Ofoina Atu i Tatou Lava ma le Loto Malie
1 Na vavalo le faisalamo o Tavita e faapea, o tagata o Ieova, ‘o le a ofoina atu ma le loto i latou lava’; o lona uiga i le avea o ni “tagata e tauofo ma le loto atoa.” (Sala. 110:3, faamatalaga i le pito i lalo o le mau i le NW) E mautinoa lava ua faataunuuina lenei mea i la tatou aufaatasiga o uso i le lalolagi aoao. Talu mai tausaga taitasi faaleauaunaga e fa ua mavae, e sili atu i le piliona itula na tuuina atu e tagata o Ieova i le faasalalauina o le tala lelei o le Malo. E lē gata i le galuega talaʻi ma le faia o soo, ae tele lava auala e mafai ona tatou ofoina atu ai i tatou lava ma le loto atoa e fesoasoani atu ai i isi.
2 Auala e Mafai Ona Faaalia ai lo Tatou Loto Malie: Atonu e manaomia e nisi i le faapotopotoga se fesoasoani e ō ai i sauniga. Aisea e te lē tauofo ai tou te ō faatasi? O isi atonu o mamaʻi, e lē atoatoa le malosi, po o faataotolia i le falemaʻi. Pe e mafai ona e tausolomua e asiasi atu ia i latou pe fesoasoani atu i ai i se isi auala? Atonu o iai se tagata po o se aiga o loo manaomia se faalaeiauga. Po o e mafaufau e faasalafa atu se valaaulia i tagata faapena e auai i le suesuega a lou aiga i nisi taimi? Atonu o manaomia e se paeonia po o se tagata talaʻi se soa i le faiva. Aisea e te lē ofo ai e te lua galulue faatasi i le auaunaga? O nisi nei o auala e mafai ona tatou galulue tauofo ai mo le lelei o i latou e tatou te aiga i le faatuatua.—Kala. 6:10.
3 E mafai e uso ona faaalia le loto malie e faaaogaina i latou i le faalapotopotoga a Ieova e ala i le faia o se tauiviga ina ia ausia agavaa e avea ai o ni toeaina ma auauna o le faiva. (1 Timo. 3:2-10, 12, 13; Tito 1:5-9) A o faaauau pea ona faatuputeleina lo tatou faitau aofai, o loo iai la se manaoga mo ni uso agavaa o ē e naunau e taʻimua i le talaʻiga ma le aʻoaʻo atu ma i le leoleoina o faapotopotoga.—1 Timo. 3:1.
4 Atonu e mafai e nisi o i tatou ona faaavanoa i tatou lava i le auaunaga ia Ieova i se tulaga e sili atu e ala i le avea o ni paeonia lagolago mai lea taimi i lea taimi. E mafai foi la ona faia ni nai suiga talafeagai i a tatou faasologa ina ia mafai ai ona tatou paeonia lagolago faifai pea pe auai foi i le auaunaga o le paeonia sauatoa. Po o faapena o tatou tulaga ina ia mafai ai ona tatou siitia atu i se vaipanoa o loo manaomia tele ai se fesoasoani? Pe e mafai ona faaavanoa i tatou e auauna i Peteli ma tatou saosaolaumea tuusaʻo ai mo le agaigai i luma o le galuega i le lalolagi aoao? E tele foi mea o loo faia i le fausiaina o Maota o le Malo, Maota Fono, ma fale o lālā i le lalolagi aoao, i mea o loo matuā manaomia ai ni tagata faigaluega tauofo ma le loto naunau. E matuā talisapaia lava i latou o ē ua ofoina atu i latou mo nei galuega lelei, ma ua matuā faatamaoaigaina i latou i faamanuiaga!—Luka 6:38.
5 O taimi fiafia nei. Ua faataunuuina e Ieova e ala i lona agaga se galuega ofoofogia i le lalolagi i ona tagata loto naunau! I so o se taimi lava e faasalafa mai ai e Ieova se valaaulia e ala i lana faalapotopotoga ina ia faia se sao i le galuega ua faateleina o le Malo, e lelei pe a tatou fesili ifo ia i tatou lava e faapea, ‘Po o oʻu ofoina atu pea aʻu ma le loto malie?’ Ona tatou suesue ifo lea faatasi ma le tatalo i o tatou loto ma tulaga. O lo tatou tuutoina i le Atua, o le a uunaia ai i tatou e faia mea uma tatou te mafaia i le auaunaga paia, auā o le a faafiafiaina ai le finagalo o Ieova!—Sefa. 3:17.