O Ai o le a Faalogo i la Tatou Feau?
1 E lei faapea muamua i le talafaasolopito faaletagata ona lofia tagata i faamatalaga, o le tele lava o ia faamatalaga o tala faaulaula ma e oo lava ina faaseseina ai. O le iuga, e toatele ua matuā lofituina i lagona lē mautonu, ma ua oo ai ina faafaigata ia i tatou ona taumafai ina ia faalogo mai i latou i le feau e uiga i le Malo o le Atua. E latou te lē iloa pe e iai se iuga mautinoa e oo i o latou olaga pe a latou faalogo atu i le Afioga a le Atua.—Luka 11:28.
2 E tatou te olioli ona i le tele o vaega o le lalolagi, e faitau sefulu afe tagata o loo faalogo i lena feau ma taliaina la tatou ofo i le faia o ni suesuega faale-Tusi Paia i aiga. Ae peitai, i isi oganuu, e lē tele naʻuā faapena le tali mai. O le tele lava o asiga tatou te faia i le faiva, e leai ni iuga mautinoa, ma atonu tatou te tau mānatu ai po o ai e mafai ona faalogo mai i la tatou feau.
3 E tatau ona leoleo i tatou mai le oo ina loto vaivai. Na faamatala mai e Paulo e faapea: “Auā e faaolaina i latou uma o e valaau i le suafa o le Alii [o Ieova]. O lenei, pe faapefea ona latou valaau atu i le ua latou . . . le faalogo atu i ai? pe faapefea foi ona latou faalogo atu, pe a leai se talaʻi atu? . . . Pei ona tusia, E matagofie naua o latou vae o e au mai le tala lelei i le manuia!” (Roma 10:13-15) Afai tatou te lūlū ma le filigā fatu o le Malo, o le a faatupuina e le Atua i loto o i latou o ē faamaoni.—1 Kori. 3:6.
4 O le Ki o le Faia e Lē Aunoa o Toe Asiga: I oganuu na o loo foliga mai e toaitiiti tagata e faalogo mai i la tatou feau, e manaomia ai lava ona tatou uaʻi totoʻa atu e atiina ae so o se tasi lava tatou te mauaina ua faaalia le fiafia, e tusa lava pe tatou te tuua ai ni lomiga pe leai. Aisea e vave ai ona faia se faaiuga e faapea, e leai se mea e maua ai? Pe a tatou luluina fatu, e tatou te lē iloa po o fea o le a manuia. (Fai. 11:6) Pe afai ua tatou sauniuni lelei e toe foi e tufa atu se mea mai le Tusi Paia, e tusa lava pe puupuu, ae atonu e mafai ona tatou pāʻia ai le loto o le tagata. E mafai ona tatou tuua se sāvali pe ofo i ai mekasini fou. I se taimi mulimuli ane, atonu o le a mafai ai ona tatou faia se suesuega faale-Tusi Paia. O le a tatou maofa ai ma le fiafia e iloa, e maeu le tele o faamanuiaga a Ieova i a tatou taumafaiga.—Sala. 126:5, 6.
5 Na tuu se sāvali i se fafine o lē na faaalia sina fiafia. Ma e lei toe maua atu lava o ia i le fale seia mavae le lua masina, ma i lena taimi, sa lei maua foi se avanoa e talanoa ai. Na toe tuu ai foi le sāvali lava lea e tasi. E ui lava i taumafaiga maumauai a le tagata talaʻi ina ia maua atu o ia i le fale, ae na toe alu foi le isi tolu masina o taumafai le tuafafine e faafesootai o ia, ae na faatoʻā maua o ia ina ua maʻi. Na toe asiasi atu le tuafafine i le vaiaso na sosoo ai, ma na faia ai se talanoaga puupuu e uiga i le sāvali. Ina ua toe asiasi atu le tuafafine i le vaiaso na sosoo ai, na faaalia ai e le fafine le fiafia moni i le feau o le Malo. O le faia o se suiga i lona olaga, na ia amanaia ai ona manaoga faaleagaga. Na amataina ai se suesuega faale-Tusi Paia, ma talu mai ai lava, sa suesue ma le aasa o ia i vaiaso uma.
6 E tusa ai ma so o se mea lava e tatou te mananao e vaai atu ua tupu, po o fugalaau, laau ʻaina, po o le fiafia i le feau o le Malo, e manaomia lava ona faasūsūina pea. E umi se taimi e faia ai lena mea, ia sogasoga, ia iai se uiga e manatu mamafa, ma ia maumauai ia lē faavaivai. I le tausaga ua mavae, e sili atu i le tasi vaetolu o le miliona tagata na amata ona tutupu ai fatu o le Malo, ma papatisoina! Afai e faaauau pea ona tatou talaʻi, e mautinoa o le a tatou maua le isi toatele o ē o le a faalogo i la tatou feau.—Faatusatusa i le Kalatia 6:9.