Le Faamanatuga—O se Sauniga e Sili Ona Tāua!
1 I le Aso Sa, o Mati 23, pe a goto le la, o le a tatou faamanatuina ai le Faamanatuga o le maliu o Keriso. (Luka 22:19) O se sauniga moni lenei e sili atu ona tāua! E ala i le tausia o lona faamaoni ia Ieova seia oo i le oti, ua faamaonia ai e Iesu e faapea, e mafai e se tagata ona tausia se tuutoina lelei atoatoa faaleatua e oo lava i lalo o tulaga faigata e sili ona ogaoga, ma ua sapasapaia ai le tonu aʻiaʻi o le pule silisili ese a Ieova. (Epe. 5:8) E lē gata i lea, o le maliu o Keriso ua saunia ai le taulaga lelei atoatoa faaletagata e manaomia mo le togiolaina o tagata, ua mafai ai e i latou e faatuatua ona ola e faavavau. (Ioa. 3:16) O le auai la i le Faamanatuga, ua faaalia ai lo tatou talisapaia ma le loto atoa e lē gata mo le alofa o Ieova ae faapea foi ma le taulaga na faia e Iesu mo i tatou.
2 Ua faalaeiauina tagata uma ina ia mulimuli i le polokalame o le faitau Tusi Paia ua faatulagaina mo Mati 18-23, e pei ona maitauina i le 1997 Calendar of Jehovah’s Witnesses. E faia ai foi ni talanoaga faaleaiga i le mataupu e 112-116 o le tusi Le Tagata Silisili o Ē Uma na Soifua Mai, o le a fesoasoani e taulai atu ai o tatou manatu i le vaiaso e sili ona tāua i le talafaasolopito o le tagata.
3 Pe e mafai ona e faateleina le taimi e te faaaluina i le faiva i le fanua i le vaitaimi o le Faamanatuga? E toatele foi le ʻau talaʻi o le a latou faaaogaina atoatoa ai faaiuga o vaiaso e lima ia Mati e auauna ai faapaeonia lagolago. Aisea e te lē aufaatasi atu ai ma i latou? E mafai e i tatou uma lava ona faia atoatoa ai se sao i le faamamafaina o le tāua o le auai i le Faamanatuga. Talu ai e paʻū lea aso i le Aso Sa, o le a sili ai ona faigofie mo le toatele ina ia auai. Ia mautinoa e valaaulia suesuega uma faale-Tusi Paia ma isi tagata loto fiafia ina ia auai ma i tatou. Ia talanoa ma i latou le mea o loo taʻua i le itulau e 127, palakalafa 18, o le tusi o Le Poto, e faatatau i le aso e tasi o le tausaga e tatau ona faamanatuina faapitoa.
4 Ia āloālo atu i lenei aso e sili ona tāua o le 1997, faatasi ai ma le matuā talisapaia mo mea uma ua faia e le maliu o Iesu mo i tatou. Ia e auai i le afiafi o Mati 23, a o faamanatuina ma le faamaoni e Kerisiano moni i so o se mea le Faamanatuga.