Pusa Fesili

◼ Pe a talosagaina le faapotopotoga e fesoasoani i le faatulagaina o toe sauniga o se maliu, o fesili nei e ono tulai mai:

O ai e tatau ona faia le lauga o le maliu? O le filifiliga lenei e faia e tagata o le aiga. E ono mafai ona latou filifilia so o se uso papatisoina o loo lelei lona tulaga. Pe afai e talosaga atu i le au toeaina mo se failauga, e masani ona filifilia e le au toeaina se toeaina agavaa e faia le lauga mai le auivi a le Sosaiete. E ono talafeagai ona faamanatu mai ni uiga lelei e faaaʻoaʻo i ai na faaalia e lea tagata, e ui lava e lē faia se molimau e faaviivii ai i lē ua maliu.

Pe e mafai ona faaaogā le Maota o le Malo? E ono mafai ona faaaogā pe afai e maua se faatagaga mai le au toeaina ma pe a lē faalavelavea ai faatulagaga masani mo sauniga. E ono mafai ona faaaogā le maota pe afai o lē ua maliu sa ola i se olaga mamā ma sa avea ma se sui o le faapotopotoga po o se tamaitiiti a se tagata o le faapotopotoga. Pe afai o lē ua maliu ua lauiloa i le lautele i ni amioga lē faa-Kerisiano na ia faia, po o loo iai foi nisi mea e ono tuu ai le faapotopotoga i se tulaga e tauvalea ai, e ono faia e toeaina se faaiuga e lē faatagaina ai le faaaogaina o le maota.—Tagai i le tusi Our Ministry, itulau e 62-63.

O le mea e masani ai, e lē faaaogaina Maota o le Malo mo sauniga o maliu o ē lē talitonu. E pau se tulaga e ono ese ai pe afai o tagata o le auaiga o loo soifua o loo toaaga e faatasitasi atu i le faapotopotoga ma o ni tagata ua papatisoina, ma e toatele foi tagata talaʻi o le faapotopotoga ua latou iloa lē ua maliu e faapea sa lelei ona uiga na faaalia i le upu moni ma e lelei foi lona tulaga tau amio i le nuu, ma e leai ni aganuu faalelalolagi e faaofi atu i le polokalame o le sauniga o le maliu.

Pe a tuu atu le faatagaga e faaaogā ai le Maota o le Malo, o le a iloiloina e toeaina po o se tu faaleaganuu le tatau ona iai o le pusamaliu i le mea o faia ai le sauniga o le maliu. Pe afai o le tu masani lea, e ono mafai la ona latou faatagaina le avatuina o le pusamaliu i totonu o le maota.

Ae faapefea sauniga o maliu o tagata o le lalolagi? Pe afai o lē ua maliu e tauleleia e le nuu, e ono mafai e se uso ona fai atu se lauga faamafanafana mai le Tusi Paia i le falemaliu po o le mea o loo iai le tuugamau. O le a lē faia e le faapotopotoga se sauniga o se maliu mo sē ua lauiloa i amioga lē mamā, amio e lē tusa ai ma le tulafono, po o le auala foi na ola ai na matuā tetee i mataupu silisili o le Tusi Paia. E mautinoa lava o le a lē auai faatasi se uso ma se faifeau i le faia o se sauniga o se maliu e lualuagia ai le faatuatuaga, e faapena foi ona leai sana vaega e faia i so o se sauniga o maliu e faia i falesa o Papelonia le Aai Tele.

Ae faapefea pe afai o lē ua maliu e faateaina? O le a lē auai le faapotopotoga. O le a lē faaaogaina le Maota o le Malo. Pe afai na iai ni faamaoniga o le salamō na faaalia e lea tagata ma na faaalia le naunau e toe fia faaeaina, e ono mafai e le loto fuatia ifo o se uso ona faataga o ia e faia se lauga mai le Tusi Paia i le falemaliu po o le mea o loo iai le tuugamau, ina ia fai atu ai se molimau i ē lē talitonu ma faamafanafana ai i le auaiga. Peitai, a o lei faia lenei faaiuga, e lelei mo le uso ona fesili atu i le au toeaina ma amanaia ni fautuaga e latou te ono tuuina atu. I tulaga e lelei ai mo lena uso lona lē aafia ai, atonu e lelei pe a faia e se uso o lē e aiga i lē ua maliu se lauga e faamafanafana atu ai i le auaiga.

Mo nisi faamatalaga atili e mafai ona maua i lomiga o le Watchtower o Oketopa 15, 1990, itulau e 30-31; Le Olomatamata o Iuni, 1982, itulau e 24; Watchtower o Mati 15, 1980, itulau e 5-7; Iuni 1, 1978, itulau e 5-8; Iuni 1, 1977, itulau e 347-348; Mati 15, 1970, itulau e 191-192; ma le Awake! o Setema 8, 1990, itulau e 22-23 ma Mati 22, 1977, itulau e 12-15.