Faalagolago ia Ieova na te Faatupuina Mea
1 “O le uluai taimi lea ua ou tofo ai i le olioli uigaese ona o le fesoasoani e faavaeina se faapotopotoga fou. O lenei mea na faaalu ai le sili atu i le lua tausaga o galuega filigā, tatalo maumauai, ma le faalagolago ia Ieova o lē ‘na te faatupuina mea.’” Na tusi mai ai faapena se paeonia loto faamaoni o lē na iloa e manaomia ona ia faalagolago atu ia Ieova mo le faatupuina. (1 Kori. 3:5-9) I la tatou sailiga mo tagata e naunau i mea faaleagaga, e tatou te manaomia ai foi le lagolagosua a le Atua pe afai tatou te mananao ina ia fua mai la tatou faiva.—Faata. 3:5, 6.
2 O le Tuputupu Aʻe e Manaomia ai le Faasūsūina: E manaomia ona faasūsūina le fatu o le upu moni pe afai e manao ina ia tupu. O le toe asiasi atu pe a mavae se aso se tasi po o se lua o le uluai asiasiga, e masani ona maua ai ni iuga lelei. Ia māfana ma faaleuo. Aua le faapopoleina le isi tagata. Aua e te faia uma tala. Tuu atu se avanoa i le tagata ina ia faamasani ai ia te oe, ma ia faaali atu e te naunau i le tagata.
3 Ia Iulai ma faaauau atu ai ia Aokuso, e tatou te uaʻi faapitoa atu ai i le ofoina o polosiua eseese i tagata tatou te feiloai. Ae peitai, e manaomia foi ona tatou tuliloaina tagata na faaalia le fiafia ma tagata na tuu ai lomiga. E tatou te faia lenei mea e ala i le toe asia o i latou ma ofoina i ai suesuega faale-Tusi Paia. (Mata. 28:19, 20) Ina ia faia faapea, e mafai ona faaaogā le polosiua o le Manaomia e amataina ai ni suesuega. Atonu o le a e iloaina le aogā o fautuaga nei e fa.
4 Afai sa e talanoa atu i se tasi na faaalia le popole e uiga i tulaga sili ona leaga ua iai le lalolagi, e mafai ona e toe amataina le talanoaga i lou faapea atu:
◼ “Ou te talitonu o loo e popole e pei foi o aʻu e uiga i le matuā leaga o tulaga tau i amioga tatau i le sosaiete faaletagata. Ua tatou faalogo i tala lē manuia e uiga i faiga sauā i totonu o aiga, ua iu ai i le faaleagaina o tamaiti, mātua, ma paaga faaipoipo. Ma e foliga mai e toatele tagata ua pei o le mea noa ia i latou le tala pepelo po o le gaoi ina ia faamalieina ai o latou lava tuinanauga. Pe e te manatu e afaina i le Atua le auala o ola ai tagata? [Faatali mo se tali.] Na faavaeina e le Atua ni tapulaa faapitoa mo le tagata e ola ai, ma o le mea moni e lē o se avega mamafa lea mo i tatou.” Faitau le 1 Ioane 5:3. Ona faaali lea i ai o le polosiua o le Manaomia, ma suʻe i le lesona 10. Faitau le palakalafa muamua. Faasino i upu ma fasifuaiupu na e tusi faasisipa i le amataga o le palakalafa e 2-6, ma fesili atu i lē ona le fale po o lē fea faiga e manatu e sili atu ona afaina ai tagata. Faitau le palakalafa o loo taʻua ma suʻe se mau se tasi po o se lua pe a lava le taimi. Ia faaiu i le faitauina o le palakalafa 7, ona fai lea o se fuafuaga e te toe foi mai mo se isi talanoaga atili.
5 Ia i latou na e feiloai atu i ai ma o loo popole e uiga i o latou aiga, e mafai ona e faapea atu:
◼ “Pe e te manatu e tatau ona faatalitalia o le a tuuina mai e Lē na Foafoaina Mea ia i tatou ia mea faigaluega tatou te manaomia ina ia fausia aʻe ai se olaga faaleaiga e taulau manuia?” Faatali mo se tali. Faaali i ai le polosiua o le Manaomia, suʻe i le lesona e 8, ma faamatala i ai e faapea, o loo iai i le polosiua mataupu silisili mai le Tusi Paia mo tagata taitoatasi uma o le aiga. Fai i ai e mafai ona e faataitaia atu le auala e faaaogā ai le polosiua faatasi ma le Tusi Paia ina ia maua ai aogā e sili atu ona lelei. Mulimuli i faatonuga na o loo maua i le itulau e 2 o le polosiua. Fai se fuafuaga e te toe asiasi atu e faaauau ona suesueina le lesona, ma pe afai na uma ona suesueina, ia suesue se isi lesona e filifilia e lē ona le fale mai le polosiua.
6 O se faafeiloaiga tuusaʻo lenei e mafai ona e faaaogā e ofoina atu ai la tatou polokalame o suesuega faale-Tusi Paia. Faaali le polosiua o le “Manaomia,” ma faapea atu:
◼ “O lenei polosiua, o loo iai se polokalame faaleaoaoga ua faavaeina lelei mo suesuega, o loo aofia ai aʻoaʻoga faavae o le Tusi Paia. I itulau taitasi, o le a e maua ai tali i fesili ua au senituri o faapopoleina ai tagata. Mo se faaaoaoga, O le ā le fuafuaga a le Atua mo le lalolagi?” Suʻe i le lesona e 5, ma faitau fesili i le amataga o le lesona. Fesili i lē ona le fale po o lē fea fesili e sili ona ia fia iloa i ai se tali, ona faitau lea o le palakalafa e fesootai atu i ai, ma suʻe mau talafeagai. Faamatala i ai e faapea, o tali faamalieloto i isi fesili e mafai ona faigofie ona maua e pei foi o le tali i lenei fesili. Taʻu i ai e mafai ona e toe foi atu e talanoaina le isi fesili ma lona tali.
7 Pe e te manao foi e filifili se taulimaga faigofie mo le amataina o se suesuega faale-Tusi Paia i lou faapea atu:
◼ “Pe sa e iloa o le faaaluina e tau lava o ni nai minute, e mafai ai ona e maua le tali i se fesili tāua faale-Tusi Paia? Mo se faaaoaoga, . . . ” Ona fai atu lea o se fesili mai fesili na o loo i le amataga o se tasi o lesona i le polosiua, se lesona e te manatu o le a fiafia i ai le tagata. Mo ni manatu e faatatau i fesili e mafai ona e faaaogaina, tagai i le palakalafa 15 ma le 16 i le faaopoopoga o La Tatou Faiva o le Malo o Mati 1997, ua faaulutalaina e faapea: “Ia Maua le Lototele e Faia ai Toe Asiga.”
8 O le talia ma le fiafia o le luʻi o le faia o toe asiga ma suesuega faale-Tusi Paia, o se vaega lea o le avea ma ‘se au faigaluega faatasi ma le Atua.’ (1 Kori. 3:9) A o tatou galulue malosi e atiina ae le naunau fiafia o tagata na tatou maua ma ia faalagolago ia Ieova na te faatupuina mea, o le a tatou tofo ai i le loto malie e lē mafai ona maua mai i se isi lava galuega.