatu i lona matua autū.
◼ “Ia mātau, i luma o le faavaa o Le Olomatamata, o loo aliali mai ai le faaupuga, ‘Faasilasilaina Le Malo O Ieova.’ O le mea ua tutasi ai lenei mekasini, ona o loo faalauiloaina ai le Malo o le Atua ua na o lea le vaifofo i faafitauli o le lalolagi. O loo faamatala ai le mea o le a faia e le Malo o le Atua pe a faia le finagalo o le Atua i le lalolagi. O le tala lelei lenei na fetalai ai Iesu o le a talaʻiina i le atu laulau uma.” Faitau le Mataio 24:14, ma faamatala le auala e mafai ai ona maua pea Le Olomatamata ma faaaogā ai mo suesuega totino faale-Tusi Paia.
4 Atonu o le a e filifili e taulai atu na o le Tusi Paia ma faamamafa le manaoga ina ia faitauina e le aunoa. E mafai ona e faapea atu:
◼ “E foliga mai e toetoe lava o tagata uma matou te iloa, e latou te talisapaia ni fautuaga aogā i le auala e faafetaiaia ai faafitauli o le olaga i aso faisoo. O fea e te manatu e mafai ona tatou maua ai ni fautuaga e mafai ona tatou faatuatuaina? [Faatali mo se tali.] O le toatele o tagata ua tuu atu lo latou faatuatuaga i fautuaga a uo po o le totogi o tagata faufautua tomai, ua matuā faanoanoa lava ma ua lē fiafia. I le isi itu, e faitau miliona ua latou iloa, o le Tusi Paia, ua na o le pau lea o le puna o fautuaga e mafai ona latou maufaatuatuaina moni. Ua saunia e le Tusi Paia faatonuga i le auala e feagai ai ma so o se faafitauli e ono fesagai ma i tatou. [Faitau le 2 Timoteo 3:16, 17.] E ui atonu na e mauaina e faigata ona malamalama i le Tusi Paia, a e seʻi ou faasino atu ia te oe le auala e mafai ai ona e faaaogaina le Tusi Paia e tatalaina ai se fale teuoa e tumu i fautuaga atamai.” Ia faaauau i le sueina o le upu “Love” (Alofa) i le vaega “Bible Words Indexed” (Faasinoupu o le Tusi Paia) o loo i tua o le Tusi Paia o le New World Translation, ma faasino i ai nisi o mau sii e faailoa ai le auala e mafai e le alofa ona fesoasoani ai ia i tatou e foia feeseeseaiga ma isi.
5 I le i ai o le sini o le amataina o se suesuega faale-Tusi Paia, e mafai ona e filifili e faaaogā le tusi “E Mafai ona E Ola e Faavavau i Parataiso i le Lalolagi,” i le faaaogāina o le upu tomua lenei:
◼ “Tatou te alolofa i o tatou aiga ma tatou te mananao i mea aupito sili mo i latou. O le a faapefea ona maua e lou aiga ni aogā mai le ola ai i se lalolagi faapenei?” [Faaali ata i le itulau e 156-157]. Faitau se mau se tasi pe lua o mau na o loo sii mai ai i na itulau, ma faamatala e faapea o folafolaga nei a Ieova le Atua, o Lē e lē mafai ona tala pepelo. Faasino i le lisi o mataupu i le itulau e 5-6, ma fesili i lē ona le fale po o le fea mataupu e sili ona ia fiafia i ai; ona sue lea i le mataupu ua ia filifilia, ma talanoa se palakalafa se tasi pe lua.
6 Pe e te manao e fesoasoani i se isi tagata ina ia faailogaina mo le faasaoina? O le taulau manuia e faalagolago i le ‘matuā faataunuuina o lau faiva’ e ala i lou sauniuni lelei ma ia vave ona tuliloa ni tagata fiafia na e maua.—2 Timo. 4:5.