Ia Faamuamua Mea e Sili Ona Tāua
1 O ā nisi o mea tāua e sili ona aogā mo lo tatou lelei faaleagaga? O nei mea, e mautinoa lava e aofia ai suesuega totino, le auai i sauniga, le finafinau i le tatalo, o aufaatasiga mamā, ma le faiva faa-Kerisiano. E lē mafai ona tatou faatumauina se soifua maloloina lelei faaleagaga e aunoa ma le tausisia o mea e silisili ona tāua i o tatou olaga.
2 Ae peitai, o i tatou uma lava, o loo tau e tetee atu i tuinanauga o le tino, ma e iai foi se manaoga mo ni aoaiga. (Kala. 5:17) Aua lava neʻi o tatou manatu faapea o le a sili atu ni mea tatou te maua mai e ala i le sailia o manaoga manatu faapito. (Iere. 17:9) O lea la, pe afai tatou te mananao e leoleomaluina o tatou loto ma alofia ai le taitaiseseina, e tāua tele la lo tatou iloiloina e lē aunoa o i tatou lava.—Faata. 4:23; 2 Kori. 13:5.
3 Ia Iloiloina e Oe Lou Lava Loto: E mafai ona e faia lenei mea e ala i lou fesili ifo ia te oe lava i ni fesili talafeagai: Po o oʻu matuā naunau ea e faitau le Afioga a le Atua? (1 Pete. 2:2) Po o oʻu talisapaia ea le tāua o le auai i sauniga uma a le faapotopotoga? (Epe. 10:24, 25) Po o oʻu finafinau i le tatalo? (Roma 12:12) Po o oʻu saili ea e aumea atu i tagata e mafaufau i mea faaleagaga? (Roma 1:11, 12) Po o oʻu lagona o saʻu tiute tauave totino le folafola atu o le tala lelei? (1 Kori. 9:16) O tali mautinoa o le a faaalia ai o loo iai sou faanaunauga ina ia faamuamua mea e sili atu ona tāua.
4 Ia Iloiloina Lau Faasologa o Aso Taitasi: E manaomia ona e tausisi pea i le iloiloina o mea o faanaunau i ai lou loto e ala i le faamautinoa o mea e tatau ona faamuamua e faaaogā i ai le taimi. E aofia ai i lenei mea le faatulagaina o se taimi mo le faitauina e lē aunoa o le Tusi Paia ma lomiga taitasi uma o Le Olomatamata ma le Ala Mai!, faapea ma le sauniuni atu mo sauniga. E tatau foi ona faataatia ese se taimi e suesue ai ma tatalo faatasi ai ma le aiga. Ia faataatia se tapulaa i le tele o le taimi e faaalu i le matamataina o le televise po o isi faafiafiaga. Ia maumauai e auai i sauniga uma a le faapotopotoga, ma ia fai fuafua i ai isi mea uma. Ia fai se fuafuaga ina ia auai le aiga atoa i le auaunaga i le fanua i vaiaso taitasi.
5 E mautinoa, o le tuu faamuamua o mea e sili ona tāua i o tatou olaga, o le a avea moni ma mea e olioli ai.