Pusa Fesili

◼Pe e talafeagai ona faia se foai mo auala o faimalaga ai o loo saunia e isi?

O nisi o i tatou ua iai i tulaga tatou te manaomia ai le faalagolago atu i isi mo fesoasoani i le auai e lē aunoa i sauniga ma le faia o se sao i le auaunaga i le fanua. O le toatele o uso ma tuafāfine ua faia ni taumafaiga faapitoa ma faaaogaina ma le alofa o latou taimi, taavale, ma isi fesoasoani ina ia saunia ai auala mo i tatou. E ui lava atonu latou te vave sauniuni ai nai lo le tulaga masani ma tuai ona toe foi atu i le fale, ae latou te saunia auala ma le loto malie.

E pei lava foi o isi tulaga o la tatou faiva faa-Kerisiano, o le mataupu silisili o loo maua i le Kalatia 6:5 e faatatauina faapea: “E taitasi ma ave i lana lava avega.” O lea la, afai e saunia pea e se tasi auala mo i tatou, e tatau ona faaalia lo tatou talisapaia e lē gata i a tatou upu ae faapea foi ma se foai talafeagai, pe afai tatou te mafaia, e fesoasoani ai mo isi tupe faaalu o loo aafia ai.—Mata. 7:12; 1 Kori. 10:24.

E tusa lava po o le tagata o loo faaaogaina lana taavale e lē o fesili mai mo se fesoasoani tau tupe ma e foliga mai e na te lē o manaomia sea fesoasoani, ae o le ofoina atu o lea foai mai le loto e masani lava ona talisapaia. Atonu e lē taliaina e le avetaavale se mea; ma o lana lena filifiliga e fai pe talia se foai pe leai. Ae e tatau ia te oe ona ofo atu se foai. Afai ua e lē mafai ona foai se mea i lena taimi, e mafai ona teu i le mafaufau; atonu e mafai ona foai atu se mea faasili i le isi taimi e te malaga ai.—Luka 6:38.

O se agalelei tele mo i latou e iai taavale le saunia o auala mo isi o ē atonu a aunoa ma lea fesoasoani o le a lē mafai ona auai i sauniga po o le faia o se sao i le auaunaga i le fanua. (Faata. 3:27) I le taimi lava foi e tasi, o se agaalofa mo i latou o ē o loo aogā i ai lenei agalelei ona faailoa atu lo latou loto faafetai e ala i le foai e tusa ai ma o latou tulaga o iai.—Kolo. 3:15.